Read Zokam 1 Samuel 10 Bible Online

1 Samuel 10 - Zokam bible

1 Samuel 10

¹Tua ciangin Samuel in sathau thawl khat la-a, Saul lutungah sathau sungin nama, "TOPA in ama gouluah b[29] mite makai dingin sathau hong nilh khin hi lo ahi hiam?

²Tuni-in kei nong nusiat khit ciangin Benjamin gamgi tunga om Zelzah a Rachel’ han gei-ah mi nih tawh na kituak ding hi. Amaute in, "Na zon uh laate kimu khin hi. Na pa in tuate ngaihsun nawn loin no hong lunghimawh hi. Amah in, "Ka tapa bang cih ding ka hi hiam?" ci-in dong hi, hong ci ding uh hi.

³"Tua ciangin Tabor sing lianpi phung dong na pai lai ding hi. Tua lai-ah Bethel a Pasian kiangah pai ding mi thum tawh na kituak ding uh hi. Khat in keelno thum pua dinga, a dang khat in anlum thum pua-in a khat in zu savun-um a pua ding hi.

⁴Amaute in nang hong hopihin anlum nih hong pia ding uh a na sang ding hi.

⁵"Tua khit ciangin Philistia galvilte omna - Pasian Gibeah na tung ding hi. Khuapi na manawh laitakin munsang pana hong paisuk amaute mai-a lyre-te, khuangtate, tamngaite, harp-te tumsak a kamsang kawmkawma a pai kamsang mihon tawh na kituak ding hi.

⁶TOPA Kha nang tungah vanglianin hong tung dinga amaute tawh kamsang khawmin mi tuamdang khatin na kikhel ding hi.

⁷Hih limte a tangtun khit hun ciangin Pasian in nang hong ompih ahi manin na tuah peuhpeuh hih in.

⁸"Kei pai ma-in Gilgal ah na paisuk in. Meihal biaknate le kilawmtakna a[30] biaknate pia dingin na kiangah kong pai pelmawh ding hi, ahi zongin nang kiangah hong pai-in na sep ding kong gen dong ni sagih sung pel loin na ngak in," ci-in a gen hi.

⁹Samuel paisan dingin Saul a kihei ciangin Pasian in Saul lungsim khenga, hih lim khempeuh tua ni-in a tangtung hi.

¹⁰Gibeah a tun uh ciangin kamsang honpi khat le amah kituak hi; Pasian’ Kha vanglianin ama sungah tunga amaute tawh kam a sang khawm uh hi.

¹¹Amah a thei ngeisate in kamsangte tawh kam a san khawm a muh uh ciangin, "Kish tapa tunga piang bang thu ahi hiam? Kamsangte lakah Saul zong kihel ahi hiam?" ci-in khat le khat a kidong uh hi.

¹²Tua lai-a teng mikhat in "Amaute pa kua ahi hiam?" ci-in a dawng hi. Tua hi a kamsangte lakah Saul zong kihel ahi hiam?" ci-in thuciin khat a suak hi.

¹³Saul a kamsan a tawp ciangin munsang ah a pai hi.

¹⁴Tu-in Saul pano in amah le a nasempa kiangah, "Koi teng va pha na hi uh hiam?" ci-in a dong hi. Amah in, "Laate ka zong uh hi. Ahi hangin a kimuh loh ding lam ka theih uh ciangin Samuel kiangah ka pai uh hi," a ci hi.

¹⁵Saul’ pano in, "Samuel in bang hong ci hiam, hong gen dih un," a ci hi.

¹⁶Saul in, "Amah in laate a kimuh lam hong tel gen hi," ci-in a dawng kik hi. Ahi hangin Samuel in a kumpi suah ding a gen lam a pano kiangah a gen kei hi.

¹⁷Samuel in Mizpah a TOPA kiangah Israel mite khawm a

¹⁸amaute kiangah, "TOPA Israel Pasian gen hih ahi hi: ‘Egypt panin Israel ka paikhiatpihto a, Egypt-te vangliatna le no hong nenniamte kumpi gamte khempeuh panin note kong hukhia hi,’ ci hi.

¹⁹Ahi hangin note in tu-in na tuahsiatna uh le na lungdonna panun hong hon na Pasian uh na nial uh hi. Tuateh, ‘Hi lo hi, ko tungah hong uk ding kumpi khat hong koih in,’ na ci lai uh hi. Tua ahi ciangin tu-in a behbeh a bawng’bawng’in TOPA maiah kilaak un," a ci hi.

²⁰Samuel in Israel behte khempeuh a kiangah a paipih ciangin Benjamin behte a kiteel hi.

²¹Tua ciangin amah in Benjamin behte a bawng’bawng’in a mai-ah paisak a, Matri bawng’ a kiteel leuleu hi. A tawpna ah Kish tapa Saul a kiteel hi. Ahi hangin amaute in amah a zon uh ciangin a mu kei uh hi.

²²Tua ciangin amaute in, "Mipa hong pai nai hiam?" ci-in TOPA a dot beh uh hi. Tua ciangin TOPA in, "Hong pai khin hi, amah vanlakah bu hi," a ci hi.

²³Amaute tai-in va pikhia uh a, mipi lakah a din ciangin adangte khempeuh sangin a liangko tungsiahin a sangzaw hi.

²⁴Samuel in mite khempeuh tungah, "TOPA teelsa mipa na mu uh hiam? Mi khempeuh lakah amah tawh kibang khat beek a om kei hi," a ci hi. Tua ciangin mipite in, "Kumpipa khan sawt hen!" ci-in a awng uh hi.

²⁵Samuel in mite tungah kumpi hihna ngeinate a telgen hi. Amah in tuate laizial khatin gelh a, TOPA mai-ah a koih hi. Tua khit ciangin mipite amau inn ciatah a ciahsak hi.

²⁶Saul zong Gibeah a, a inn ah ciah a, Pasian in a lungsim a lawn mi thahatte tawh a kithuah hi.

²⁷Ahi hangin thusia pawi pawlkhat in, "Hih mipa in eite bang hong ci hotkhiat thei ding hiam?" a ci uh hi. Amah simmawhin letsong a puak kei uh hi. Ahi hangin Saul a dai hithiat hi.