Read Zokam Kilaakna 1 Bible Online

Kilaakna 1 - Zokam bible

Kilaakna 1

¹Pasian in a sawt lo-a tung pah dingte a nasemte tungah lak dingin amah a piak Jesu Christ kilaakna ahi hi. Amah in ama vansawltakte sawlin ama nasem John tungah theisak a,

²John in Pasian thu le Jesu Christ thu teci panna a muh khempeuh teci a pang hi.

³Hih genkholhna thute a sim mi thupha ngah hi-a, a sunga kigelhte za-a, a lungtanga a kemte thupha ngah ahi hi; bang hang hiam cih leh a hun hong nai ta hi.

⁴John in, Asia gama pawlpi sagihte tungah: Tu laitaka om, a omsa le hong pai ding pa le ama kumpi tokhom mai-a kha a[1] sagihte pan,

⁵le a muanhuai teci pa, misi pana a suak masa pen, le leitung kumpite a ukpa, Jesu Christ tung panin hehpihna le lemna no tungah om ta hen. Eite hong it a, ama sisan hanga i mawhnate pan hong suaktasak,

⁶ama Pasian le Pa nasem dinga kumpi-gam le siampi hong hisak ama tungah minthanna le vangliatna a tawntungin om den ta hen! Amen.

⁷En un, meiipi tawh amah hong pai hi, mit khempeuh in amah mu dinga amah a sunlette nangawn in a mu ding uh hi; leitung a mite khempeuh ama hangin thum ding uh hi. Tua bang hi takpi ding hi! Amen.

⁸Topa Pasian in, "Keimah, Alpha le Omega, tu laitak a om, a omsa le hong pai ding pa, Thahatpen ka hi hi," a ci hi.

⁹Jesu sunga eite tanh thuakna, kumpi-gam le sikdotaka na thuakpih pa uh, na sanggampa uh le na pawlpa uh keimah John, Pasian thu hang le Jesu thu teci panna hangin Patmos tuikulh ah ka om hi.

¹⁰Topa’ Ni-in Kha sungah ka om hi, ka nunglam ah pengkul bangin aw ngaih mahmah khat ka za a:

¹¹"Na muh teng laizial tung khatah gelh inla pawlpi sagih: Ephesus, Smyrna, Pergamum, Thyatira, Sardis, Philadelphia le Laodicea-te tungah khak in," hong ci hi.

¹²Tua kei hong hopih aw en dingin ka kihei hi. Ka kihei khit ciangin kham meivak tunna sagihte ka mu-a,

¹³tua meivak tunnate lakah "mihing tapa tawh kibang khat" a[2] a khepek ciang a bansuk puantualpi khat silhin a awm ah kham awmgak a gak mi khat ka mu hi.

¹⁴A lu le a samte samul bangin ngo in, vuk bangin pak a, a mitte meikuanglai bang hi.

¹⁵A khepekte pummei sunga sumsan hal-am tawh kibang a, a aw tuizeupi ging tawh kibang hi.

¹⁶A taklam khutah aksi sagihte tawi-a, a kam panin a langniha hiam tuak namsau khat hong dawkkhia hi. A maitang, ni a tan pen laitak tawh kibang hi.

¹⁷Amah ka muh ciangin a khephung ah a si bangin ka puk hi. Tua ciangin aman a taklam khut ka tungah nga a: "Lau kei in, keimah, a Masa pen le a Nunung pen ka hi hi.

¹⁸Keimah a Nungta Pa ka hi hi. Ka si zo a, en in a tawntungin ka nungta den hi! Keimah in sihna leh Gawtmun tawhtangte zong ka tawi hi.

¹⁹"Tua ahi manin na muhsate, tu laitak a om le tu nung cianga hong om dingte gelh in.

²⁰Ka taklam a na muh aksi sagihte le kham meivak sagihte’ thuthuk hih ahi hi: Aksi sagihte pen pawlpi sagihte’ a kem vansawltakte b[3] hi-a, meivak tunna sagihte pen pawlpi sagihte ahi hi.