Read Zokam 1 Samuel 20 Bible Online

1 Samuel 20 - Zokam bible

1 Samuel 20

¹Tua ciangin Ramah a Naioth panin David tai-a, Jonathan kiangah pai-in, "Ke’n bang hih ka hi hiam? Ka mawhna bang hiam? Na pa in kei thah hong sawm nadingin bang takhial ka hi hiam?" ci-in a dong hi.

²Jonathan in, "That lo e! Na si kei ding hi! En in, ka pa in thu neu ahi a, thu lian ahi zongin kei theih loha a hih khat beek a om kei hi. Bang hangin kei tungah hih hong im ding ahi hiam? Hong im peuhmah ke’n teh!" ci-in a dawng hi.

³Ahi hangin David kiciama, "Nang tungah maipha ka ngah lam na pa in teltakin a thei hi; tua hi-a, amahmah in, ‘Jonathan dah kha ding ahi manin amah theisak peuhmah kei ning,’ ci ding hi. TOPA nuntakna le nang nuntakna lo-a ka cih in kei le sihna kikal, kal khat bekin sam lai hi," a ci hi.

⁴Jonathan in David kiangah, "Kong hihsak dinga na deih peuhpeuh kong hihsak ding hi," a ci hi.

⁵Tua ciangin David in, "En in, zingciang Kha Thak pawi ni hi a, kumpipa tawh ankuang ka umkhawm ni ding hi-in ka um hi; ahi hangin thaiciang nitak dong lopaang ah kei hong busak in.

⁶Na pa in ka om loh lam a theih leh, ‘David-te bawng’ buppi in amau kumcin biakpiakna bawl ding uh ahi manin a khuapi uh Bethlehem ah va pai pak ning, ci-in kei tungah limtakin hong ngen hi,’ ci-in na gen in.

⁷Aman, ‘Hoih mahmah ei,’ a cih leh na nasempa a suakta ka hi hi. Ahi hangin a heh leh kei hong nasak nuam takpi ahilam na tel ding hi.

⁸Nang bel na nasempa tawh TOPA mai-ah thukhun bawl khin na hi manin ama tungah hong migi in. Kei a khial ka hi lehlah nang mahmah in hong that in! Bang hangin na pa tungah hong pia ding na hi hiam?" a ci hi.

⁹Jonathan in, "That ngei lo e! Ka pa in nang hong nasak nuam cih ka theih nak leh hong gen buang lo ding ka hi hiam?" a ci hi.

¹⁰David in, "Na pa in kei hong bo dawn leh kei tungah kua’n hong gen ding ahi hiam?" ci-in a dong hi.

¹¹Jonathan in, "Hong pai in, lopaang ah pai ni," a ci hi. Tua ciangin a nih un a paikhawm uh hi.

¹²Tua ciangin Jonathan in David kiangah, "TOPA Israel Pasian in thei hen, thaiciang tu bang hunin ka pa ngaihsutna taktak ka na mukhia ding hi. Amah nang adingin a hoih lam ahi leh thu hong khakin hong zasak buang lo ding ka hi hiam?

¹³Ahi hangin ka pa in nang natsak ding a sawm lam ahi-a, nang hong theisakin muanhuaitaka nang kong khakkhiat kei leh TOPA in kei tungah a sia theithei in hong bawl ta hen. TOPA in ka pa a ompih bangin nang zong hong ompih ta hen.

¹⁴Ahi hangin kei hong kithah loh nadingin ka nuntak sung teng bek kei tungah TOPA hong migit bang hi loin

¹⁵TOPA in David galte leitang pan a khenkhiat ciang nangawnin ka innkuanpihte le na itna khenkhia kei in," a ci hi.

¹⁶Tua ciangin Jonathan in David innkuan tawh thukhun khat bawla, "David galte tungah TOPA in thuk ta hen," a ci hi.

¹⁷Tuateh Jonathan in David a pumpi a it zahin it ahi manin amah a itna thuciam a kipsak thuah lai hi.

¹⁸Tua ciangin Jonathan in David kiangah, "Zing ciang Kha Thak pawi ahi hi. Na tutna hawm ding ahi manin nang hong kiphawk ding hi.

¹⁹Thai ciangin nikai lam hih buaina a kipat ding hunin na bukna munah pai inla Ezel suangpi gei-ah na ngak in.

²⁰Keimah muitum kineihin thaltang thum kong lawn ding hi.

²¹Tua ciangin naupang khat sawlin, ‘Pai inla thaltang va zong in,’ ka ci ding hi. Ama tungah, ‘En in, thaltangte nang omna mun hih lampang ah tu hi, ka cih leh hong pai in; TOPA nuntakna-ah ka kiciam hi, a suakta na hi dinga lau nading om lo ahi hi.

