Read Zokam 1 Samuel 12 Bible Online

1 Samuel 12 - Zokam bible

1 Samuel 12

¹Samuel in Israel-te khempeuh tungah, "Keimah in nong gen khempeuh uh ngai-in no hong uk ding kumpi khat kong koihsak khin hi.

²Tu-in na makai dingun kumpi khat na nei khin uh hi. Kei ka hileh tekin ka sam kangta a, ka tapate hih lai-ah no tawh a omkhawm hi. Ka khangno lai-a kipan tuni dong note makai ka hi den hi.

³Tu-in hiah ka ding hi. TOPA le ama sathau nilhpa mai-ah kei langah teci hong pang un. Kua bawngtal laksak ka hi hiam? Kua laa laksak ka hi hiam? Kua khem ka hi hiam? Kua nengniam ka hi hiam? Ka kimuh-mawh bawl nadingin kua khut pan golhsum sang ka hi hiam? Hihte khatpeuh ka hih leh ka din kik ding hi," a ci hi.

⁴Amaute in, "Kote hong khem loin lah nong nengniam kei hi. Kuama khut panin bangmah na la kei hi," ci-in a dawng uh hi.

⁵Samuel in amaute kiangah, "Ka khut sungah bangmah mu lo na hi uh leh note langkhatah TOPA teci hi a, ama sathau nilhpa zong tuni-in teci ahi hi," a ci hi. Amaute in, "Amah teci ahi hi," a ci uh hi.

⁶Tua ciangin Samuel in mite kiangah, "Moses le Aaron makai-in koih a, na pute uh Egypt pan a paikhiatpihpa in TOPA ahi hi.

⁷Tua ahi ciangin tu-in note le na pate uh tungah TOPA in thumaanin a bawlte khempeuh hangin kong maitangsalh nadingin hih lai TOPA mai-ah na ding un.

⁸"Egypt ah Jacob a lut nungin huhna ngenin TOPA tungah kiko uh a, na pute uh Egypt pan paikhiatpihin, hih munah amaute a tengsak TOPA in Moses le Aaron a puak hi.

⁹"Ahi hangin amaute in TOPA amaute Pasian mangngilh uh a; tua ciangin amah in amaute a sim Hazor galkap mangpa Sisera khut sung le Philistia-te le Moab kumpite khut sungah amaute a zuak hi.

¹⁰Amaute TOPA tungah kiko khia uh a, ‘Kote ka mawh uh hi; TOPA ka taisan uh a, Baal-te le Ashtoreth-te’ na ka sem uh hi. Ahi zongin tu-in ka galte uh khut pan hong hukhia in, nangma na ka sem ding uh hi,’ ci uh hi.

¹¹Tua ciangin TOPA in Jerub-Baal, b[32] Barak c[33], Jephthah le Samuel-te d[34] puaka lungmuangtaka na ten nadingun na kim na pam-ua na galte uh khut panin note hong hukhia hi.

¹²"Ahi hangin Ammon-te kumpipa Nahash note sim dingin hong kuan na muh uh ciangin TOPA note Pasian nangawn kumpi in nei khin napi kei kiangah, - ‘Hi kei, ko hong uk dingin kumpi khat ka deih uh hi,’ nong ci uh hi.

¹³Tu-in nomau teelsa, nomau ngetsa kumpipa khat hih lai-ah om hi, en in; TOPA in note hong uk ding kumpi khat koih khin hi.

¹⁴Note in TOPA kihta in, a thu mangin a na na sep uh a, a thupiakte lehdo loin note le no hong uk kumpipa in na Pasian uh TOPA na zuih khawm uh leh - pha hi!

¹⁵Ahi hangin TOPA thu na man kei uh a, ama thupiakte na langpan uh leh na pate uh langkhatah ama khut a pan bangin note langkhatah zong a pang ding hi.

¹⁶"Tua ahi ciangin tu-in ding dide unla note mitmuhin TOPA in a bawl hih na lianpi en un!

¹⁷Tu-in mangbuh lak hun hi lo ahi hiam? Vanging le guah hong puak nadingin TOPA tungah ka ngen ding hi. Tuateh kumpi na nget uh ciangin TOPA muhna ah na gamtatsiatna uh na mutel ding uh hi," a ci hi.

¹⁸Tua ciangin Samuel in TOPA sam-a, tua ni mah in TOPA in vanging le guah a sawl hi. Tua ciangin mite khempeuh in Samuel le TOPA kihta in a ding uh hi.

¹⁹Mite in a vekun Samuel kiangah, "Kote in ka mawhnasate uh ka behlapna un kumpi khat ka ngetna uh hangin ka sih loh nading un na nasemte adingin TOPA na Pasian tungah thu hong ngetsak in," a ci uh hi.

²⁰Samuel in, "Kihta kei un, hih gamtatsia khempeuh na hihsa uh ahi hi; ahi zongin TOPA taisan kei un, na lungsim khempeuh un TOPA na sem un.

²¹Kimanna a nei lo milimte nung zui dingin pial kei un. Tuate in kimanna nei lo ahi manin no tungah a hoih bangmah hih thei lo-a hong hu thei lo uh hi.

²²TOPA in alian ama min a khualna-in a mite hong nolh lo ding hi, bang hang hiam cih leh note ama mi hong suahsakna hangin TOPA a lungkim hi.

²³Kei ka hileh note adingin TOPA tungah thu kong ngetsak lohna tawh ka mawh kei ding hi. Tuateh a hoih le amaan lampi no kong hilh ding hi.

²⁴Ahi hangin TOPA kihta a na lungsim khempeuh uh tawh muanhuaitakin ama na na sep ding uh ngaihsun un; no adinga hong sepsaksa na lianpite ngaihsun un!

²⁵Ahi hangin a sia-a na gamtat lai teitei uh leh no le na kumpipa uh a kiphiatkhia khawm ding hi," ci-in a dawng kik hi.