Read Zokam 1 Samuel 3 Bible Online

1 Samuel 3 - Zokam bible

1 Samuel 3

¹Naupang Samuel in Eli khutnuai TOPA mai-ah na a sem hi. Tua hun lai-in TOPA thu kiza thithe loin; muhkholhnate a tam kei hi.

²Eli a mit mang lua ta in, khua mu thei lai mialmial a, zan khat a lupna mun ngei-ah a lum hi.

³Pasian meivak kisumit nai lo-a, Pasian singkuangpi omna TOPA biakinnpi c[13] sungah Samuel a lum hi.

⁴Tua ciangin TOPA in Samuel a sam hi. Samuel in, "Hiah ka om hi," ci-in a dawng hi.

⁵Tuateh amah Eli kiangah tai-a, "Hong sam na hia; hiah ka om hi," a ci hi. Ahi hangin Eli in, "Hong sam ke’ng ei; pai inla lum kik ou," a ci hi. Tua ciangin pai-a a lum hi.

⁶TOPA in, "Samuel!" ci-in a sam kik hi. Tuateh Samuel thoin Eli kiangah pai-a, "Hong sam na hia; hiah ka om hi" a ci hi. Eli in, "Ka tapa aw, hong sam ke’ng, pai kik inla lum in," a ci hi.

⁷Tu-in Samuel in TOPA thei nai lo hi: Ama tungah TOPA kammal a kilaak nai kei hi.

⁸TOPA in Samuel a thumveina sam a, Samuel thoin Eli kiangah pai a, "Hong sam na hia, hiah ka om hi," a ci hi. Tua ciangin TOPA in naupang a sap lam Eli in a thei hi.

⁹Tua ciangin Eli in Samuel kiangah, "Pai-in lum inla nang hong kisap leh, ‘Na nasempa in ka ngai hi, TOPA aw, gen in,’ ci in," ci-in a gen hi. Tua ciangin Samuel pai-a ama munah a lum hi.

¹⁰TOPA pai-in tua lai-ah dinga a hun danga mah bangin, "Samuel! Samuel" ci-in a sam hi. Tua ciangin Samuel in, "Na nasempa in ka ngai hi, hong gen in," a ci hi.

¹¹Tua ciangin TOPA in Samuel kiangah; "En in, a za peuhmah bil a vut ding na khat Israel sungah ka sem ding hi.

¹²Tua hun ciangin a innkuanpihte tungah a tung dinga ka gensate - a kipatna pan a tawpna dong, Eli tungah ka tungsak ding hi.

¹³Ahang in, a tapate amau mahmah a huathuai-in d[14] gamta uh a, amah’n kham lo ahi manin ama theihsa mawhna hangin a innkuan-pihte tungah thu ka khen den ding hi, ci-a ama tungah ka gensa ahi hi.

¹⁴Tua ahi ciangin Eli innkuan tungah, ‘Eli innkuante khialhna biakpiakna le biaknate-in a mai ngei kei ding hi," ci-in ka kiciam hi,’ ka ci hi," a ci hi.

¹⁵Zingsang dong Samuel lum a, tua ciangin TOPA inn kong a hong hi. A mangmuhna Eli kiangah gen ngam lo hi;

¹⁶ahi hangin Eli in, "Ka tapa Samuel," ci-in a sam hi. Samuel in, "Hiah ka om hi," ci-in a dawng hi.

¹⁷Eli in, "Amah in nang tungah bang hong ci hiam? Kei tungah hong im kei in. Ama hong gensa kei tungah ip nong neih leh Pasian nasia takin hong thuaksak ta hen," ci-in a dong hi.

¹⁸Tua ciangin Samuel in bangmah im loin a gen khempeuh a gen khin hi. Tua ciangin Eli in, "Amah TOPA ahi hi ama mita hoih a sak bangin hih ta hen," a ci hi.

¹⁹Samuel khangkhanga, TOPA in ompihin ama kammalte khat beek lei-ah a kiasak kei hi.

²⁰Tuateh Dan pan Beersheba donga Israel khempeuh in TOPA kamsangin Samuel a kikipsak lam a thei uh hi.

²¹Shiloh ah TOPA kilang zelzela a kammal tungtawnin amahmah Samuel tungah a kilang hi.