Read Zokam Ruth 2 Bible Online

Ruth 2 - Zokam bible

Ruth 2

¹Tu-in Naomi in a pasal lamte tanau Elimelech bawng’te Boaz kici mi gina kinaipih khat a nei hi.

²Moab numei Ruth in Naomi kiangah, "Lo ah hong kuansak inla, hong mu-a hehpihhuai hong sa peuhpeuh nunga a nusiat uh ansanghte hong tawmsak in," a ci hi. Naomi in tuanu kiangah, "Ka tanu aw, va kuan in," a ci hi.

³Tua ciangin amah paikhia a, anlate laknasa lolai-ah ansangh a va kaikhawm hi. Tua a kaihkhopna mun pen Elimelech bawng’ pana Boaz ii lo na hi hi.

⁴Tua khit phetin Bethlehem pana hong tung Boaz in anlate hopih in, "Note tawh TOPA omkhawm ta hen," a ci hi. Amaute in, "TOPA in thupha hong pia hen!" a ci kik uh hi.

⁵Boaz in a anlate ukpa kiangah, "Hua numei kua ta hiam?" ci-in a dong hi.

⁶A ukpa in, "Amah Naomi tawh Moab pana hong ciah kik Moab numei ahi hi.

⁷Tuanu in, ‘Nong hehpihna-in an late nunga buhkung lakah a sanghte hong khawmsak in,’ hong ci hi. Amah lo sungah vakvakin zingsang a kipan tu dong niliim ah tomvei sung a khawl loh buang na semsuak hi," ci-in a dawng hi.

⁸Tua ciangin Boaz in Ruth kiangah, "Ka tanu aw, na ngai in. Lo dangah pai-in ansangh zong kei inla hitak panin paikhia kei in. Ka nasem numeinote tawh omkhawm in.

⁹Pasalte an laknasa en gige inla numeinote nungteng zui in. Pasalte in bangmah hong cih loh nadingun ka gen sa ahi hi. Tuateh na dang a tak peuhpeuh ciangin pai inla pasalte tui dipsa tuibeel sunga dawn in," a ci hi.

¹⁰Tua takteh amah leilam nga-in a boksuk hi. Amah in, "Bang hangin gamdang mi khat lel - keimah in nang maipha mu ka hi hiam?" a cikhia hi.

¹¹Boaz in, "Na pasal sih nungsang na teknu adingin na nasepna teng - na nu na pa le na pianna gam na nusiat a, na theih ngei loh mite tawh tengkhawm dinga nong paina hong kigenkhin zo hi.

¹²Na sepnasa ah TOPA in hong thukkik ta hen. Ama khanuai beel dinga nong paina TOPA, Israel-te Pasian in azah tampi in pahtakman hong pia ta hen," ci-in a dawng hi.

¹³Tuanu in, "Ka topa aw, na maipha hong musak denin, na nasem numeinote khat hi lo napi-in kei nong hehnema kamdamin nong hopih hi," a ci hi.

¹⁴An nek hun ciangin Boaz in tuanu kiangah, "Hiah hong pai in. Anlum la-in lenggah zuthuk lakah diah in," a ci hi. Tuanu anlate tawh a tutkhawm ciangin an kansa pawlkhat a pia hi. Amah in a kham dong ne a, pawlkhat a khamval hi.

¹⁵Ansang kaikhawm dinga a din ciangin Boaz in a mite kiangah, "Buhphalte lak nangawn ah na khawmsak unla amah nawngkaisak kei un.

¹⁶Tua sangsikin lom hensate lak pan dokkhia-in a top dingin nusiat un, amah tai kei un," a ci hi.

¹⁷Tua ciangin Ruth in nitak dong lo-ah ansang a kaikhawm hi. Tua ciangin ama khopsa mangbuh-hamte cil-a ephah a[6] khat khawng a pha hi.

¹⁸Amah in khuapi sungah pua-a a teknu in a kaikhopsa zah a mu hi. Ruth in a an khamval teng puak-a amah a pia hi.

¹⁹A teknu in tuanu kiangah, "Tuni’n koi-ah na kaikhawm a? Koi-ah na va sem na hia?" ci-in donga, "Nang hong phawk kha mipa in thupha ngah hen," a ci hi. Tua ciangin Ruth in a teknu kiangah, a nasepna mun neipa thu a gen hi, "Tuni-a ka nasepna pa a min Boaz ahi hi," a ci hi.

²⁰Naomi in a monu kiangah, "TOPA in thupha pia hen! Tuapa in a sisate le a hing laite tunga a migitna a khawlsak tuan nai kei hi," a ci hi. Amah in, "Tua mipa i kinaipih ahi hi; amah i tanaubul-tankhiapa khat ahi hi," ci-in a monu tungah a genbeh lai hi.

²¹Tua ciangin Moab numei Ruth in, "Amah in kei kiangah, "Ka nasemte in an khempeuh a lak khit mateng amau tawh omkhawm in," nangawn hong ci lai hi," a ci hi.

²²Naomi in a monu Ruth kiangah, "Ka tanu aw, ama numeinote tawh na kithuah ding hoih mah ding hi; bang hang hiam cih leh midang khatpeuh lo ah nang hong kibawlsia thei ding hi," a ci hi.

²³Tua ciangin mangbuh le mangbuh-ham lakkhit mateng Boaz nasem numeinote tawh Ruth a kithuahkhawm hi. Tuateh a teknu tawh a omkhawm hi.