Read Zokam 1 Samuel 22 Bible Online

1 Samuel 22 - Zokam bible

1 Samuel 22

¹David in Gath nusia a, Adullam suanghawm ah a suakta hi. A sanggamte le a pa innkuanpihte in ama thu a zak uh ciangin a kiangah a paisuk uh hi.

²A lungdongte ahi a, leiba bate ahi zongin lungkimlohna a nei khempeuh a ma kiangah kikhawm uh a, amah makai a suak hi. Amah tawh mi zali bang a om uh hi.

³Tua lai panin Moab a Mizpah ah David pai-a Moab kumpipa kiangah, "Pasian in kei ading hong sepsak ding ka theih matengin ka nu le ka pa hong pai-in no tawh nong tengkhawmsak zo ding hiam?" a ci hi.

⁴Tua ciangin amaute Moab kumpipa kiangah nusia-a, suang-hawm sungah David a om laisiah amaute tawh a omkhawm uh hi.

⁵Ahi hangin kamsangpa Gad in David kiangah, "Suanghawm sung ah teng kei in; Judah gam ah pai in," a ci hi. Tua ciangin David paikhia a, Hereth tulakah a pai hi.

⁶Saul in David le a mite a omna a kitheih lam a za hi. Tuateh a khuta teipi tawisa-in Gibeah mualtung a makeng kung nuai-ah Saul tu-a a kimkotah a uliante khempeuh a ding uh hi.

⁷Saul in amaute kiangah, "Benjamin mite aw, ngai un! Jesse tapa in na lote uh le na lenggui lote uh hong pia ding ahi hiam?

⁸Bang hangin note khempeuh in hong sawmsim na hi uh hiam? Ka tapa in Jesse’ tapa tawh thukhun a bawl lai-in kuamah in nong gen kei uh hi. Note khat beek in kei nong thudon kei uh a, ka tapa in tuni donga a hih bangin ka nasempa kei buksim dingin a sawl lai-in kuamah in nong gen kei uh hi," a ci hi.

⁹Ahi hangin Saul uliante tawh a ding khawm Edom-te Doeg in, "Nob-a Ahitub’ tapa Ahimelech kiangah Jesse’ tapa a pai lam ka mu hi.

¹⁰Ahimelech in ama adingin TOPA thu dotsak a, lam-an le Philistia-pa Goliath’ namsau a pia hi," a ci hi.

¹¹Tua ciangin kumpipa in Ahitub’ tapa siampi Ahimelech le Nob a siampi sem a pa’ innkuanpih buppi samsak a, amaute kumpipa kiangah a pai uh hi.

¹²Saul in, "Ahitub’ tapa aw, na ngai in," a ci hi. Amah in, "Ka ngai hi, ka topa aw," ci-in a dawng hi.

¹³Saul in, "Bang hangin nang le Jesse’ tapa in kei hong langpang simin tuni-in amah bangin kei hong lehdoin hong pansim nading anlum le namsau pia in, ama ading Pasian tungah thu dotsak na hi hiam?" a ci hi.

¹⁴Ahimelech in kumpipa kiangah, "Na nasemte khempeuh lakah kumpipa makpa, nang hong cingte ukpa David sanga kizahtakzaw no innkuan sungah amah banga muanhuai kua om ahi hiam?

¹⁵Ama adingin Pasian thu ka dotsak tua ni a masa pen ahi hiam? Hi kei! Na nasempa in hih thupiang buppi thei kha lo ahi manin kumpipa in na nasempa ahi-a, a pa innkuante ahi zongin mawhsak kei in," ci-in a dawng hi.

¹⁶Ahi hangin kumpipa in, "Ahimelech aw, nang le na pa innkuan bup na si taktak ding uh hi," a ci hi.

¹⁷Tua ciangin kumpipa in a kianga om amah cingte thu pia a; "Amaute in zong David pawlpih uh ahi manin kihei unla TOPA siampite that un. Amah a taisim hi napi amaute in kei hong ko kei uh hi," a ci hi. Ahi hangin kumpipa uliante in TOPA siampite sat dingin a khut uh a liik nuam kei uh hi.

¹⁸Tua ciangin kumpipa in Doeg kiangah, "Nang kihei inla siampite satlum in," ci-in thu a pia hi. Tua ahi ciangin Edom-pa Doeg kihei a amaute a satlum hi. Tua ni-in siampi puanpak silh sawmgiat le nga a that hi.

¹⁹Amah in tua siampite khua Nod a om numei, pasal, naupang, naungeek le a bawng, a laa, a tuu-te dongun namsau in a that hi.

²⁰Ahi hangin Ahitub’ tapa, Ahimelech tapa Abiathar suakta a, David pawl dingin a tai hi.

²¹Amah in TOPA siampite Saul in a thah lam David a ko hi.

²²Tua ciangin David in Abiathar kiangah, "Tua ni-a Edom-te Doeg a om ciangin Saul tungah ko mah inteh, ka cih hi. Na pa innkuan bup sihna kei hang ahi hi.

²³Kei kiangah om in; lau kei in; nang thah dinga hong zongte kei hong zongte mah ahi hi. Kei tawh na bitkhawm ding hi," a ci hi.