Read Zokam 1 Samuel 23 Bible Online

1 Samuel 23 - Zokam bible

1 Samuel 23

¹David tungah, "En in, Philistia-te in Keilah sim uh a, a ancilna munte uh a luhsak uh hi," ci-in a kigen ciangin

²amah in TOPA kiangah, "Kuanin Philistia-te ka sim ding hiam?" ci-in a dong hi. TOPA in, "Kuan in, Philistia-te sim inla Keilah honkhia in," ci-in a dawng hi.

³Ahi hangin David mite in, "Hih Judah gamah eite i lau hi. Philistia-te do dingin Keilah ah kuan lehang i lauzaw lai ding hi!" a ci uh hi.

⁴David in khatvei TOPA dong kik a, TOPA in, "Keilah ah kuansuk in, Philistia-te na khutah kong pia ding hi," ci-in a dawng hi.

⁵Tua ciangin David le ama mite Keilah ah pai-in Philistia-te sim uh a, a ganhonte uh a hawlsak uh hi. Amah in Philistia-te supna lianpi thuaksak-a, Keilah mite a honkhia hi.

⁶(Tu-in Ahimelech’ tapa Abiathar in Keilah a David kiangah a tai lai-in siampi puan a taipih hi.)

⁷Keilah ah David a pailam Saul tungah kigena amah in, "Pasian in kei tungah amah hong piakhin ahi manin kongpi kalhna zawl nei khuapi ah David amah le amah thong sunga kikhum ahi hi," a ci hi.

⁸Tuateh Saul in, Keilah ah paisukin David le a mite umciha a sim dingin a galhatna khempeuh a kikhawmsak hi.

⁹Saul in amah a sawm lam David in a theih ciangin siampi Abiathar kiangah, "Siampi puan hong paipih in," a ci hi.

¹⁰David in, "TOPA Israel’ Pasian aw, Keilah ah Saul hong pai sawma kei hangin khuapi suksiat a sawm lam teltakin ka za hi.

¹¹Keilah khua mite in ama tungah kei hong ap ding uh hiam? Na nasempa in ka zaksa bangin Saul hong kuansuk ding hiam? TOPA Israel’ Pasian aw, na nasempa tungah hong gen in," a ci hi. Tuateh TOPA in, "Hong kuan ding hi," a ci hi.

¹²David in, "Keilah khua mite in kei le ka mite Saul tungah hong ap ding uh hiam?" a ci kik hi. Tuateh TOPA in, "Hong ap ding uh hi," a ci hi.

¹³Tua ciangin David le zaguk bang a pha a mite Keilah panin paikhia uh a, mun khat khit mun khat ah a kikhinkhin uh hi. Saul kiangah, Keilah panin David suakta khin hi, ci-a a kigen ciangin tua lai-ah a pai nawn kei hi.

¹⁴Sehnel-gam mun muanhuaite le Ziph Sehnel-gam mualkuam lakah David a om hi. Saul in nisimin amah a zon hangin Pasian in ama khutah David a pia kei hi.

¹⁵Ziph Sehnel-gama om Horesh ah David a om laitakin amah that dingin Saul a kuan lam David in a thei hi.

¹⁶Tuateh Horesh a David kiangah Saul tapa Jonathan pai-a, Pasian sunga tha a lak dingin a hanthawn hi.

¹⁷Amah in, "Kihta kei in, ka pa Saul in nang tungah a khut khat zong hong nga kei ding hi. Israel tungah kumpi na hi dinga, kei nang zom ka hi hi. Hih thu ka pa Saul nangawn in a theihsa ahi hi," a ci hi.

¹⁸A nih un TOPA mai-ah thukhun a bawl uh hi. Tua ciangin Jonathan inn ah ciah a, David Horesh ah a om lai hi.

¹⁹Gibeah a Saul kiangah Ziph-te paito uh a, "Jeshimon leitaw-lam Hakilah mualtung Horesh a mun muanhuai sung kote lakah David bu hi lo ahi hiam?

²⁰Tu-in, kumpipa aw, na ut hunhunin hong paisuk lecin kumpipa khuta piak ding ko mau thuthu ahi hi," a ci uh hi.

²¹Saul in, "Kei nong panpih manun, TOPA in thupha hong pia hen.

²²Pai unla, na kithawi beh lai un. David koi lai-ah pai mun pena tua lai-ah kua’n mu hiam. Amaute in kei tungah amah pilvang mahmah hi, hong ci uh hi.

²³Amah in bukna-a a zat munte khempeuh va theikhia unla thu kician a[77] taktak tawh kei kiangah hong pai kik un. Tua ciangin no kong zui dinga; tua kualah amah a om leh Judah bawng’te khempeuh lakah amah ka mukhia teitei ding hi," ci-in a dawng kik hi.

²⁴Tua ciangin amaute Ziph zuanin Saul mai-ah a pai uh hi. Tua laitakin David le a mite Jeshimon leitaw-lam Arabah sunga om Maon Sehnel-gam ah a om uh hi.

²⁵Saul le a mite in a zon lam uh, David kiangah a kigen ciangin suangpi ah paisukin Maon Sehnel-gam ah a om hi. Hih muna a om lam Saul in a zak ciangin David delhin Maon Sehnel-gam ah a pai hi.

²⁶Saul in mualpang khat zui a, David le a mite in a pang lang khat zui-in Saul a pelhkhia mengmeng uh hi. Saul le a galkapte in David le a mite a mat dekdek laitakun,

²⁷Saul kiangah kamtai khat tunga, "Manlangin hong pai in! Philistia-te in i gam hong lokgawp uh hi," a ci hi.

²⁸Tua ciangin Saul in David delh nawn loin Philistia-te do dingin a kuan hi. Tua hangin hih mun Sela Hammahlekoth b[78] ci uh hi.

²⁹Tua lai panin David paito a En Gedi mun muanhuai sungah a teng hi.