Read Zokam Kilaakna 18 Bible Online

Kilaakna 18 - Zokam bible

Kilaakna 18

¹Hih teng khit ciangin vansawltak adang khat, vantung pan hong paisuk ka mu hi. Amah in thuneihna lianpi nei-a, a thupina in leitung a tangsak hi.

²Amah in nakpi takin: "Puk ta! A Lian Babylon puk ta! Tuanu dawite kua suaka, kha gilote a[22] le a nin, a huathuai vasate zualna mun, suak zo hi.

³Ahang in, minamte khempeuh in a angkawmnate-a mi a haisak zu dawnin kham ta uh hi. Leitung kumpite in amah tawh angkawm uh a, leitung sumbawlte in ama noptatluatna a hauhlawh uh hi," a ci hi.

⁴Tua ciangin vantung panin aw dang khat in: "Ka mite aw, ama mawhnate ah na kihel khak loh nadingun, ama gimnate na thuak khak loh nadingun tuanu sung pan hong paikhia un;

⁵ahang in, a mawhnate, van banin kicianga, Pasian in a gamtat khialhnate ciamteh zo hi,

⁶Ama piaksa bangin amah pia kik un; ama hihsa zah nih amah pia kik un. Ama hai pan mah in a zah nih leihbeh un.

⁷Noptatna le minthanna amah le amah a kipiak zahzah, gawtna le dahna amah pia un. A lungtang ah amah kisathei a, ‘Kumpinu-in ka tu hi; meigong ka hi kei a, ka thum ngei kei ding hi,’ ci hi.

⁸Tua ahi manin ni khat sungin ama gimnate ahi: sihna, thumna le kialpi-te in tuanu a khuplet ding hi. Ama tunga thukhen Topa Pasian thahat ahi manin tuanu, mei-ah kikhultum ding hi.

⁹"Amah tawh angkawm-a, ama nop tatna a zangkhawm leitung kumpite in tuanu kihalna meikhu a muh uh ciangin amah kah in a thum ding uh hi.

¹⁰Ama thuaksiatna kihta in a gamlapi ah ding ding uh a: "‘Gimna! Gimna! O khuapi lian, O vangliatna khuapi Babylon! Nai khat sungin na siatna hong tung veh!’ci-in kap ding uh hi.

¹¹"Leitung sumbawlte kapin a thum ding uh hi. Bang hang hiam cih leh amau sumbuk van:

¹²kham, ngun, suang manpha le kep manphate; saihadial hoih, a-ausan, nai le a dupsan puante, sing namtui namkim le saiha tawh kibawl na namkim, sing manpha, sumngo, sik le suangngo;

¹³sumbuk van, singzungthak, masala, gim namtui paknamtui khaa le sathau namtui, lenggahzu le olive thau, annel limci le mangbuh; ganhon le tuuhon; sakolte le lengte le mihingte pumpite le khate, kuamah in a lei nawn kei hi.

¹⁴"Amaute in, ‘Na lunggulh mahmah gah in nang hong nusia ta hi. Na hauhna le na thupina khempeuh in mual khum-a, a kimu kik nawn kei ding hi,’ ci ding uh hi.

¹⁵Tuanu tungah hih nate zuaka, a hauhna uh a ngah sumbawlte, ama thuaksiatna kihta in a gamla pekah a ding ding uh hi. Amaute thumin kap ding uh a:

¹⁶"‘Gimna! Gimna, O khuapi lian, saihadial hoih, a-ausan le adupsan tawh kizem a, kham, suang manpha le kep manpha tawh a tee siasua!

¹⁷Nai khat sungin tua bang hauhna lianpi kisia tazen maw!’ ci-in a kapkhia ding uh hi. "Tembaw ukte khempeuh, tembaw-a khualzinte khempeuh, tembaw nasemte le tuipi pana kivak nading a zongte khempeuh a gamlapi pekah a ding ding uh hi.

¹⁸Tuanu a katna meikhu a muh uh ciangin amaute in, ‘Hih khuapi lian bang, khuapi om ngei hiam?’ cikhia ding uh hi.

¹⁹Amaute in a lutung uhah leivui lawn ding uh a, thumin kapin: "‘Gimna! Gimna, O khuapi lian, tuipi tunga tembaw nei khempeuh in a hauh lawh! Tuanu hauhna nai khat sungin kisia zo tah!

²⁰Vantung aw, ama hangin nuam in! Misiangte, sawltakpite le kamsangte aw, nuam un! Amah in note hong bawlsiatna hangin Pasian in ama tungah thu khen zo hi,’ ci ding uh hi," a ci hi.

²¹Tua ciangin a thahat vansawltak khat in an gawina suang lian cia a pha suangmai khat tawma tuipi sungah lawn in: "Babylon khuapi lian hih bangin ngong bawlin kisusia dinga, a kimu kik nawn kei ding hi.

²²Harp tumte le lasiamte, tamngai mutte le pengkul mutte awging nang sungah kiza kik ngei nawn lo ding hi. Nang sungah khutsiam kuamah kimu kik ngei nawn lo ding hi. Nang sungah angawina suang ging a kiza kik ngei nawn kei ding hi.

²³Nang sungah meivak khat zong kivak kik ngei nawn lo ding hi. Nang sungah mopipa le mo aw kiza kik ngei nawn lo ding hi. Na sumbawlte, leitung miliante vive ahi hi. Nang bumna in leitung minam khempeuh lam pialsak khin hi

²⁴Ama sungah kamsangte, misiangte le leitang tunga kithatsate khempeuh sisan kimu zo hi," a ci hi.