Read Zokam 1 Samuel 4 Bible Online

1 Samuel 4 - Zokam bible

1 Samuel 4

¹Tua ciangin Samuel thu Israel khempeuh in a za uh hi. Philistia-te sim dingin Israel-te a kuankhia uh hi. Israel-te in Ebenezer ah panmun la uh a, Philistia-te in Aphek ah panmun a la uh hi.

²Philistia-te in Israel maituah dingin a galhatna uh a gual uh hi; kidona kiphalh ahi manin Philistia-te in Israel-te zo uh a, tua kidona phualah mi tulsawmli bang a that uh hi.

³Giahphual ah galkapte a ciah kik uh ciangin Israel upate in, "Bang hangin tuni-in TOPA in Philistia-te mai-ah eite hong guallelsak ahi hiam? Eite tawh singkuangpi kuankhawm a, i galte khut pana hong hon dingin tua a[15]TOPA thukhun singkuangpi Shiloh panin kuanpih ni," a kici uh hi.

⁴Tua ciangin mite in Shiloh ah mi sawl uh a, cherub-te kikala tu Thahatpen TOPA thukhun singkuangpi a puasak uh hi. Tua hi a, tua lai-ah Eli tapa nihte Hophni le Phinehas zong Pasian thukhun singkuang tawh a omkhawm uh hi.

⁵TOPA thukhun singkuangpi giahphual sung a tun ciangin Israel khempeuh nakpitakin awng uh a, lei a ling hi.

⁶Philistia-te in mipi otna za uh a, "Hebrew-te giahphuala kikona bang hiam?" ci-in a dong uh hi. Amaute in TOPA singkuangpi giahphual a tun lam a theih uh ciangin

⁷Philisita-te lau uh a, "Giahphual sungah pasian khat tung khin hi. Ei aa in lungkhamhuai hi! Hih bang a piang ngei nai kei hi.

⁸Gim thuak hi ta hang! Hih a thahat pasiante khut panin eite kuan hong hu ding ahi hiam; amaute, sehnel gam sungah gimna namkim tawh Egypt-te a vat pasiante ahi uh hi.

⁹Philistia-te aw, thahat un! "Kipasalsak un, tua hi kei leh amaute ei nasem a suah bangun Hebrew-te nasem na suak kha ding uh hi. Kipasalsakin do un!" a ci uhhi.

¹⁰Tua ciangin Philistia-te in simin Israel-te zo uh a, miteng amaute puanbuk ah a tai uh hi. Kithahna nasia lua a; Israel in khe galkap tul sawmthum a taan hi.

¹¹Pasian singkuangpi kiman a, Eli tapate, Hophni le Phinehas a si uh hi.

¹²Tua ni mah in Benjamin-te khat gal mai pan tai-in Shiloh ah pai-a a puansilhte kekgawp-in a lutungah leivui a baang hi.

¹³Amah a tun ciangin Eli in a lungsimin Pasian singkuangpi laupih ahi manin lampi gei-ah a tutphahin tu-a, a na khuadakdak hi. Mipa khua sunga lutin thupiangsa teng a gen ciangin khuapi buppi a kiko henhan uh hi.

¹⁴Eli in tua patauhna aw a zak ciangin, "Hih gamlumna aw bang ahi hiam?" ci-in a dong hi. Mipa manlangin Eli kiangah tunga

¹⁵tua hunin amah kum sawmkua le kum giat pha ta-a, a mit maangin khua a mu thei nawn kei hi.

¹⁶Amah in Eli kiangah, "Kei galmai pana hong paikhia phet ka hi a; tuni mahmah in tua pana hong taikhia ka hi hi," ci-in a gen hi. Eli in, "Ka tapa aw, bang piang ahi hiam?" ci-in a dong hi.

¹⁷Thuthak tun mipa in "Philistia-te mai panin Israel tai-a, galkapte in nak lelh mahmah uh hi. Na tapa nihte Hophni le Phinehas zong si uh a, Pasian singkuangpi hong kimatsak ta hi," ci-in a dawng hi.

¹⁸Pasian singkuangpi a lawhkhak ciangin lampi gei-a a tutphah nunglam ah a thalkiat hi. Amah teekta in gik ahi manin a ngawng kitanin a si hi. Amah in Israel kum sawmli sung a makaih b[16] hi.

¹⁹A monu Phinehas zi gai-a a suak kuan ta ahi hi. Pasian singkuangpi kimatna, a tekpa le a pasal sihna a zak ciangin nausuah natna in tuna ta a suak hi, ahi hangin nausuah nat a do zo kei hi.

²⁰Amah si dektak a, amah a don numeite in, "Lungneu kei in, tapa khat na nei khin hi," a ci uh hi. Ahi hangin amah in thudon zolo-a a dawng kei hi.

²¹Tuanu in, Pasian singkuangpi kimatna le a tekpa le a pasal sihna hangin - "Minthanna in Israel nusia khin ta hi," a cih nopna-in a naupang min Ichabod c[17] a phuak hi.

²²Tuanu in, "Pasian singkuangpi kiman ta ahi manin minthanna in Israel nusia khin ta hi," a ci hi.