Read Zokam Kilaakna 13 Bible Online

Kilaakna 13 - Zokam bible

Kilaakna 13

¹Tua ciangin gulpi-sikhiam a[16] tuipi gei sehtak tungah a ding hi. Tua ciangin tuipi pana pusuakkhia gamsa khat ka mu hi. Amah in ki sawm, lutang sagih, a ki tungah kumpi lukhu sawm, a lutunga Pasian gendaina min a tuang ciat a nei hi.

²Ka muh gamsa pen kamkei tawh kisun-a, ahi hangin a khepekte vompi aa tawh kibangin, a kam, humpinelkai kam a bang hi. Gulpi-sikhiam in ama vang liatna, a kumpi tokhom le a lian a thuneihna tua gamsa a pia hi.

³Tua gamsate lutangte khat ah sihna khop zah liamma nei a, ahi hangin tua liamma a dam ta hi. Leitung bup in lamdang sa in tua gamsa a zui uh hi.

⁴Gulpi-sikhiam in tua gamsa tungah thu-neihna pia ahi manin mite in gulpi-sikhiam a bia uh hi. Amaute in tua gamsa zong bia uh a, "Tua gamsa bang kua om hiam? Amah kua in langdo thei ding hiam?" a ci uh hi.

⁵Tua gamsa tungah a kiphatsakna kam pau nading le gendai nading kam khat kipia-a, a thuneihna a zat hun ding kha sawmli le nih sung kipia hi.

⁶Amah in Pasian gendai ding, a min, a tenna mun le vantung a tengte gendaina-in a kam a ka hi.

⁷Amah in, misiangte doin a zawh nading vangliatna kipia hi. Ama tungah beh peuhmah, mite, paute le minamte tunga thuneihna kipia lai hi.

⁸Leitung kipiansaka kipan a kigosa Tuuno nuntakna laibu sunga a min a kigelh lote khempeuh - leitunga a tengte khempeuh in tua gamsa bia ding uh hi. b[17]

⁹Bil nei peuh in za ta hen.

¹⁰Mi khatpeuh saltaang ding ahileh sal taang ding hi. Mi khatpeuh namsau a thah ding ahileh namsau in kithat c[18] ding hi. Hih in misiangte lungduai-a thuakna le muanhuaina a kal hi.

¹¹Tua ciangin lei pana pusuakkhia gamsa adang khat ka mu hi. Tua in tuuno bangin ki nih nei-a, ahi hangin gulpi-sikhiam bangin a pau hi.

¹²Amah in a masa gamsa tangin ama thuneihna khempeuh zanga, leitung le a sunga tengte, tua sihna khopa liamma a nei a damsa gamsa masa pen a biasak hi.

¹³Amah in alian a lamdang limte bawla, mi khempeuh muhin vantung pan lei-ah mei nangawn a kiasak hi.

¹⁴Tua limte hangin a masa gamsa tangin vangliatna kipia-a, leitunga tengte a khem hi. Amah in amaute tungah namsau ma tawh liam napi-a, a nungta lai gamsa pahtawina milim khat a bawl ding uh thu a pia hi.

¹⁵Tua a masa gamsa lim tungah huu kipia a, pau thei-in tua milim a bia nuam lote a thah theih nadingin ama tungah vang liatna kipia hi.

¹⁶Amah in mi khempeuh, aneu alian, azawng ahau, sila le sila lote in a taklam khut ahikeh a taltang ah thatang hatthu-in ciamtehna a neisak hi.

¹⁷Tua ciamtehna, gamsa min ahikeh a min nambat ahi ciamtehna a nei lote in lei thei loin, zuak thei lo ding uh hi.

¹⁸Hih in pilna a kal hi. Tua in mihing nambat ahi manin, theihna a nei peuh in tua gamsa nambat tuat ta hen. Ama nambat 666 ahi hi.