Read Zokam Kilaakna 5 Bible Online

Kilaakna 5 - Zokam bible

Kilaakna 5

¹Tua ciangin kumpi tokhom tunga tupa taklam ah a langniha kigelh ciamtehna sagiha kiciamteh laizial khat ka mu hi.

²Tuateh a thahat vansawltak khat in, "Ciamtehna phela, laizial zal dingin kua cing ahi hiam?" ci-a ngaihtaka kitangko ka mu hi.

³Ahi hangin vantung ahi zongin, leitung ahi zongin, leinuai ahi zongin, laizial a zal gen loh a sung nangawn a en thei kuamah a om kei hi.

⁴Laizial a zal ding ahikeh a sung en dinga a cing nangawn kuamah a kimuh loh manin kah cihtakin ka kap hi.

⁵Tua ciangin tua upate khat in kei kiangah, "Kap kei in! En in, Judah beh a Humpinelkai, David Zungpi gualzo ta hi. Amah in tua laizial le a ciamtehna sagihte a hong thei hi," hong ci hi.

⁶Tua ciangin a kigosa hileh kilawm Tuuno khat, tua kumpi tokhom laizangah dinga, a nungta ganhing lite le upate in a kualkhum uh ka mu hi. Amah in ki sagih le mit sagih nei a, tuate, leitung khempeuh a kisawlkhia Pasian kha a[9] sagihte ahi hi.

⁷Amah pai-in kumpi tokhom tunga tupa taklama laizial a la hi.

⁸A lak khit ciangin tua a nungta ganhing lite le upa sawmnih le lite, Tuuno mai-ah a boksuk uh hi. Amaute in harp khat ciat nei uh a, misiangte thungetna ahi, gimnamtui tawh a dim kham kuangkumte a tawi uh hi.

⁹Amaute in lathak khat, "Nang hong kigo zo a, na sisan tawh Pasian ading mi, beh kim, pau kim, mi kim, nam kim pan lei khin zo na hi manin tua laizial la a, a ciamtehna phel dingin na kilawm hi.

¹⁰Nangmah in amaute kumpi-gam khat le kote Pasian nasem ding siampi-in na bawl khin zo a, amaute in leitung a uk ding uh hi," ci-in a sa uh hi.

¹¹Tua ciangin ka en a, vansawltak tampi, tul mun tul tampi le tulsawm mun tulsawm tampite aw ka za hi. Amaute in tua kumpi tokhom le a nungta ganhingte le upate a umcih uh hi.

¹²Amaute in, "A kigosa Tuuno, vangliatna, hauhna, pilna, hatna, pahtawina, minthanna le phatna ngah dingin kilawm hi," ci-in ngaihtakin a sa uh hi.

¹³Tua ciangin vantung, leitung, leinuai, tuipi tung le tuate sunga om a kipiang sakte khempeuh in: "Kumpi tokhom tunga tupa le Tuuno tungah phatna, pahtawina, minthanna le vangliatna a tawntungin om den ta hen!" ci-in la a sak uh ka za hi.

¹⁴A nungta ganhing lite in, "Amen," ci uh a upate in bokin a bia uh hi.