Read Zokam Kilaakna 2 Bible Online

Kilaakna 2 - Zokam bible

Kilaakna 2

¹"Ephesus a pawlpi vansawltak c[4] tungah gelh in: Hihte in a khut taklam-a aksi sagihte tawi-a, kham meivak tunna sagih laka a vakpa kammal ahi hi:

²Na nasepte na hahkatna le na sikdonate ka thei hi. A tatkhel mite na thuak thei kei-a a hi lopi sawltakpi banga kibawlte na sittel a, amaute a zuau ahilam na mu cih ka thei hi.

³Na sikdo a, ka min hangin haksatna na thuaka na cimtak kei hi.

⁴Tua hi napi kong mawhsakna om veve hi: Na itna masa pen na nusia hi.

⁵Na kiatna a sannazia phawk in! Kisik inla na hih masak nate hih kik in. Na kisik kei leh na kiangah kong pai dinga, na meivak tunna a omna pan ka khinkhia ding hi.

⁶Ahi hangin na pahtakhuaina khat a om hi: Kei zong ka muhdah Nicolas pawlte gamtatna, na mudah hi.

⁷Pawlpite tunga Kha thugen bil nei peuh in za ta hen. A gualzo pa tungah Pasian paradise-a om nuntakna singkung pan a nek theih nading thu ka pia ding hi.

⁸"Smyrna a pawlpi vansawltak tungah gelh in: Hihte, a Masa pen le a Nunung pen, si-a a nungta kik pa kammalte ahi hi.

⁹Na zawnna le na thuaksiat nate ka thei hi; tua hi napi na hau hi! Hi lo napi Jew mi a kici mi gensiate ahi hanga lah Satan synagogue a hite ka thei hi.

¹⁰Na thuak dingte kihta kei in. Nang hong zia-et dingin dawimangpa in kimkhat thong sungah hong khum dinga, ni sawm sung bawlsiatna na thuak ding uh kong hilh hi. Sih dongin muanhuai un, tua hileh nuntakna lukhu kong pia ding hi.

¹¹Pawlpite tunga Kha thugen bil nei peuh in za ta hen. A gualzo mi, a nihna sihna in a nasak kei ding hi.

¹²"Pergamum a pawlpi vansawltak tungah gelh in: Hihte in a langnih-a, hiam tuak namsau nei pa kammalte ahi hi:

¹³Satan in a tokhom a koihna mun - na tenna mun ka thei hi. Tua hi napi ka min tungah na muanhuai lai hi. Satan tenna mun na khuapi sunga ka teci muanhuai a kithatpa Antipas nite nangawnin kei nong upna na tawpsan kei hi.

¹⁴Ahi hangin kong mawhsakna tawm no a om hi: Milim thoihna ante nek ding ahi zongin numei-pasal paktat ding ahi zongin, a hih dinga Israel-te khem dingin Balak in a hilh Balaam thuhilhna a zui mi pawlkhat na nei hi.

¹⁵Tua mah tawh kibangin Nicolas pawlte thuhilhna a zuite zong na nei hi.

¹⁶Tua ahi manin kisik in! Ahi kei leh nang kiangah kong paipah dinga, ka kama namsau tawh amaute ka do ding hi.

¹⁷Pawlpite tunga Kha thugen bil nei peuh in za ta hen. A gualzopa tungah a kisel manna pawlkhat ka pia ding hi. Amah a tunga minthak om suangkang khat zong ka pia ding a, tua min a ngah pa bekin a thei ding hi.

¹⁸"Thyatira a pawlpi vansawltak tungah gelh in: Hihte, a mitte meikuanglai a bang, a khepekte sumngo nawtngilsa a bang, Pasian Tapa kammalte ahi hi:

¹⁹Na nasepte, na itna le na upna, na nasepnate le na sikdonate ka thei-a na sep masa sangin tam na semzaw hi.

²⁰Ahi zongin nang tungah hih mawh sakna kong nei hi: Amah le amah kamsang a kici numei Jezebel na thuak zo uh hi. Ama hilhna in ka nasemte, numei-pasal paktatna le milim thoihna anneknate ah a makaih khial hi.

²¹Tuanu a paktatna pan a kisik nading hun ka piak hangin a ut kei hi.

²²Tua ahi ciangin amaute tuanu gamtatnate pan a kisik kei uh leh gimthuakna lupna tungah amah lawnin ama angkawmpihte nakpitakin ka thuaksak ding hi.

²³A tate ka satlum ding hi. Tua ciangin pawlpi khempeuh in lungtang le lungsim zong a pheklekpa ka hilam hong thei ding uh a, note khempeuh na gamtatna bangun kong thuk ding hi.

²⁴Tu-in Thyatira a tuanu hilhna a zui lote le thuthuk kici Satan thusimte a sin lote tungah: (vangik dang peuhmah kong suan kei ding hi.)

²⁵Kong pai matengin na neihsa uh lenkip den un kong ci hi.

²⁶A tawp donga ka deihna ahi gualzo pa tungah minamte tunga thuneihna ka pia dinga,-

²⁷"‘Amah in amaute tungah sikciang tawh uk dinga; leibeel bangin amaute a satzan ding hi’ a[5] - tua in ka Pa tung pana thuneihna ka ngah bang tektek ahi hi.

²⁸Tua zingsol zong amah ka pia ding hi.

²⁹Pawlpite tunga Kha thugen bil nei peuh in za ta hen.