Read Zokam 1 Samuel 31 Bible Online

1 Samuel 31 - Zokam bible

1 Samuel 31

¹Tu-in Philistia-te in Israel a sim uh hi; amaute mai-ah Israel-te taikek uh a, Gilboa Vum ah tampi a si uh hi.

²Saul le a tapate nunglam panin Philistia-te in phadong lua uh a, a tapate, Jonathan, Abinadab le Maki-Shua a that uh hi.

³Saul kimkot ah kidona nasia lua a, thal tawite in amah a phak uh ciangin nasiatakin a liamsuah uh hi.

⁴Saul in a galvan-puapa kiangah, "Na namsau dok inla hong dawtlet in, tua hi kei leh hih vun-at lohte hong pai-in hong khel-bawl ding uh a, hong dawtlet ding uh hi," a ci hi. Ahi hangin galvan-puapa lau-in hih ngam lo a; tua ciangin Saul in ama namsau dokin a tungah a puk hi.

⁵A galvan-puapa in Saul sih a muh ciangin amah zong a namsau tungah pukin amah tawh a sikhawm hi.

⁶Tua bangin Saul le a tapa thumte le galvan-puapa le a mite khempeuh a ni kikhatin a sikhawm uh hi.

⁷Kuam dungsuka teng Israel-te le Jordan galkahte in Israel galkapte taikhinin Saul le a tapate sih a muh uh ciangin a khuapite uh nusia-in a tai uh hi. Tuateh Philistia-te pai-in a va luah uh hi.

⁸A zing ciangin Philistia-te misi van hawkkhia dingin a pai uh ciangin Gilboa Vum ah Saul le a tapa thumte a sisa a om a mu uh hi.

⁹Amaute in a lu tankhia uh a, a galvante hawkkhia-in, Philistia gam buppi-a milim biakna innte le a mipihte uh lakah tua thuthak a tangko dingin kamtai a sawl uh hi.

¹⁰Amaute in Ashtoreth-te biakna innpi sungah a galvante koih uh a, Beth Shan kulh tungah a luang a hen uh hi.

¹¹Philistia-te in Saul a bawlna uh Jebesh Gilead mite in a zak uh ciangin

¹²a galhangte khempeuh uh a zan azanin Beth Shan ah a kuan uh hi. Saul le a tapate luangte Beth Shan kulh panin lakhia uh a, Jebesh ah paipihin tua lai-ah a hal uh hi.

¹³Tua ciangin amaute’ guhte la uh a, Jebesh a makeng nuai-ah vui-in ni sagih sung an a tang uh hi.