Read Zokam Thukhente 9 Bible Online

Thukhente 9 - Zokam bible

Thukhente 9

¹Jerub-Baal’ tapa Abimelech, Shechem-a, a nu sanggampate le a nu bawng’te khempeuh kiangah pai-a,

²"Shechem a khuami khempeuh tungah, ‘Jerub-Baal’ tapa sawm sagihte in no hong uk ding le mi khat bekin hong uk ding no adingin koi hoihzaw ahi hiam?’ ci-in dong un. Keimah in nomau si le sa ka hi hi, thei un," a ci hi.

³A sanggamte in Shechem khuamite tungah a gensawn uh ciangin Abimelech zuih ding lamah puk uh a, "Amah i sanggampa ahi hi," a ci uh hi.

⁴Amaute in Baal-Berith biakinnpi panin ngun shekel c sawm sagih pia uh a, Abimelech in ama nungzui mi ngoltolte cialna-in a zang hi.

⁵Ophrah-a, a pa inn ah amah pai-a, Jerub-Baal tapa a sanggam pasal sawm sagihte suangtumpi khat tungah a that hi. Ahi hangin Jerub-Baal’ tapa a nautum pen Jotham bu-in a suakta hi.

⁶Tua ciangin Shechem le Beth Millo khua mite khempeuh Shechem sunga om singpi gei-ah khuampi-ah Abimelech kumpi suaksak dingin a kikhawm uh hi.

⁷Jotham kiangah hih thu a kigen ciangin Gerizim Vum dawn ah kahto in amaute otsan a, "Shechem khuamite aw, Pasian in na thu uh hong ngaih theih nadingin ka thugen na ngai un.

⁸Ni khat amau kumpipa ding sathau nilh dingin singkungte a kuankhia uh hi. Amaute in olive kung kiangah, ‘Ka kumpi uh hong hi in,’ ci uh hi.

⁹"Ahi hangin olive kung in, ‘Mite le pasiante a kipahtawi khawmna ka thaute nusia in singkungte uk ding ka hi hiam?’ ci-in dawng hi.

¹⁰"Tua zomah singkung in theikung kiangah, ‘Hong pai-in ko kumpi hong hi in,’ ci hi.

¹¹"Ahi hangin theikung in, ‘A hoih a khum ka gah nusia-in, singkungte uk ding ka hi hiam?’ ci hi.

¹²Tua ciangin singkungte in lenggui kiangah, ‘Hong pai-in ka kumpi uh hong hi in,’ ci uh hi.

¹³"Ahi hangin lenggui in, ‘Mite le pasiante a lung nuamsak khawm ka zu nusia in singkungte uk ding ka hi hiam?’ ci hi.

¹⁴"A nunung penin singkung khempeuh in thangling kung kiangah, ‘Hong pai inla ka kumpi uh hong hi in,’ ci uh hi.

¹⁵"Thangling kungin singkungte kiangah, ‘Na kumpi dingun sathau nong nilh nop takpi uh leh ka liim ah hong bu un; tua ahi kei leh thangling kung pan mei paikhia-in Lebanon taksingte hultum hen!’ ci hi.

¹⁶"Tu-in Abimelech muangtakin pahtawi a kumpi-in na koih uh ciangin Jerub-Baal le a innkuanpihte tungah ama hong sepsaksa tawh kituakin a gamta mah na hi uh hiam, -

¹⁷ka pa in a nuntakna khamin note ading hong dosak a, Midian-te khut panin hong hukhia hi;

¹⁸(ahi hangin ka pa’ innkuante na lehdo uh a, tuni-in suang khat tungah a tapa sawm sagihte thatin amah note sanggam ahi man hangin a nasemnu’ tapa Abimelech Shechem mite kumpi na suaksak uh a) -

¹⁹note in tu ni-in Jerub- Baal le a innkuanpihte tungah muangtakin pahtawi-a gamta na hih nak uh leh Abimelech no lungnopna hi henla, no zong ama aa in tua mah hi uau!

²⁰Ahi hangin a tuaci na hi kei uh leh Abimelech pan meikuang suakkhia-in Shechem le Beth Millo mite hong hultum henla, Shechem le Beth Millo mite panin meikuang suakkhia in Abimelech hultum hen ou!" a ci hi.

²¹Tua ciangin Jotham in a sanggampa Abimelech a kihtak manin a suahtak nadingin Beer ah a tai hi.

²²Abimelech in Israel kum thum sung a uk khit ciangin

²³Pasian in Abimelech le kheltat-a a lehdo Shechem khua mite kikalah kha gilo a sawl hi.

²⁴Tua in Jerub-Baal’ tapa sawmsagihte tunga a mawhna uh, amaute sisan luansakna phu a lak thei nadingun a sanggampa a thahpih Shechem khua mite le Abimelech tungah Pasian in a hih ahi hi.

²⁵Amah a langbawlna-un Shechem khua mite in mualdawn ah mi buksimin a paite’ na sut dingin mi pangsak uh a, hih thu Abimelech kiangah kiko hi.

²⁶Tu-in Ebed’ tapa Gaal a sanggamte tawh Shechem ah kikhin uh a, khua sung mite in amah a muang uh hi.

²⁷Amaute lo ah kuanin lenggah lo uh a, cilin amaute pasian biakinn ah pawi a bawl uh hi. A nek a dawn kawmun Abimelech a hamsiat uh hi.

