Read Zokam 1 Samuel 14 Bible Online

1 Samuel 14 - Zokam bible

1 Samuel 14

¹Ni khat Saul tapa Jonathan in a galhiam pua tangvalpa kiangah, "Hong pai in galkhata Philistia-te galvilna mun khatah va pai ni," a ci hi. Ahi hangin a pa kiangah a gen kei hi.

²Migron a om Gibeah khuataw a mangkawlsing nuai-ah Saul a om hi. Amah tawh mi zaguk khawng bek om a,

³tuate lakah siampi puan a silh Ahijah bek a om hi. Amah, Shiloh a TOPA siampi Eli tapa, Phinehas tapa Ahitub sanggampa Ichabod tapa ahi hi. Jonathan a paikhiat lam kuamah in a thei kei hi.

⁴Jonathan in Philistia-te galvilna muna pai a sawmna ciangka alang tuakah suangdawk om a, khat Bozez hi in, alang khata pen Seneh ahi hi.

⁵Suangdawk khat Micmash lam manawh in leilu-lam ah dawkto a, a khat pen Geba lam manawhin leitaw-lam ah a dawk suk hi.

⁶Jonathan in a galhiam pua tangvalpa kiangah, "Hong pai ou, vun-at loh mite galvilna ah pai ni ei; TOPA in ei tangin hong dosak kha thei ding hi. TOPA in hong hon peuh leh tawm le tam in bangmah sai lo hi," a ci hi.

⁷A galhiam puapa in, "Nang lungsima om bangbang hih in. Hih ou leh, ka lungsim le ka hinna nang tawh ka om hi," a ci hi.

⁸Jonathan in, "Tua ahileh hong pai ou; amau lamah galkah in amaute i va kimusak ding hi.

⁹Amaute in, ‘No kianga kong pai mateng uh tua lai-ah na ngak un,’ hong cih uh leh i omna munah ngak pahin amau omna munah i paito kei ding hi.

¹⁰Ahi hangin amaute in, ‘Ko omna ah hong paito un,’ hong cih uh leh tua pen TOPA in amaute ei khut sunga hong piakna lim hi ding hi," a ci hi.

¹¹Tua ciangin amaute gel Philistia-te galvilna ah a va kilak uh hi. Philistia-te in, "En dih un, Hebrew-te amau bukna kawhawm panin hong awmtal khia uh hi," a kici uh hi.

¹²Galvilna-a mite in Jonathan le galhiam puapa otsan uh a, "Ko kiangah hong paito uau, thu khat hong hilh nung ei," a ci uh hi. Tua ciangin, Jonathan in galhiam puapa kiangah "Ka nungah hong kahto ou, TOPA in amaute Israel khut sungah hong pia khin ta hi," a ci hi.

¹³A khut le a khe zangin Jonathan kahto-a a galhiam puapa in a nungah a pha cinten hi. Jonathan mai-ah Philistia-te puk uh a, a galhiam puapa in a nungah a that hi.

¹⁴Tua a masa pen galsimna ah Jonathan le a galhiam puapa in leitang acre a[45] lang sungah mi sawmnih khawng ding a that uh hi.

¹⁵Tua ciangin giahphual a om galkap buppite le lopaanga omte, galvilna-a omte le galguk pawlte patau uh a, - lei a ling hi. Tua patauhna Pasian b[46] tunsak ahi hi.

¹⁶Benjamin-a om Gibeah a Saul galvilte in galkap honpi mun citenga kikhenthang a mu uh hi.

¹⁷Tua ciangin Saul in a ompih mite kiangah, "I galkapte kaikhawm unla kua om lo hiam, thei dih un," a ci hi. A cih banga a hih uh ciangin Jonathan le a galhiam puapa tua lai-ah a na om kei hi.

