Read Zokam Kilaakna 6 Bible Online

Kilaakna 6 - Zokam bible

Kilaakna 6

¹Tuuno in ciamtehna sagihte a masa pen a hon laitak ka en hi. Tua ciangin a nungta ganhing lite khat in kek kia ging bangin, "Hong pai in!" a cih ka za hi.

²Ka en-a, ka mai-ah sakol kang khat a na om hi! A tunga tuangpa in thal khat tawi a, amah kumpi lukhu khat kipia in, gual zawh a sawm gualzopa bangin a kuan khia hi.

³Tuuno in ciamtehna nihna a hon ciangin a nungta ganhing nihna in, "Hong pai in!" a cih uh ka za hi.

⁴Tua ciangin meikuang banga san sakol khat hong pusuakkhia hi. A tunga tuangpa, leitung pan lemna lakkhiat theihna le mite khat le khat kithahsak theihna vang kipia hi. Amah namsau lianpi khat kipia hi.

⁵Tuuno in ciamtehna a thumna a hon ciangin, a nungta ganhing a thumna in, "Hong pai in!" a cih ka za hi. Ka en a, ka mai-ah sakol vom khat a na om hi! A tunga tuangpa in, tawi tehna kop khat a khutah a tawi hi.

⁶Tua ciangin a nungta ganhing lite lakah aw khat tawh a kibang khat in, "Ni khat thaman b[10] dingin mangbuh quart c[11] khat le ni khat thaman dingin mangbuh-ham quart d[12] thum hi; ahi zongin lenggahzu le sathau siasak kei in!" a cih ka za hi.

⁷Tuuno in ciamtehna lina a hon ciangin a nungta ganhing a lina in, "Hong pai in!" a cih aw ka za hi.

⁸Ka en a, ka mai-ah sakol daang khat a na om hi! A tunga tuangpa min Sihna kici hi-a, Gawtmun in a nung mahmah ah a zui hi. Amaute in leitung seh li suah seh khat, namsau, kialpi, pulpi le leitung gamsate-a a thah theih nadingin vang liatna kipia hi.

⁹Amah in ciamtehna ngana a hon ciangin, Pasian thu hang le citaka teci a pannasate uh hanga kithatte khate biakna-tau nuai-ah ka mu hi.

¹⁰Amaute in, "A siangtho le a thumaan Thuneipipen Topa aw, leitunga tengte thu na khen ding le kote sisan phu na lak ma bang tan sawt lai ding hiam?" ci-in nakpi in a kiko uh hi.

¹¹Tua ciangin amaute puantual pak khat ciat kipia-a, amaute in a naseppih a sanggamte uh a kithat lai dingte a kim masiah a na ngak lai zek dingun kigen hi.

¹²Amah in ciamtehna a gukna a hon laitak ka en hi. Tua laitak, nakpitakin zin a ling hi. Ni, kelmul kigan ippi vom bangin vom a, khapi a bupin sisan bangin san hi.

¹³Thei a gah nunungte huihkhauh in a mutpulh bangin vana aksite lei-ah a kia hi.

¹⁴Laizial zial bangin vanpi kizial a, mualpi le tuikulh khempeuh a omna mun pan kikhinkhia uh hi.

¹⁵Tua ciangin leitunga kumpite, uliante, galkap mangte, mihaute, thahatte, sila le sila lote khempeuh leihawm sung le mualtung suangpi lakah a bu uh hi.

¹⁶Amaute in mualpi le suangpite kiangah, "Hong vuknelh unla, kumpi tokhom tunga tupa maitang pan le Tuuno thangpaihna panin hong sel un!

¹⁷Bang hang hiam cih leh amaute thangpaihna ni thupi hong tung hi, kua in thuak zo ding hiam?" ci-in a sam uh hi.