Read Zokam 1 Samuel 25 Bible Online

1 Samuel 25 - Zokam bible

1 Samuel 25

¹Tu-in Samuel si-a Israel khempeuh kikhawmin amah kah uh a; Ramah a, a innah a vui uh hi. Tua ciangin Maon a[80] Sehnel-gam ah David a kikhinsuk hi.

²Carmel ah neihsa a nei Maon a teng mipa khat in neihsa a hau mahmah hi. Amah in keel tulkhat le tuu tulthum nei-a, tuate Carmel ah a mul a met hi.

³Ama min Nabal hi-a a zi min Abigail ahi hi. Tuanu tei le melhoih a thuah khat hi-a a pasal ahileh Caleb-te hi-in, a lungtom a gilo khat ahi hi.

⁴Sehnel-gam ah David a om laitakin Nabal tuumul met ahilam a za khin hi.

⁵Amah in tangval sawm sawlin, "Carmel a Nabal kiangah va pai unla kei minin va hopih un.

⁶Ama kiangah, ‘Na khan sawt ta hen! Nang le na innkuanpihte na ci uh dam ta hen! Na neihsa khempeuh cidam ta hen!

⁷"‘Tu-in tuumul met hun ta hi, ci-in ka za hi. Na tuucingte uh ko kiangah hong om sungun amaute bawlsia loin Carmel a, a om sungteng uh bangmah a mangsak kei uh hi.

⁸Na nasemte dong lecin hong gen ding uh hi. Tua ahi ciangin pawi huna hong pai ka hi buangun ka tangvalte na angvan in. Nong hehpihna-in na nasemte le na tapa David ading na muh peuhpeuh na pia in,’ ci hi, ci un," a ci hi.

⁹David mite a tun uh ciangin David minin hih thupuak Nabal tungah a gen uh hi. Tua khit ciangin a ngak uh hi.

¹⁰Nabal in David nasemte kiangah, "Hih David na cih uh kua ahi hiam? Hih Jesse’ tapa kua ahi hiam? Tu hunin a pute kiang pana tai nasem tampi om hi.

¹¹Bang hangin hong paina uh ka theih loh mite tungah ka anlumte, tuite le ka ganmul mette adingin ka gawhsate pia ding ka hi hiam?" ci-in a dawng hi.

¹²David mite kileh hei-in a ciah kik uh hi. Amaute a tun uh ciangin a gen khempeuh a zasak uh hi.

¹³David in a mite kiangah, "Na namsau uh kuah un!" a ci hi. Tua ciangin amaute in a namsau uh kuah uh a, David in ama aa a kuah hi. Mi zali khawng David tawh kuankhawmin zanih in a vante uh a ngak uh hi.

¹⁴A nasemte khat in Nabal zi Abigail kiangah; "David in sehnel-gam panin kamtai hong sawla, ka pu uh hopihsak napi amah in amaute a salgawp hi.

¹⁵Tua hi napi ko tungah hong migi uh hi. Amaute kiang lopaangah ka om sung tawntung uh hong bawlsia lo uh a, ka bangmah uh zong ka mansuah kei uh hi.

¹⁶Amaute kiangah ka gante uh ka cin sung tawntungun amaute ka kulh uh ahi hi.

¹⁷Tu-in bang hihsak thei na hi hiam, ngaihsun pha in; bang hang hiam cih leh i pu le a innkuanpih tungah tuahsiatna a tung dinga omsa ahi hi. Amah lah a ngoltol kuama hopih theih loh ahi hi," ci-in a gen hi.

¹⁸Abigail a kithawipah cingteng hi. Amah in anlum zanih, zu savun um nih, tuu semsa nga, an kansa seah b[81] nga, lenggah-keu beu zakhat le theigah ho beu zanih laate tungah a suan hi.

¹⁹Tua ciangin tuanu in a nasemte kiangah, "Na masa un; kong zui ding hi," a ci hi. Ahi hangin a pasal Nabal kiangah a gen kei hi.

²⁰Amah laa tungah tuanga mualkawm ah a pai laitakin David le a mite ama lam manawhin tuaksuk uh a, a kituak uh hi.

²¹David in, "Hih mipa neihsa sehnel gamah khat beek a pelhem loh nadingin ka vilsakna khempeuh - a mawkna suak hi. Amah in apha asia-in hong thuk hi.

²²Zingsang ciangin amah tawh kisai khempeuh pasal khat zong ka sit tak leh Pasian in nasiatakin David c[82] hong thuk ta hen!" a ci khin phet ahi hi.

