Read Zokam Kilaakna 3 Bible Online

Kilaakna 3 - Zokam bible

Kilaakna 3

¹"Sardis a pawlpi vansawltak b[6] tungah gelh in: Hihte, Pasian kha c[7] sagihte le aksi sagihte a tawipa kammalte ahi hi: Na nasepte ka thei-a, a nungta-a na than hangin a sisa na hi hi.

²Ka Pasian mitmuh ah na nasepte a mansiangin mu nai lo ka hi manin, khanglo in! A om lai a si dekdekte thahatsak in.

³Tua ahi manin na ngahsa le na zaksate ciamteh in; a thu mang inla kisik in. Ahi hangin na khanlawh kei leh guta bangin kong pai dinga, nang kianga kong pai ding a hun na thei kei ding hi.

⁴A puansilh uh a buahsak lo, Sardis ah mi tawm no na nei lai hi. Amaute santham ahi manin puanpak silhin kei tawh a tonkhawm ding uh hi.

⁵A gualzopa in amaute tawh kibangin puanpak a silh ding hi. Nuntakna laibu panin a min ka phiat ngei kei dinga, ka Pa le ama vansawltakte mai-ah a min ka pulak zaw ding hi.

⁶Pawlpite tungah Kha thugen bil nei peuh in za ta hen.

⁷"Philadelphia a pawlpi vansawltak tungah gelh in: Hihte, a siangtho le a thumaan-pa, David tawhtang tawipa kammalte ahi hi. Ama honsa kuamah in khak thei lo a, ama khaksa kuamah in a hong thei kei hi.

⁸Na nasepte ka thei hi. En in, na mai ah kuama khak theih loh kong honsa khat ka koih hi. Thahatna tawmkha bek na neih lam ka thei hi. Tua hi napi ka thu na kembita ka min na nial kei hi.

⁹Satan synagogue ahite, Jew mi hi lo napi Jew mi a kici, ahi hanga zuauphuakte, hong paisakin na khephungah ka puksak dinga nang kong it lam ka theisak ding hi.

¹⁰Lungduaitaka thuak dingin kong thupiak na man nungsangin, leitang tunga tengte zia-et nadingin leitung bupa hong tung ding bawlsiatna hun panin, ken zong nang kong peng khiasak ding hi.

¹¹Kong paipah ding hi. Na kumpi lukhu kuamah in hong suh loh nadingin na neihsa lenkip den in.

¹²A gualzopa, ka Pasian biakinnpi sungah khuampi ka suaksak ding hi. Amah in tua a nusia ngei nawn kei ding hi. Ama tungah ka Pasian min le ka Pasian pana vantung a hong kumsuk ka Pasian khuapi, tua Jerusalem thak min ka gelh ding hi. Ama tungah ka min thak zong ka gelh ding hi.

¹³Pawlpite tunga Kha thugen bil nei peuh in za ta hen.

¹⁴"Laodicea a pawlpi vansawltak tungah gelh in: Hihte, Pasian piansakte a ukpa, a muanhuai le a thutak Amen kam malte ahi hi.

¹⁵Na nasepte ka thei hi, vot lah vot loin sa lah na sa kei hi. Khat zawsang na hi ding kong deih hi!

¹⁶Tua ahi ciangin vot lah vot lo, sa lah sa loin lum milmial na hi manin ka kam panin kong siakhia dektak hi.

¹⁷‘Ka hau a, neih le lam ka cin hi, khat beek ka sam kei hi,’ na ci hi. Ahi hangin a genthei, a hehpihhuai, azawng, a mittaw le guaktang na hilam a phawk lo na hi hi.

¹⁸Na hauh theih nadingin kei kiang panin mei-a halsiangsa kham; guaktang zumhuaina na sel nadingin na silh ding puanpak; khua na muh theih nadingin na nuh ding mitza, na lei ding kong thuhilh hi.

¹⁹Ka it mite tai-in ka sek hi. Tua ahi ciangin citak inla kisik in.

²⁰Hih lai-ah ka om hi! Kongkhak ah dingin ka kiu hi. Mi khatpeuh in ka aw za a, kongkhak hong hon leh ka lut dinga, amah tawh an nekhawm in, amah in kei tawh a nekhawm ding hi.

²¹Kei gualzo-in ka Pa tawh ama kumpi tokhom tungah ka tut bang tektek in, a gualzopa, kei tawh ka kumpi tokhom tungah a tut theih na ding thu ka pia ding hi.

²²Pawlpite tunga Kha thugen bil nei peuh in za ta hen," a ci hi.