Read Zokam Kilaakna 20 Bible Online

Kilaakna 20 - Zokam bible

Kilaakna 20

¹Tua ciangin vansawltak khat vantung pana hong paikhiasuk ka mu a, amah in Kawhawmpi honna tawhtang nei-in, a khut ah sikkhainiang lianpi khat a tawi hi.

²Amah in tua tanglai gulpi, Satan ahikeh dawimangpa, gulpi-sikhiam mana, kum tulkhat sung a khih hi.

³Amah in Kawhawmpi sungah lawn a, minamte a khem nawn loh nadingin kum tulkhat a bei mateng, tawh kalh khuma, a tungah seal in a ciamteh hi. Tua hun khit ciangin amah tomkha sung a kikhahkhia pelmawh ding hi.

⁴Thukhen za a kipiasate tutna, kumpi tokhomte ka mu hi. Tua ciangin Jesu adinga teci pangte le Pasian thu teci a panna uh hanga a ngawng uh a kitante kha ka mu hi. Amaute in gamsa ahikeh a lim bia loin ama ciamtehna a tal tung ahikeh a khut tunguah a ngah kei uh hi. Amaute nungta uh a, Christ tawh kum tulkhat sung a uk uh hi.

⁵(Kum tulkhat a bei mateng a om lai mi sisate a nungta nai kei hi.) Hih in a masa thawhkikna ahi hi.

⁶A masa thawhkikna sunga kihelte a siangtho le thupha ngahte ahi uh hi. Amaute tungah sihna nihna in vangliatna a nei nawn kei hi. Ahi hangin amaute, Pasian le Christ siampite hi ding uh a, kum tulkhat sung amah tawh a uk khawm ding uh hi.

⁷Kum tulkhat a bei khit ciangin, Satan a thongkiatna pan kikhahkhia-in,

⁸leitung kiuli-a minamte khem dingin kuankhia dinga Gog le Magog kidona adingin amaute a kaikhawm ding hi. Amaute tuipi gei-a sehnel zah pha uh hi.

⁹Amaute leitung maitang dimin pai uh a, Pasian mite giahphual, a it a khuapi a umcih uh hi. Ahi hangin van panin meikuang hong tuaksuk a, amaute kangtummang hi.

¹⁰Amaute a khem tua dawimangpa gamsa le kamsang zuaute a kipaihna kaat kuang lipi sungah a kilawn hi. Amaute sun le zanin a tawntung gawtna kithuaksak den ding hi.

¹¹Tua ciangin alian akang kumpi tokhom le a tunga tupa ka mu hi. Ama mai-ah van le lei om nading mun om lo ahi manin a taimang hi.

¹²Tua ciangin misite, aneu alianin kumpi tokhom mai-a ding le laibute kilem ka mu hi. Nuntakna laibu ahi laibu dang khat a kilem hi. Misite tungah a hihsate uh laibute sunga kigelhsa tawh kizui-in thu kikhen hi.

¹³Tuipi in a sunga om misite puakkhia a, sihna le Gawtmun in amau sunga om misite puakkhia-in, mi khempeuh amau nasepna tawh kizui-in thu kikhen ciat hi.

¹⁴Tua ciangin meili sungah sihna le Gawtmun kipai hi. Tua meili sihna nihna ahi hi.

¹⁵Nuntakna laibu sunga a min kigelh lo peuhmah meili sungah kipai hi.