²³Abigail in David a muh ciangin a laa tung pan kumkhia-a, David mai-ah a khup lamin a boksuk hi.

²⁴A khe phungah puka: "Ka topa aw, mawhsakna kei bek hong khusak in. Hong hehpih inla na nasemnu thu hong gensak in; na nasemnu thugen na ngaihsak in.

²⁵Ka topa in tua mi ngoltolpa Nabal thugen bangmahin sim kei in. Ama min Mihai hi a - a min zui-in a haitat hi lel hi. Na nasemnu kei mahmah in ka pu in nong sawl mite ka na mu kha kei hi.

²⁶"Ka topa aw, nang sisan luansak nading le phu na lak nading panin na khut mahmah TOPA in hong khoh nungsang, TOPA nuntakna le nang nuntakna ka lo hi, nangma galte le ka pu a nasak nuam khempeuh Nabal tawh kibang ta hen.

²⁷Tuateh hih letsong, na nasemnu in ka pu kong puak, nang hong zui mite tungah hong piasak in

²⁸TOPA in ka pu’ kumpi-gui kizomsuaksak taktak ding ahi manin nong hehpihna-in ka khialhna hong maisak in; bang hang hiam cih leh amah in TOPA galte a do hi. Na nuntak sung tawntung nang tungah khialhna kimu kei ta hen.

²⁹Mi khatpeuh in hong that dingin hong delh ciang nangawnin TOPA na Pasian in a nungtate a humbitna sungah ka pu nuntakna a humbit ding hi. Ahi hangin na galte nuntakna suanglotna kuanga lot bangin a lawn ding hi.

³⁰TOPA in amah tawh kisai na hoih khempeuh ka pu adingin a sep khit ciang le amah Israel makai a suah khit ciangin

³¹a thu om lopi-a sisan luansakna ahi-a, nang mahmah in phu na lak loh ahi zongin nang adingin lungkimlohna le vangik a suak kei ding hi. Tua hi a TOPA in ka pu hong gualzawhsak ciangin na nasemnu hong mangngilh kei in," a ci hi.

³²David in Abigail kiangah, "Tuni-in kei dawn dinga nang hong sawl TOPA, Israel’ Pasian, kiphat ta hen.

³³Tuni-in sisan suah lo ding le kei mahmah khuta phula lo dingin thukhensatna hoih na neih manin thupha ngah ta in.

³⁴Kei hong dawn dingin hong kuankhia pah lo hi lecin nang kong natsak nading pana kei hong kempa TOPA, Israel’ Pasian nuntakna lo-a kong geninah, zingsang nisuah ciangin Nabal tawh kisai pasal khempeuh khat zong ka sit kei ding hi," a ci hi.

³⁵Tua ciangin tuanu in David a puakte tuanu khut panin sanga, "Lungnuamin ciah in. Na thugente ka za khina, nong ngetna kong pia hi," a ci hi.

³⁶Nabal kiangah Abigail a pai ciangin kumpi khat bangin a inn sungah pawi a na bawl hi. Amah in zu kham mahmah a, a lungsim a kiliansak hi. Tua ahi ciangin tuanu in khuavak mateng bangmah a gen kei hi.

³⁷Zingsang Nabal zukham a phat ciangin a zi in hih thu khempeuh ko a, a lungtang khawlin suangtum a bang hi.

³⁸Tua zawh ni sawm ciangin TOPA in Nabal sata a si hi.

³⁹Nabal sih a zak ciangin David in, "Kei hong simmawh Nabal tungah ka thuk nading pana hong lencip TOPA kiphat ta hen. Amah in ka khialh nading panin hong kema, Nabal khialhna ama lutungah a tusak hi," a ci hi. Tua ciangin David in Abigail thu zasak a, a zi dingin a dongsak hi.

⁴⁰A nasemte Carmel ah pai-in Abigail kiangah, "David in a zi dingin nang a la dinga hong sawl ahi hi," a ci uh hi.

⁴¹Tuanu in a mai leilam ngatin kunsuk a, "Hih lai-ah na nasemnu uh note nasem ding le ka pu nasemte khe a silsak dingin a kithawisa ahi hi," a ci hi.

⁴²Abigail laa tungah tuangpah-a, a nasem numeite nga in amah zui-in David kamtaite tawh ton uh a ama zi a suak hi.

⁴³David in Jezreel a Ahinoam zong na tenpih khin a, amaute gel a zi ahi uh hi.

⁴⁴Ahi hangin Saul in David zi a tanu Michal, Gallam pana Laish’ tapa Patiel a[83] tawh a kitengsak khin hi.