Read Zokam Kilaakna 12 Bible Online

Kilaakna 12 - Zokam bible

Kilaakna 12

¹Vantungah a lian a lamdang limte kilang a: numei khat in ni silhin a khepek nuai-ah khapi sik-a, aksi sawm le nih lukhu in a nei hi.

²Amah a gai hi-a, nau suak dektak bangin nasa-in a kiko hi.

³Tua ciangin vantung ah lim lamdang khat kilang a: agol pha mahmah gulpi-sikhiam san khat in, lutang sagih nei-a, ki sawm nei-in, a lutungah kumpi lukhu sagih a khu hi.

⁴A mei in aksite seh thum suah seh khat van pan vatkhia a, tuate lei ah a kia hi. A suak dektak numei mai-ah a suah pheta, a ta a nawmvalh theih pah nadingin gulpi-sikhiam a ding hi.

⁵Numei in minam khempeuh sikciang tawh a uk ding tapa pasalno khat a nei hi. A ta kibawhpah in Pasian kianga kumpi tokhom ah kikoihto pah hi.

⁶A numei pen Pasian in ama adinga a bawlsaksa gamlak ah ni 1,260 kikem dingin a tai hi.

⁷Tua ciangin vantung ah gal kidona a om hi. Michael le a vansawltakte in tua gulpi-sikhiam do uh a, gulpi-sikhiam le a vansawltakte in a do thuk uh hi.

⁸Ahi hangin a do zo dingin thakhauh lo ahi manin vantunga a mun uh a tan uh hi.

⁹Gulpi-sikhiam kilawnsuk a - tua dawimangpa ahikeh Satan kici leitung buppi lampialsakpa tua tanglai gulpi ahi hi. Amah ama vansawltakte tawh lei-ah kilawnkhia suk hi.

¹⁰Tua ciangin vantung ah aw ngaih taka kiko khat ka za a: "Tu-in eite Pasian hotkhiatna, a vangliatna, a gam le ama Christ thuneihna hong tung zo hi. Ahang in, eite Pasian mai-ah sun le zanin i sanggamte ngawhin a mawhsakpa kilawnkhia zo hi.

¹¹Amaute in, Tuuno sisan hang le amaute teci panna thu hangin amah a zo uh hi; amaute in sihna thuak ngam zahin a nuntakna uh a it kei uh hi.

¹²Tua ahi manin no vantungte le tuate sunga tengte khempeuh aw, nuam un! Ahi hangin leitung le tuipi aw, nang tungah dawimangpa hong tuaksuk zo ahi manin gimna nak thuak na nicia! Amah in ama hun a tom lam thei ahi manin, lungsona tawh kidim hi,"a ci hi.

¹³Gulpi-sikhiam in amah leitung ah kilawnkhia ahilam a theih ciangin, tua tapa nei numei a delh hi.

¹⁴Tua numei gulpi phak zawh lohna gam ah, hun khat, hunte le hun khat lang a kikep nadinga kibawlsa mun ah a len theih nadingin a lian mahmah muvanlai kha nihte kipia hi.

¹⁵Tua ciangin gulpi in, tua numei pha-a tuizeupi taisak dingin a kam panin gun bangin tui a phitkhia hi.

¹⁶Ahi hangin leitung in tua numei huh a, gulpi-sikhiam in a kam pana a phitkhiat gun, a kamka in a na valhtum hi.

¹⁷Tua ciangin tua numei tungah gulpi-sikhiam thangpai a, Pasian thupiak mangin, Jesu teci panna a len a om lai tua numei tate sim dingin a kuankhia hi.