Read Zokam Kilaakna 11 Bible Online

Kilaakna 11 - Zokam bible

Kilaakna 11

¹Tehna ciang tawh kibang pumpeng khat kei hong kipia a, "Pai inla Pasian biakinnpi le biakna-tau tehin, tua lai-a om a biate sim in.

²Ahi hangin a tual puanung pen Gentile-te tunga kipiasa ahi manin teh lohin nusia in. Amaute in tua khuapi siangtho kha 42 sung a tuancil ding uh hi.

³Ka teci nihte vangliatna ka pia dinga, amaute in ippi puan silhin, ni 1,260 sung gen kholhna a gen ding uh hi," ci-in hong kigen hi.

⁴Hihte, leitung Topa mai-a a ding olive kung nihte le meivak tunna nihte ahi hi.

⁵Mi khatpeuh in tuate natsak a sawm leh amaute kam panun meikuang pusuakkhia-in a galte uh valhtum hi. Hih in amaute a nasak nuam peuhpeuh sih pelmawh nading zia ahi hi.

⁶Hih mite in amaute thugenkholh hun sung teng guah a zuk loh nadingin van khakcip theih nading vangliatna a nei uh hi. Tua banah amaute in tui sisan suaksak theihna le amaute deih hunhun-a pulpi tawh leitung a thuaksak theih nading uh vangliatna a nei uh hi.

⁷Amaute in a teci panna uh a man khit uh ciangin Kawhawmpi pana hong paito gamsa in amaute do ding a, zo-in a that ding hi.

⁸Amaute luang, a Topa uh zong a kilhlupna mun Sodom le Egypt ci-a tehpih a kinei khuapi lian sung, lam lian lai-ah a lum ding hi.

⁹Ni thum le alang sung mite, beh, pau le minam khempeuh pana mite in tua misi luangte vuisak loin a enen ding uh hi.

¹⁰Hih kamsang nihte in leitunga teng mite thuaksiasak ngei zo uh ahi manin leitung a teng mite kigual zosakin ai ding uh a, khat le khat letsong a kipia ding uh hi.

¹¹Ahi hangin ni thum le ni lang sungin amaute sungah Pasian tung pana nuntakna huu lutin, a khe un ding ding uh a, amaute lau mahmah ding uh hi.

¹²Tua ciangin amaute in vantung panin, "Hih lai ah hong paito un," a ci aw khat a za uh hi. A galte un amaute a et zuizui lai mah un meii kawm lakah a paito uh hi.

¹³Tua laitak tektekin zin nakpi-in linga, khuapi seh sawm suah seh khat a kicim hi. Tua zinling ah mi tul sagih si-a, a nungta lai mite lau lua mahmah in van a Pasian a minthangsak uh hi.

¹⁴Gimna a nihna bei khin zo-a, gimna thumna a tung pah ding hi.

¹⁵Vansawltak a sagihna in a pengkul muta, vantung ah aw ngaih mahmah in: "Leitung gam teng i Topa gam le ama Christ gam suak zo a, amah in a tawntung in uk den ding hi,"a ci hi.

¹⁶Tua ciangin Pasian mai-a amau kumpi tokhoma tu upa sawmnih le lite in bokin bia uh a:

¹⁷"A om densa, tu laitaka om, Thahatpen Topa Pasian aw, a lian mahmah na vangliatna na la zo a, gam uk dingin kipan khin na himanin nang tungah lungdamna kong puak uh hi.

¹⁸Minamte heh uh a; na thangpaihna hong tung zo hi. Misite tunga thukhen ding hun le na nasem kamsangte, na min a zahtak na misiangte aneu alian - in pahtakman piak ding hun le leitung a susiate suksiat ding hun, hong tung zo hi,"a ci uh hi.

¹⁹Tua ciangin vantunga Pasian biakinnpi kihong a, ama biakinnpi sungah ama thukhun singkuangpi kimu hi. Tua mun ah kek kia in khua phia zalzala, van ging damdam in zin linga, gialpi a kia hi.