¹⁸Saul in Ahijah tungah, "Pasian singkuangpi hong paipih in," a ci hi. (Tua hunin singkuangpi Israel-te tawh a omkhawm kei hi.) c[47]

¹⁹Saul in siampipa a hopih laitakin Philistia-te giahphual-a buaina a nasia semsem hi. Tua ciangin Saul in siampipa kiangah, "Na khut dokkik in," a ci hi.

²⁰Tua ciangin Saul le a mite kikhawm uh a, galsim dingin a kuankhia uh hi. Amaute in Philistia-te buaigawp uh a, khat le khat namsau-in a kisat uh a mu uh hi.

²¹A masa lai-in Philistia-te tawh omkhawm a, amau giahphual-a a paisa Hebrew-te Saul le Jonathan tawh a omkhawm Israel-te kiangah a paito uh hi.

²²Ephraim mualtung gama bu Israel-te khempeuh in Philistia-te taikekna a zak uh ciangin gal dopih uh a galte a nungdelh zakzak uh hi.

²³Tua ni-in TOPA in tua bangin Israel hukhia a, Beth Aven dongah gal a kido hi.

²⁴Tu-in Saul in Israel tungah, "Ka galte tungah kei mahmah in phu ka lak khit nitak matengin an a ne peuhmah in hamsiatna thuak ta hen!" cih kiciamna khat omsak ahi manin Israel mite a lungdong uh hi. Tua hi-a galkapte khat beek in an a ciam kei uh hi.

²⁵Leitunga khuaizu a omna gammang lakah galkap d[48] khempeuh a lut uh hi.

²⁶Sing lakah pai uh a khuaizu takkhia a muh uh hangin kiciamna kihta uh ahi manin kuamah in a khut a kamah a tun kei hi.

²⁷Ahi hangin a pa in mite thuciam tawh a khal lam thei lo ahi manin Jonathan in a khuta a tawi ciangkhut dawnin khuailu dawt hi. A khutin a kamah tunto-a a mit a vaktuam e[49] hi.

²⁸Tua ciangin galkap khat in, "Na pa in galkapte khempeuh tungah kiciamna khat omsaka, ‘Tuni-a an a ne peuhpeuh in hamsiatna thuak ta hen!’ ci hi. Tua hanga mite a bah ahi hi," a ci hi.

²⁹Jonathan in, "Ka pa in gamsung a buaisak hi. En un, khuaizu tawmkha ka ciap ciangin ka mit a vaktuam f[50] hi.

³⁰Tuni-in mite in galte nusiat an pawlkhat la in ne le uh hoihzaw tham ding hi. Philistia-te zong tam kithat zozaw lai ding hi lo ahi hiam?" a ci hi.

³¹Tua ni-in Israel-te in Micmash panin Aijalon ciang dong Philistia-te a sattuk khit uh ciangin a thazaw gawp uh hi.

³²Amaute in van kinusiate kituh henhan uh a, tuuhon, bawnghon le bawngnote la-in lei lakah gogawp uh a, a sisan tawh a ne khawm uh hi.

³³Tua ciangin mi khat in Saul kiangah, "En in, mite in a sa lakah a sisan om laipi ne-in TOPA tungah a mawh uh hi," ci-in a va ko hi. Amah in, "Note na muanhuai kei uh hi; hih lai-ah suangtumpi khat hong khuk meng un," a ci hi.

³⁴Tua ciangin paikhia unla mite lakah pai-in, ‘A kuamahpeuh in na tuute uh le na bawngte uh hih lai-ah hong paipihin go unla ne un, a sa le a sisan nekkhawmna tawh TOPA tungah kuamah mawh kei uh hen,’ va ci un," a ci hi. Tua ciangin mite in bawngtal paipih uh a tua zanin tua lai-ah a go uh hi.

³⁵Tua ciangin Saul in TOPA adingin biakna-tau khat dawh a, hih banga a hih a masapen ahi hi.

