Read Zokam Kilaakna 16 Bible Online

Kilaakna 16 - Zokam bible

Kilaakna 16

¹Tua ciangin biakinnpi pan vansawltak sagihte tungah, "Pai unla Pasian thangpaihna kuangkum sagihte leitung ah sung ta un," a ci aw ngaih khat ka za hi.

²A masa pen vansawltak pai-in leitang tungah a kuangkum sunga, gamsa ciamtehna a nei le ama lim a bia mite tungah a cikziathuai a na mahmah meimate a tung hi.

³Vansawltak a nihna in tuipi tungah a kuangkum sunga, misite’ sisan tawh kibangin, tuipi sunga nuntakna a nei na khempeuh a si hi.

⁴Vansawltak a thumna in, gunte le tuinakte tungah a kuangkum sunga, tuate sisan a suak hi.

⁵Tua ciangin tuite a uk vansawltak in: "Nang, tu laitaka om, a om densa, a Siangtho Pa aw, hih banga thu khen na hi manin na thukhennate ah na thutang hi;

⁶Ahang in, amaute in na misiangte le na kamsangte sisan luangsak zo uh a, amaute thuak dinga kilawm bangin amau dawn ding sisan na pia zo hi," a ci hi.

⁷Tuateh biakna-tau in na dawnga: "Hihi, a Thahatpen Topa Pasian aw, na thukhennate thumaanin thutang hi," a cih ka za hi.

⁸Vansawltak a lina in ni tungah a kuangkum sunga, mite mei tawh haldulh nading, ni tungah vangliatna kipia hi.

⁹Amaute a sa mahmahin kihal-a, amaute in hih gimnate a uk Pasian min samsia uh a, ahi hangin kisik nuam loin amah a minthansak ding a nial uh hi.

¹⁰Vansawltak a ngana in gamsa kumpi tokhom tungah a kuangkum sunga, ama gam teng khuamial in a tuamcip hi. Mite in na sa lua-in a leii uh cip tentan uh a,

¹¹a meimate uh na a sak manun vantunga Pasian a hamsiat uh hi; ahi hangin a hihnasate uh hangin a kisik nuam kei uh hi.

¹²Vansawltak a gukna in, Euphrates gun lianpi tungah a kuangkum sung a, Nisuahna pana kumpite lampi sial dingin tua tui a kang hi.

¹³Tua ciangin ukeng tawh a kibang kha gilo a[21] thum ka mu hi. Amaute, gulpi-sikhiam kam pan, gamsa kam pan le kamsang-zuau kam sung pana pusuakkhiate ahi uh hi.

¹⁴Amaute, a lamdang limte a lak thei dawite kha hi uh a, leitung bupa kumpite kiangah pai-in, Thahatpen Pasian ni lian ni-a galdo dingin amaute a kaikhawm dinga kuan khia uh ahi hi.

¹⁵"Ngai in, guta bangin kong pai hi! Amah guaktang le zumhuaitakin pholaka a om loh theih nadingin hak gige sa-in puansilh-a om pa thupha ngah ahi hi."

¹⁶Tua ciangin amaute in Hebrew pau a Armageddon a cihna munah kumpite a khawm uh hi.

¹⁷Vansawltak a sagihna in huih lakah a kuangkum sunga, kumpi tokhom panin, aw ngaih mahmah khat in biakinnpi pualam ah, "Kizo ta hi!" a ci hi.

¹⁸Tua ciangin tua munah kek kia in, khua phia zalzal a, van ging damdam in nakpi-in zin a ling hi. Tua zinling nasia lua mahmah a, leitung a mi a om nungsang tua banga zinling a om ngei nai kei hi.

¹⁹Tua khuapi lian phel thumin kiphelkhap a, minamte khuapite a kicim hi. Pasian in a Lian Babylon phawk gige a, ama lungsona lenggahzu tawh a dim ama thangpaihna hai a pia hi.

²⁰Tuikulh peuhmah mangthang a mualpite a kimu zo nawn kei hi.

²¹Van panin mite tungah a lian mahmah gialtangte, tang khat pound za khat bang a gik a kia hi. Tua ciangin tua gimna lauhuai lua mahmah ahi manin gial gimna hangin amaute in Pasian a samsia uh hi.