Read Zokam Ruth 3 Bible Online

Ruth 3 - Zokam bible

Ruth 3

¹Ni khat a teknu Naomi in ama kiangah, "Ka tanu aw, nuamtaka na kivak nadingin na innkuanpih b[7] ding khat hong zonsak lo ding ka hi hiam?

²A nasem numeinote tawh na nasep khawmnapa i tanaubul hi lo ahi hiam? Tu nitakin amah ancilna phualah mangbuh-ham haih in om ding hi.

³Kisil inla paknamtui kinuh-in na puan hoih pen silh dih in. Tua ciangin ancilna munah paisuk inla ahi zongin a nek a dawn khit mateng tua lai-a na om lam theisak kei in.

⁴A lup ciangin a lupna mun ciamteh in. Tua ciangin pai-in a khe lemsak inla lum in. Na hih ding amah’n hong gen ding hi," a ci hi.

⁵Ruth in, "Na gen peuhmah a vekin ka hih ding hi," ci-in a dawng hi.

⁶Tua ciangin ancilna ah paisuk a, a teknu in hih dinga a gen khempeuh a hih hi.

⁷Boaz in a nek a dawn ding teng man khina, nuam a sak khit ciangin anphual nawlnungpen mongah lum dingin a pai hi. Ruth in zuan khiankhiana, a khe lemsakin a lum hi.

⁸Zankim ciangin na khatin mipa phawnga a kihei leh a khe gei-ah numei khat a na lum hi.

⁹"Kua na hiam?" ci-in a dong hi. Tuanu in, "Na nasemnu Ruth ka hi hi; tanaubul-tankhiapa na hih buangin na puanmong hong zawn in," a ci hi.

¹⁰"Ka tanu aw, TOPA in thupha hong pia hen. A masa lai-a na lahsa sangin hih migitna a lianzaw hi; nang in azawng ahikeh ahau a khangmoi zaw tangvalte nung na delh kei hi.

¹¹Tua hi-a ka tanu aw, tu-in lau kei in. Nong nget peuhpeuh kong hihsak ding hi. Ka khua sungua na lawmte khempeuh in numei gina na hilam hong thei uh hi.

¹²Kei tawh i kitanau hangin kei sanga na kinaipih zawk tanaubul-tankhiapa khat a om lai hi.

¹³Tu zan hiah giak inla zingsang ciangin amah in nang hong tat nop le pha; amah kitansak in. Ahi zongin amah in hong tat nop kei leh TOPA in ka kiciam hi, keimah in ka hih ding hi. Zingsang dong hih lai-ah lum in," a ci hi.

¹⁴Tua ciangin amah a khe kiangah zingsang dong luma, ahi hangin kuama mel kitheih loh hunin a tho hi; tua ciangin amah in," Ancilna phualah numei khat a pai lam kitheisak kei in," a ci hi.

¹⁵Amah in, "Na puanza silhthuah lai hong paipihin hong dawh in," zong a ci hi. Tuanu in a cih banga a hih ciangin mangbuh-ham tehna guk suna a puak dingin a suan hi. Tua ciangin amah a[8] khua sungah a ciah kik hi.

¹⁶A teknu kiangah Ruth a tun ciangin Naomi in, "Ka tanu aw, bang a ci hiam?" ci-in a dong hi. Tua ciangin ama adinga Boaz in a hihsak khempeuh a gen hi.

¹⁷"Amah in hih mangbuh-ham tehna guk hong pia a, ‘Na teknu kiangah guakciah kei in,’ hong ci hi," a cih beh lai hi.

¹⁸Tua ciangin Naomi in, "Ka tanu aw, bang piang hiam cih na muh matengin na ngak keikai in. Ahang in, tuni-in hih thu a sian mateng mipa a omkhong kei ding hi," a ci hi.