Read Zokam Kilaakna 7 Bible Online

Kilaakna 7 - Zokam bible

Kilaakna 7

¹Hih teng khit ciangin lei kiu li-a ding vansawltak li ka mu a, amaute in leitung ahi zongin, tuipi tung ahi zongin, singkung khatpeuh tung ahi zongin a nung lo dingin leitung huih lite a lencip uh hi.

²Tua ciangin a nungta Pasian ciamtehna a nei vansawltak adang khat nisuahna lam pan a paito ka mu hi. Amah in leitung le tuipi a suksiat theih nading vangliatna a kipiasa vansawltak lite tungah:

³"Kote Pasian’ na a semte taltang tungah ciamtehna ka koih khit matengun, leitung ahi zongin, tuipi ahi zongin, singkungte ahi zongin susia kei un," ci-in nakpi-in a kikokhia hi.

⁴Tua ciangin a ciamtehsate a phazah ka za a Israel behte khempeuh panin 144,000 ahi hi.

⁵Judah beh panin 12,000, Reuben beh panin 12,000, Gad beh panin 12,000,

⁶Asher beh panin 12,000, Naphtali beh panin 12,000, Manasseh beh panin 12,000,

⁷Simeon beh panin 12,000, Levi beh panin 12,000, Issachar beh panin 12,000,

⁸Zebulun beh panin 12,000, Joseph beh panin 12,000, Benjamin beh panin 12,000, ciamtehsa ahi hi.

⁹Hih teng khit ciangin ka en a, ka mai-ah kuama sim theih loh minam khempeuh pan, beh khempeuh pan, micih pan le pau khempeuh panin mihon tampitak, kumpi tokhom le Tuuno mai-ah a om uh hi. Amaute in puantual pak silh uh a, a khutuah nisuh hiangte a tawi uh hi.

¹⁰Amaute nakpi in awng uh a, "Hotkhiatna, kumpi tokhom tunga tupa I Pasian le Tuuno pan ahi hi," a ci uh hi.

¹¹Vansawltak khempeuh, kumpi tokhom le upate, a nungta ganhing lite kimkotah ding uh hi. Kumpi tokhom mai-ah kunsuk uh a, Pasian bia-in:

¹²"Amen! I Pasian tungah phatna, minthanna, pilna, lungdamna, pahtawina, vangliatna le hatna a tawntungin om den ta hen. Amen!" a ci uh hi.

¹³Tua ciangin upate khat in kei kiangah, "Hih puantual pak silhte kua hi-a, koi pana hong pai uh ahi hiam!" ci-in hong dong hi.

¹⁴"Pu aw, nang na thei hi," ci-in ka dawng hi. Tua ciangin amah in, "Hihte gimna lianpi pana hong pusuakkhiate ahi uh hi. Amaute in a puantualte uh Tuuno sisan ah sawpin a paksakte ahi uh hi.

¹⁵Tua ahi manin, "Amaute Pasian kumpi tokhom mai-ah omin sun le zanin ama biakinnpi sungah ama na a sem uh hi; tua hi-a, kumpi tokhom tunga tupa in, amau tungah a puanbuk a zak ding hi.

¹⁶Amaute gilkial kik ngei nawn lo ding uh a, a dangtak kik ngei nawn kei ding uh hi. Amaute nisa in sal kha nawn lo dinga, nisapi in zong a kangkha kei ding hi.

¹⁷Ahang in, kumpi tokhom laizanga Tuuno, amaute cingpa hi ding hi; amah in amaute a nungta tuinakte ah paipih ding hi. Tua ciangin Pasian in amaute mit pan, khitui khempeuh a nulkeu ding hi,"hong ci hi.