Read Zokam Kilaakna 14 Bible Online

Kilaakna 14 - Zokam bible

Kilaakna 14

¹Tua ciangin ka et leh ka mai ah a taltang tung-ua ama min le a Pa min a kigelhsa 144,000-te tawh Zion Vum tunga ding Tuuno a na om hi.

²Tua ciangin vantung pan a ngaih mahmah kekbaak kia ging le tuizeu hawk tawh a kibang aw khat ka za hi. Ka zak aw pen harp tumte tumging tawh kibang hi.

³Amaute in kumpi tokhom mai le a nungta ganhing lite le upate mai-ah lathak khat a sa uh hi. Lei pana kitankhiasa tua 144,000-te longal kuamah in tua la a sin thei kei hi.

⁴Hihte in amau le amau a sianga a kikep manun, amau le amau numei tawh a kibuahsak lote ahi uh hi. Amaute in Tuuno paina peuhpeuh ah a zui uh hi. Amaute, mite lak pana kileisa hi uh a, Pasian le Tuuno tungah gahmasa banga piakte ahi uh hi.

⁵Amaute kam panin zuauthu kimu loin kawk baang lo uh hi.

⁶Tua khit ciangin vansawltak dang khat van kimlai-a leng ka mu-a amah in, minam khempeuh, beh khempeuh, pau khempeuh le mi khempeuh tunga tangko ding, tawntung lungdamna-thu a nei hi.

⁷Amah in, "Ama thukhen ding hun hong tung zo ahi manin Pasian kihta unla, amah minthanna pia ta un. Vantungte, leitung, tuipi le tuinakte a bawlpa amah bia un," ci-in aw ngaihtakin a gen hi.

⁸Vansawltak a nihna in a nung zui-a, "A angkawmnate, a haisakna leng gahzu minamte khempeuh a dawnsaknu puk ta! A Lian Babylon puk ta!" a ci hi.

⁹Vansawltak a thumna in amaute nung zui-a, aw ngaihtakin, "Mi khatpeuh in gamsa le ama lim bia a, ama ciam tehna a taltang tung ahikeh a khut tungah a ngah leh

¹⁰amah in zong Pasian thangpaihna hai sunga kisungsa a lungsona a khauh mahmah lenggahzu a dawn ding hi. Amah a siangtho van sawltakte le Tuuno mai-ah kaat kuang tawh kigawt ding hi.

¹¹Amaute kigawtna meikhu a tawntungin khu den hi. Tua lai-ah gamsa le a lim a biate, ahikeh ama min ciamtehna a ngah peuhmah asun azan tawlngak hun a om kei hi," a ci hi.

¹²Hih in Pasian thupiakte a mangte le Jesu tunga a muanhuai lai misiangte lungduai-a thuakna a kal hi.

¹³Tua ciangin vantung panin aw, khat in, "Gelh in: Tu-a kipan Topa sunga site thupha ngah ahi hi," a ci hi. Kha in, "Hihi, a sepnate un, amaute zui ding ahi manin, amau nasep gimna pan a tawlnga ta ding uh hi," a cih ka za hi.

¹⁴Ka et leh ka mai-ah meiipi kang khat na kaii-a, meiipi tunga tupa "mihing tapa banga" a[19] a lutung ah kham lukhu khat khu-in a khut ah phiaukawi hiam khat a tawi hi.

¹⁵Tua ciangin biakinnpi sung pan vansawltak dang khat hong paikhia in, meiipi tunga tupa nakpi in sama, "Leitunga ante min khin ta ahi manin, an lak hun tung zo hi, na phiaukawi la inla at in," a ci hi.

¹⁶Tua ciangin tua meiipi tunga tupa in, a phiaukawi leitung ah van kawikawi a, leitung an laksa a suak hi.

¹⁷Vantung a biakinnpi sung pan vansawltak adang khat hong paikhia a, amah in zong phiaukawi hiam khat mah a tawi hi.

¹⁸Mei a uk vansawltak dang khat biakna-tau panin hong paikhia lai-a, phiaukawi hiam tawipa nakpi in sama, "Lenggahte min khin ahi manin na phiaukawi hiam la inla, leitung lenggah gui panin lenggah bawkte khawm in," a ci hi.

¹⁹Tua vansawltak in leitung ah phiaukawi van kawikawi-a, lenggahte khawmin Pasian thangpaihna lenggah suknapi sungah a lawn hi.

²⁰Amaute khuapi pua-a lenggah-sukna sungah kicil-a, tua lenggah-sukna pan sisan luangin stadia b[20] 1,600 gamla dong sakol kamkaih ciang banin a luangkhia hi.