²⁸Tua ciangin Ebed’ tapa Gaal in, "Ama nasem i suah nadingin Abimelech kua hi-a, Shechem kua ahi hiam? Amah Jerub-Baal tapa hi-in a huhpa Zebul hi lel lo hiam? Shechem’ pa Hamor’ na sem un! Bang hangin Abimelech’ nasem suak ding i hi hiam?

²⁹Hih mite kei khut sung hong tung leh maw! Tuateh amah ka suan zo ding hi. Abimelech kiangah, ‘Na galkap buppi samkhia in,’ ka ci ding hi," a a ci hi.

³⁰Ebed’ tapa Gaal in tua banga a gen khuapi ukpipa Zebul in a zak ciangin a heh mahmah hi.

³¹Amah in Abimelech kiangah kamtai sawlsim a, "Ebed’ tapa Gaal le a sanggamte Shechem ah hong pai uh a, nang langah khuapi a sosak uh hi.

³²Tua ahi ciangin tu-in nang le na mite hong kuan unla lopaangte ah na buksim un.

³³Zingsang nisuah ciangin khuapi sim unla, Gaal le a mite no do dinga hong paikhiat ciangin na hih nop bangbangun hih un," a ci hi.

³⁴Tua ciangin Abimelech le a galkapte zanin kuankhia uh a, pawl li kisuahin Shechem kiangah panmun a la uh hi.

³⁵Tu-in Abed’ tapa Gaal paikhia-in khuapi kongpi lutna ah a din laitak tektek in Abimelech le a galkapte a buksimna panun a paikhia uh hi.

³⁶Gaal in amaute a muh ciangin Zebul kiangah, "En sin, mualdawn pan mite hong paisuk!" a ci hi. Zebul in, "Mualte’ liim mi-a mukhial hi ni cia," ci-in a dawng hi.

³⁷Ahi hangin Gaal in, "En dih ve, gam laizang panin mite hong tuaksukin, pawlkhat lah aitawipa’ singkung lam panin hong pai hi," ci-in a ko kik hi.

³⁸Tua ciangin Zebul in, "Na pau phat vial a, ‘A nasem i suah na dingin Abimalech kua hiam?’ na cih na thusim lohte hi lo hiam? Kuankhia inla do ve!" a ci hi.

³⁹Tua ciangin Gaal in Shechem khua mite kuankhiatpih b in Abimelech a do uh hi.

⁴⁰Abimelech in amah delh-a, kongpi lutna lampi dungah - kidona hanga liam tampi a puk uh hi.

⁴¹Arumah ah Abimelech om a, Zebul in Gaal le a sanggamte Shechem panin a nawhkhia hi.

⁴²A zingciangin Shechem mite lopaangte ah paikhia uh a, hih thu Abimelech kiangah kizasak hi.

⁴³Tua ciangin amah in a mite kuanpihin pawl thumin khena, lopaangah a buksimsak hi. Amah in khuapi sung pan mi a kuankhia a muh ciangin a sim dingin a diangkhia uh hi.

⁴⁴Abimelech le a pawlte in khuapi lutna kongpi lam a delh henhan uh hi. Tua ciangin adang pawlnihte in lopaanga omte delh huan uh a, a sattuk uh hi.

⁴⁵Tua ni tawntung Abimelech in mite thatin khuapi a lak mateng khuapi a sim niloh hi. Tua ciangin khuapi susia a khuapi sungah ci a theh hi.

⁴⁶Shechem tausanga khua mite in hih thu a zak uh ciangin El-Berith biakinn, kulh muanhuai sungah a lut uh hi.

⁴⁷Tua lai-a a kikhop lam uh Abimelech in a zak ciangin

⁴⁸amah le a mite khempeuh Zalmon Vum ah a paito uh hi. Amah in hei khat la a, singhiang pawlkhat sattanin a liangko-in a pua hi. A ompih mite kiangah, "Ka hih na muh bangbangun manlang takin hih un," ci-in thu a pia hi.

⁴⁹Tua ciangin mi khempeuh in singhiang khiakin Abimelech a zui uh hi. Amaute in kulh muanhuai sing siatnelh uh a, a sunga om mite a halkhum uh hi. Tua ciangin Shechem tausang sunga om mi khempeuh numei pasal mi tul khat bang zong a si hi.

⁵⁰Tua zomah Abimelech Thebez ah pai-in umcih-a, a la hi.

⁵¹Ahi zongin a khuapi sungah tausang muanhuai khat oma, a khuapi sunga mi khempeuh -a numei a pasalin - tua lai-ah a tai uh hi. Amau leh amau kikalhnelhin tausang khum dawnah a kah to uh hi.

⁵²Tausang ah Abimelech paito in a va busim gawp hi. Ahi hangin a hal dingin tausang a manawh laitakin,

⁵³numei khat in angawina suang a tungnung pen khiatsuk-a, a lu kha-in a luguh a kitam hi.

⁵⁴Amah in a galhiam puapa sam mengmeng a, "Amaute in, ‘Amah numei thahsa hi," a cih theih lo nadingin na namsau dok inla kei hong that in," a ci hi. Tua ciangin a nasempa in amah dawtlet-a, a si hi.

⁵⁵Israel-te in Abimelech sih a muh ciangin inn ah a ciah uh hi.

⁵⁶Abimelech in a sanggam pasal sawm sagih that in a pa tungah a gitlohna hangin Pasian in hih bangin a thuk ahi hi.

⁵⁷Pasian in Shechem mite zong a gitlohna khempeuh uh a thuk hi. Jerub-Baal’ tapa Jotham hamsiatna amau tungah a tu hi.