³⁶Saul in, "Philistia-te nungah zanin i paisuk dinga amaute khuavak dong lawkgawpin khat beek i hingkhawi kei ding hi," a ci hi. Amaute in, "Nangma hoihsak bangbangin hih ni," ci-in a dawng uh hi. Ahi hangin siampipa in, "Hih lai-ah Pasian dong phot dih ni," a ci hi.

³⁷Tua ciangin Saul in Pasian kiangah, "Philistia-te nungah ka paisuk ding hiam? Amaute Israel khutah nong pia ding hiam?" ci-in a dong hi. Ahi hangin Pasian in tua ni-in a dawng kei hi.

³⁸Tua ciangin Saul in, "No galkap makaite aw, hih lai-ah hong pai dih un, tuni-in bang mawhna kibawl ahi hiam, zongkhia dih ni.

³⁹Israel nuntakna a hukhia TOPA nuntakna ka lo hi, ka tapa Jonathan tung nangawn ah a tun leh a sih kul ding hi," a ci hi. Ahi hangin mite khat beek a pau a om kei hi.

⁴⁰Tua ciangin Saul in Israel-te khempeuh tungah, "Note hua lai-ah va ding un; kei le ka tapa Jonathan hih lai-ah ka ding ding uh hi," a ci hi. Mite in, "Hoih na sak penpen hih in," ci-in a dawng uh hi.

⁴¹Tua ciangin Saul in TOPA, Israel Pasian tungah, "Amanin hong dawng in," a[51] ci-in thu a ngen hi. Tuateh Jonathan le Saul tungah ai tu-a mite a siang uh hi.

⁴²Saul in, "Kei le ka tapa Jonathan kikal ah ai lawn un," ci hi. Tuateh Jonathan tung a tu hi.

⁴³Tua ciangin Saul in Jonathan tungah, "Bang hih na hi hiam, hong gen in," a ci hi. Tua ciangin Jonathan in, "Ka ciangkhut dawnin khuaizu tawmkha ka ciam hi. Tua hangin ka sih kul ding ahi hiam?" ci-in a gen hi.

⁴⁴Saul in, "Jonathan aw, "Nang na sih kei leh Pasian in tua sanga nasiazaw in kei hong thuaksak ta hen," a ci hi.

⁴⁵Ahi hangin mite in Saul kiangah, "Hihzah ta-a Israel a hukhiapenpen - Jonathan bang sih laizang ding ahi hiam? Si buang lo e! TOPA nuntakna lo-in ka cih unah Pasian huhna tawh amah in tuni-in hizah ta sem ahi manin a samzang khat zong lei-ah a kia kei ding hi," a ci uh hi. Tuaci-in mite in Jonathan hukhia uh a, amah a kithat kei hi.

⁴⁶Tua ciangin Saul in Philistia-te a nungdelh khawl-a amau gamah a nungkin uh hi.

⁴⁷Saul in Israel tungah ukna a ngah khit ciangin akim apam-a a galte: Moab, Ammon-te, Edom, Zobah kumpite b[52] le Philistia-te a do hi. A kiheina peuhpeuhah amaute gimna dan a thuaksak hi. c[53]

⁴⁸Amah in hangtakin do-a, Amalek zo in, amaute a mante khut panin Israel-te a hukhia hi.

⁴⁹Saul’ tapate Jonathan, Ishvii le Malki-Shua ahi uh hi. A tanu upa pen Merab hi a, tua sanga nauzawnu Michal ahi hi.

⁵⁰A zi min Ahinoam hi a, Ahimaaz’ tanu ahi hi. A galkap mangpa min Abner hi a, Ner’ tapa hi in, Ner pen Saul pano ahi hi.

⁵¹Saul’ pa Kish le Abner pa Ner, Abiel tapate ahi uh hi.

⁵²Saul a nuntak sung teng Philistia-te tawh nasiatakin kido den uh a, Saul in mi thahat le mi hangsan a muh nak leh a naseppih dingin a la hi.