Read Zokam Kilaakna 17 Bible Online

Kilaakna 17 - Zokam bible

Kilaakna 17

¹Kuangkum sagih a tawi vansawltak sagihte laka khat hong pai-in ka kiangah, "Hong pai in, tui tampi tunga tu a lian numei kizuaknu gawtna kong lak ding hi.

²Leitung kumpite in amah tawh angkawm uh a, leitunga tengte in ama angkawmna zu a kham uh hi," hong ci hi.

³Tua khit ciangin vansawltak in Kha-in kei gamlakah hong puamang hi. Tua lai-ah lu sagih le ki sawm nei a, gendaina minte in a pumtuam a dupsan gamsa tungah numei khat a tu ka mu hi.

⁴Tua numei in adupsan le a-ausan puante silh-a kham, suang manpha, le kep manphate tawh kizemin a tee siasua hi. Tuanu in a kihhuai nate le a angkawmna nin tawh a kidim kham hai khat a khut sungah a tawi hi.

⁵A taltang ah: THUTHUK ALIAN BABYLON NUMEI KIZUAKTE LE LEITUNG KIHHUAINATE’ NU ci-in a min kigelh hi.

⁶Tua numei in, misiangte le Jesu thu teci a pang mite sisan khamgawp-a om ka mu hi. Tuanu ka muh ciangin lamdang ka sa lua mahmah hi.

⁷Tua ciangin tua vansawltak in ka kiangah, "Bang dinga lamdang sa lua na hiam? Tua numei le lu sagih le ki sawm a nei ama tuanna gamsa, a thuthuk kong hilhcian ding hi.

⁸Khat vei lai-a na muhsa tua gamsa, tu-in a om nawn kei hi. Kawhawmpi sung pan hong pusuakkhia-in ama kisiatna ah a pai ding hi. Lei kipiansak cila kipan, nuntakna laibu sunga a min kigelh nai lo leitunga teng mi khempeuh in, tua gamsa a muh uh ciangin, khat vei a om khin, tu-in om nawn lo napi hong pai ding ahi manin lamdang a sa mahmah ding uh hi.

⁹"Hih thu in lungsim pilna a kal hi. Lutang sagihte in numeinu tutna mual sagihte ahi hi. Amaute kumpi sagihte zong ahi uh hi.

¹⁰Nga puk zo a, khat a om laitak hi-in, adang khat a om nai kei hi; ahi hangin hong pai ciangin tawm vei sung bek a om ding hi.

¹¹Khat vei a omsa tu-a om lo gamsa pen, kumpi a giatna ahi hi. Amah tua sagihte aa ahi manin a kisia ding hi.

¹²"Na muh ki sawmte, kumpi gam a ngah nai lo kumpi sawmte hi-a, ahi hangin amaute tua gamsa tawh nai khat sung kumpi banga thuneihna a ngah dingte ahi uh hi.

¹³Amaute in ngimnasa khat nei uh a, a vangliatna uh le a thuneihnate uh gamsa tungah a pia ding uh hi.

¹⁴Amaute in Tuuno va do ding uh hi, ahi hangin kumpite’ Kumpipa le tote’ Topa tua Tuuno in amaute zo dinga, a sapsa a teelsa le a muanhuai ama nungzuite tawh a omkhawm ding uh hi," hong ci hi.

¹⁵Tua ciangin vansawltak in, "Tua na muh numei kizuaknu tutna tui pen, mite, mihonpite, minamte le kampaute ahi hi.

¹⁶Tua na muh gamsa le ki sawmte in tua numei kizuaknu a mudah ding uh hi. Amaute in tuanu a siatsak khit uh ciangin, a guaktangin nusia ding uh a, a sa ne in mei-in a hal ding uh hi.

¹⁷Ahang in, Pasian kammalte a tangtun masiah amaute vangliatna tua gamsa tungah a uk dingin a piak ding uh thukimna tawh Pasian in ama ngimna a zawhsiang nading amau lungtang sungah koih khin zo hi.

¹⁸Tua na muh numei in leitunga kumpite a uk khuapi lian ahi hi," ci-in hong gen hi.