²²Ahi hangin naupang tungah, ‘En ou, thaltang na khenah tu ei,’ ka cih leh TOPA in nang hong sawlkhia hi ding ahi manin na paikhiat kul ding hi.

²³Tuateh ciamteh in eite gel thu kikupna-ah - nang le kei kikalah i teci TOPA ahi tawntung hi," a ci hi.

²⁴Tua ciangin lopaang ah David bu a, Kha Thak pawi hun a tun ciangin kumpipa an ne dingin a tu hi.

²⁵Ama tutna ngei kawm lamah a tu hi. Ama a[74] mai sanah Jonathan tu-a, Saul zomah Abner tu-in, David tutna a awng hi.

²⁶Saul in, "David in thukham tawh kituak lo a nin khatpeuh sema, ama tungah bang khatpeuh piang hi ding hi - amah a nin suak taktak hi,’ ci-in ngaihsun ahi manin tua ni-in Saul in bangmah a gen kei hi.

²⁷Ahi hangin a zingciang tua kha a ni nih ni-in David mun a awng leuleu hi. Tua ciangin Saul in a tapa Jonathan kiangah, "Bang hangin zan le tuni-in an nekna ah Jesse tapa hong pai lo ahi hiam?" a ci hi.

²⁸Jonathan in, "David in Bethlehem a pai dingin kei tungah phalna limtakin hong ngen hi.

²⁹Amah in, ‘Ka innkuanpihte in khua sungah biakpiakna bawl ding uh a, ka sanggampa in tua lai-a om dingin hong vaikhak cinten ahi manin hong paisak in. Na lung a kim leh ka sanggamte tawh kimu dingin hong ciahsak in,’ hong ci hi. Tua hangin kumpipa sabuai-a hong pai lo ahi hi," ci-in a dawng hi.

³⁰Jonathan tungah Saul thakhatin hehpah a, "Nang a lehtat le a lehdo numei’ tapa! Nang mahmah le ta-a hong nei na nu maizum nadingin Jesse’ tapa a pawl na hilam thei lo na hi hiam?

³¹Jesse’ tapa leitungah a hin laisiah nang na hi a na kumpi-gam ahi zongin a kip kei ding hi. Tu-in kei kiangah hong paisak in, a sih pelmawh kul ding hi!" a ci hi.

³²Jonathan in a pa kiangah, "Bang hangin amah kithat ding ahi hiam? Amah’n bang hih ahi hiam?" ci-in a dong hi.

³³Ahi hangin Saul in amah that dingin teipi-in a khawh hi. Tua ciangin Jonathan in a pa in David that nuam ahilam a theitel hi.

³⁴Sabuai panin Jonathan hehsa-in a dingkhia hi; a pa in David a bawlna zumhuai sa-in dah-a, tua kha a ni nih ni-in tua lai ah an a ne kei hi.

³⁵A zingsang ciangin David tawh kimu dingin lopaang ah Jonathan a paikhia hi. Amah in naupangno khat tonpih a,

³⁶naupang kiangah, "Va tai inla ka thaltang kapte va zong in," a ci hi. Naupang a tai laitakin amah khengin thaltang khat a kap hi.

³⁷Jonathan thaltang tukna munah naupang a tun ciangin Jonathan in a nung panin sama, "Nang khenah thaltang a tu na?" a ci hi.

³⁸Tua ciangin, "Manlang ou! Pai mengmeng ou! Khawl kei ou!" ci-in a awng hi. Naupang in thaltang tawma a pu kiangah a kileh kik pah hi.

³⁹(Jonathan le David bekin a theih uh hih thute naupang in bangmah a thei kei hi.)

⁴⁰Tua ciangin Jonathan in a galvante naupangpa pia a, "Pai inla khua sungah na pua kik in," a ci hi.

⁴¹Naupang a paikhiat khit ciangin suangtum leitaw lampang pan David paikhia a, Jonathan mai-ah leilam nga-in thumvei a kunsuk hi. Tua ciangin kinamin kikah tuak uh a - ahi hangin David a nak kah zaw tham hi.

⁴²Jonathan in David kiangah, "Khat le khat i kilawmtakna TOPA minin i kiciam khina, ‘Nang le kei kikal le nang suante le kei suante kikal ah i teci TOPA ahi hi,’ tua ahi manin lungnuamtakin pai in," a ci hi. Tua ciangin David in paisan-a, Jonathan khua sungah a ciah kik hi.