Read Zokam Kilaakna 21 Bible Online

Kilaakna 21 - Zokam bible

Kilaakna 21

¹Tua ciangin a masa van le a masa lei mangthang a, tuipi lah om nawn lo ahi manin van thak le lei thak ka mu hi.

²Pasian kiang vantung panin Jerusalem thak, Khuapi Siangtho, a pasal kianga mothak ding, kilawm taka kizem mo bangin hong paisuk ka mu hi.

³Kumpi tokhom panin aw ngaih mahmah khat ka za a, "Tu-in Pasian tenna mite tawh om khawm ta dinga, amah amaute tawh a teng khawm ding hi. Amaute ama mi hi ding uh a, Pasian mahmah amau tawh om khawmin, amaute Pasian hi ding hi.

⁴Amah in amaute mit-a khitui khempeuh a nulsak ding hi. Alui nate paizia mangthang zo ahi manin tua lai-ah natna, sihna, thumna, kahnate a om nawn kei ding hi," a ci hi.

⁵Kumpi tokhom tunga tupa in, "Na khempeuh athakin ka bawl hi!" a ci hi. Tua ciangin amah in, "Hih thute muan takin thumaan ahi manin gelh in," hong ci hi.

⁶Amah in kei kiangah, "Kizo ta hi! Keimah Alpha le Omega, a Patna le a Tawpna ka hi hi. A dangtak mi tungah man nei loin nuntakna tuinak panin tui ka pia ding hi.

⁷A gualzo mi in hihte khempeuh luahin, ama Pasian ka hi dinga, amah ka tapa ahi ding hi.

⁸Ahi hangin a meidawite, a umlote, a tatsiate, tualthatte, numei le pasal paktatte, mi bumte, milim biate le zuauphuakte khempeuh - amaute mun ding, kaat kuang meilipi sung hi ding hi. Hih pen sihna nihna ahi hi," hong ci hi.

⁹A nunung gimna sagihte tawh ki dim kuangkum sagihte a tawi vansawltak sagihte lakah khat ka kiangah hong pai-a, "Hong pai in, Tuuno zi ahi, mo, kong lak ding hi," hong ci hi.

¹⁰Amah in Kha-in hong puamangin alian asang mualtungah hong tuna, Pasian kiang vantung pan hong paisuk, Khuapi Siangtho, Jerusalem hong lak hi.

¹¹Pasian minthanna in tua khuapi tana, a tanphatna, a manpha mahmah suang le jaspar tawh kibangin crystal bangin a siang hi.

¹²Kulh lianpi sangpitak nei a, kongpi sawm le nih nei in, a kongpite ah vansawltak sawm le nih mah a om hi. A kongpite tungah, Israel beh sawm le nihte min kigelh hi.

¹³Nisuahna lamah kongpi thum, leilu lamah thum, leitaw lamah thum le nitumna lamah thum a om hi.

¹⁴Khuapi kulh in bulkip sawm le nih nei-a, tuate tungah Tuuno sawltakpi sawm le nihte’ min a tuang hi.

¹⁵Kei hong hopih vansawltak in tua khuapi, a kongpite le a kulhte teh nading kham kibawl tehna ciang khat a tawi hi.

¹⁶Tua khuapi pen kiu li nei, adung avai kikima kilam ahi hi. Amah in tua ciang tawh khuapi teh a, adung, avai le a sanna stadia a[24] 12,000 a pha kim hi.

¹⁷Amah in a kulh teh a, tua vansawltak in, mihing tehna banga a teh hi-a, tong b[25] 144 a sah c[26] hi.

¹⁸A kulh jaspar kiciang hi-a, a khuapi limlang siang tawh kibang kham citak ahi hi.

¹⁹Khuapi kulh bulkipte, suang man pha namkim tawh kizem hi. A khatna bulkip jaspar hi-a a nihna saphire, a thumna chalcedony, a lina emerald,

²⁰a ngana sardonyx, a gukna carnelian, a sagihna chrysolite, a giatna beryal, a kuana topaz, a sawmna chrysophrace, a sawm le khatna Jacinth, le a sawm le nihna amethyst a[27] ahi hi.

²¹Kongpi sawm le nihte kep manpha sawm le nih hi-a, kongpi khat kep manpha khata kibawl ahi hi. Tua khuapi kongzingpite kham citak hi-a, limlang paisuak a bang hi.

²²Khuapi sungah biakinnpi ka mu kei hi. Bang hang hiam cih leh Thahat pen Topa Pasian le Tuuno, a khuapi biakinnpi ahi hi.

²³Pasian minthanna in tua khuapi taana, a meivak Tuuno ahi manin ni ahi a, khapi ahi zongin a taan ding kisam lo hi.

²⁴Minamte, tua khuavak ah lam pai ding uh a, leitung kumpite in a thupinate uh a sungah a puak ding uh hi.

²⁵Tua lai-ah zan hun om ngei nawn lo ding ahi manin a kongpite kikhak ni a om ngei kei ding hi.

²⁶Minamte minthanna le pahtawinate a sungah kipuak ding hi.

²⁷Tua sungah a siang lo bangmah lut thei lo dinga, a zumhuai, zuauphuakte khatpeuh zong a lut ngei kei ding hi; ahi hangin Tuuno nuntakna laibu sunga min kigelhsate bek a lut thei ding hi.