Read Zokam 1 Samuel 28 Bible Online

1 Samuel 28 - Zokam bible

1 Samuel 28

¹Tua hun laitakin Philistia-te in Israel do dingin a galhatna uh a kaikhawm uh hi. Achish in David kiangah, "Nang le na mite in ka galkapte nong zuih ding uh thei pelmawh un," a ci hi.

²David in, "Tuateh na nasempa in bang hih thei hiam, cih nangmah mah in na mu ding hi," a ci hi. Achish in, "Hoih mahmah hi, na khantawnin kei hong cingpa-in kong koih ding hi," ci-in a dawng kik hi.

³Tu-in Samuel sita a, Israel khempeuh thumin ama khuapi Ramah ah a vui uh hi. Saul in vankahte le misi thudongte a gam panin a hawlkhia khin hi.

⁴Philistia-te kikhawmin Shunem ah giahphual sat uh a, tua hun mahin Saul in Israel-te khempeuh khawmin Gilboa ah giahphual a sat hi.

⁵Saul in Philistia-te galkapte a muh ciangin kihta a; a lungsim a lauthawng mahmah hi.

⁶Amah in TOPA a dot hangin TOPA in a mang sung ahi a, Urim ahi a, kamsangte pan ahi zongin a dawng kei hi.

⁷Tua ciangin Saul in a sawltakte kiangah, "Amah ka dot theih ding sikha kamsang khat hong zonsak un," a ci hi. Amaute in, "Endor ah khat om hi," a ci uh hi.

⁸Tua ciangin Saul in a mel selin puan dang khat silh a, tua numei kiangah amah tawh mi nih a va pai uh hi. Amah in, "Kei adingin kha khat hong dotsak inla a min ka gen pen hong saptohsak in," a ci hi.

⁹Ahi hangin numei in, "Saul in a hihsa thu teltakin a theihsa ahi hi. Amah in vankahte le misi thudongte gam sungah a phiatmangsa ahi hi. Bang hangin hong sisak thei dingin ka nuntakna thang hong siah na hi hiam?" a ci hi.

¹⁰Tuanu tungah TOPA lo in Saul kiciam a, "TOPA nuntakna lo a kong gen inah, hih hangin dan hong kituaksak kei ding hi," a ci hi.

¹¹Tua ciangin numei in, "Kua hong saptohsak ding ka hi hiam?" ci-in a dong hi. Amah in, "Samuel hong sapsak in," a ci hi.

¹²Numei in Samuel a muh ciangin a aw neihzahin awng-a Saul kiangah, "Bang hangin hong khem na hi hiam? Saul na hi veleh!" a ci hi.

¹³Kumpipa in tuanu kiangah, "Lau kei in. Bang mu na hiam?" a ci hi. Numei in, "Lei pana hong pusuak-khia kha a[85] khat ka mu hi," a ci hi.

¹⁴Amah in, "Amah bang tawh kibang hiam?" ci-in a dong hi. Tuanu in, "Puteek puantual silh khat hong paito hi," a ci hi. Tua ciangin Saul in Samuel ahilam thei a, kunsukin a mai leilam ngatin a khupbawh suk hi.

¹⁵Samuel in Saul kiangah, "Bang hangin kei hong nawngkaisakin hong samto themthum na hi hiam?" a ci hi. Saul in ka lung dong lua mahmah hi. Philistia-te in kei hong sim uh a, Pasian in lah kei hong taisan khin hi. Amah in kamsangte ahi-a mang sungah ahi zongin hong dawng nawn lo hi. Tua ahi ciangin ka hihzia ding hong gen dingin nang kong sam hi," a ci hi.

¹⁶Samuel in, "Bang hangin kei hong dong na hi hiam, tu-in TOPA in nang hong taisan a, na gal suak ta hi lo ahi hiam?

¹⁷TOPA in kei tungtawna a gensa bangin a hih khin hi. TOPA in na khut panin kumpi-gam balkhia khina na vengte khat - David tungah pia zo hi.

¹⁸Nang in TOPA thu mang loin Amalek-te tunga ama thangpaihna tawh kizui-in sem lo na hi manin tuni-in TOPA in nang tungah hih bangin hong bawl ahi hi.

¹⁹TOPA in Philistia-te khutah nang le Israel hong piakhawm dinga, zing ciangin nang le na tapate kei tawh i omkhawm ding hi. TOPA in Israel galkapte zong Philistia-te tungah a pia ding hi," a ci hi.

²⁰Samuel thugente hangin Saul lau lua-a leitungah a khup a thalin a puk hi. Tua ni sun le zan an ngawl ahi manin a tha a hawmgawp hi.

²¹Saul kiangah numeinu pai-a amah a linglawng luatna a muh ciangin, "En in na nasemnu in na thu kong mang hi. Ka nuntakna khamin nang cih bangin ka hih hi.

²²Tu-in nong hehpihna-in na nasemnu thu ngai inla na pai nading ah na pai zawh nading tha na neih nadingin an pawlkhat hong kipiasak in," a ci hi.

²³Amah in nial a, "Ka ne kei ding hi," a ci hi. Ahi hangin a mite in numei tawh kopin sawlhuan uh a, amaute thu a mang hi. Leitual panin thoto a lupna tungah a tu hi.

²⁴Numeinu in bawngno vakthau khat a inn ah nei a, manlangin a go hi. Annel pawlkhat la-in mekmana, silngo sawh loh anlum a bawl hi.

²⁵Tua ciangin Saul le a mite lui-a a ne uhhi. Tua zan mahin dingkhia in a nusia uh hi.