Read Zokam Kilaakna 15 Bible Online

Kilaakna 15 - Zokam bible

Kilaakna 15

¹Vantung ah alian a piandang lim khat ka mu a: vansawltak sagih in a nunung gimna sagihte a tawi uh hi - a nunung ahi hi; bang hang hiam cih leh Pasian thangpaihna a kimna hi ta hi.

²Limlang tuipi le mei kigawm tawh kibang khat le gamsa le ama min le ama min nambat tunga gualzote, tuipi kianga ding ka mu hi. Amaute in Pasian piak harpte tawi uh a,

³Tuuno la le Pasian nasem Moses la sa in: "Thahatpen Topa Pasian, nangma nasepte lian in, piandang hi. Khanghunte kumpipa aw, na lampite thumaanin thutang hi.

⁴Topa aw, kua’n nang hong kihta loin, na min thangsak lo ding hiam? Ahang in, nangmah bek na siangtho hi. Amaan nangma sepnate, kilaak khin zo ahi manin, minam khempeuh hong pai-in, na mai-ah hong bia ding uh hi," a ci uh hi.

⁵Hih teng khit ciangin ka et leh, vantungah teci panna biakbuk ahi, biakinnpi honsa in a om hi.

⁶Vansawltak sagihte biakinnpi pua-ah gimna sagih tawh hong paikhia uh hi. Amaute in puansiang le a tang saihadial puan silh uh a, a awm uhah kham dialpek a baat uh hi.

⁷Tua ciangin a nungta ganhing lite khat in, vansawltak sagihte tungah a tawntunga nungta den pa, Pasian thangpaihna tawh a dim kham kuangkum sagih a pia hi.

⁸Tua ciangin Pasian minthanna le ama vangliatna pana meikhu, biakinnpi sung tengah dim a, gimna sagihte a kim khit matengin vansawltak sagihte tua biakinnpi ah khatbeek a lut thei kei uh hi.