Read Zokam 1 Samuel 9 Bible Online

1 Samuel 9 - Zokam bible

1 Samuel 9

¹Tua hunin Benjamin pan Aphiah’ tapa Becorath, a tapa Zeror, a tapa Abiel, a tapa Kish min nei mite muan Benjamin-te khat a om hi.

²Amah in Saul min nei tapa khat nei a, Israel-te lakah amah tawh a kikim om loin - a dangte sangin a liangko tungsiahin a sangzaw hi.

³Tu-in Saul’ pa Kish laate mang a, Kish in a tapa Saul kiangah, "Nasemte khat tonpih inla i laate va zong un," a ci hi.

⁴Tua ciangin Ephraim mualtung gam teng le Shalisha kual kim teng a phaksuak uh hangin a mu kei uh hi. Shaalim gamkhen ciang dong a zonbeh lai uh hangin tua lai-ah laate a om kei hi. Tua ciangin Benjamin gam dong nawksuak uh a, a mu tuan kei uh hi.

⁵Zuph gamkhen a tun uh ciangin Saul in a tonpih a nasempa kiangah, "Hong pai ou, i ciah kik kei leh ka pa a laate lunghimawh nawn loin ei hong lunghimawh kha ding hi," a ci hi.

⁶Ahi hangin nasempa in, "En in, hih khua sungah Pasian mipa khat a om hi; amah kizahtak mahmah a, a gen peuhmah tung hi. Tu-in tua lai-ah pai ni. Amah in i pai nading lam hong gen thei kha ding hi," ci-in a dawng hi.

⁷Saul in a nasempa kiangah, "Pai lehang tua mipa bang pia ding i hi hiam? I ippi-a i an puak lah beita hi. Pasian mipa kianga i ken ding letsong i nei kei hi. Bang nei i hi hiam?" a ci hi.

⁸Nasempa in, "En dih in, ke’n ngun shekel a[28] sehli suah sehkhat ka nei hi. Pasian mipa in i pai nading lam hong gen nadingin tua amah ka pia ding hi," ci-in a dawng kik leuleu hi.

⁹(Tuhun-a kamsangte, thumute kici ahi manin tua nungsiah Israel sungah Pasian tungah na khatpeuh a dot nop leh, "Hong pai in, thumupa kiangah pai ni," a ci uh hi.)

¹⁰Saul in a nasempa kiangah, "Pha hi, hong pai in va pai ni," a ci hi. Tua ciangin Pasian mipa omna khua sungah a pai uh hi.

¹¹Khuapi zuana mualtungah a paitoh laitakun tui tawi dinga kuan numeino pawlkhat tawh kituak uh a, amaute kiangah, "Thumupa hiah a om na?" ci-in a dong uh hi.

¹²Amaute in, "Om mah na mai-uah pai hi. Kinawh un; tuni-in munsang ah mite in biakna pia ding uh ahi manin tu mahmah in ka khua uh hong tung hi.

¹³Munsang ah an ne dinga a pai ma-in khua sung na lut phetun amah na mu ding uh hi. Amah in biakpiakna thupha a piak kul ahi manin ama tun mateng mite in an a ne nai kei ding uh hi; tua khit ciangin a kisamte in an ne pan ding uh hi. Tu mahmah in pai to pah un; amah den mahmah ciangin na mu pah ding uh hi," ci-in a dawng uh hi.

¹⁴Khuapi manawhin pai to uh a, khua sunga a lut laitakun munsang a pai dingin amau lam manawhin Samuel a pai hi.

¹⁵Saul a kuan ma ni khat lai-in TOPA in Samuel tungah laak khin a:

¹⁶"Zingciang tu bang hunin Benjamin gam pan mi khat kong paisak ding hi; ka mi Israel tungah makai dingin sathau nilh in; amah in Philistia-te khut panin ka mite a hukhia ding hi. Ka mite kikona kei tung hong tung ahi manin amaute ka mu khin zo hi," a ci hi.

¹⁷Samuel in Saul a muh phetin TOPA in a kiangah, "A thu kong gen hih mipa ahi hi; amah in ka mite a uk ding hi," a ci hi.

¹⁸Saul in kongpi lampi a om Samuel lam manawh a, "Nong hehpihna in thumupa inn hong gen ve?" ci-in a dong hi.

¹⁹Samuel in, "Thumupa keimah ka hi hi. Munsang ah pai to ni, na masa un, tuni-in kei tawh an nekhawm un, zingsang ciangin na lungsim sungua om khempeuh kong gen dinga tua khit ciangin kong ciahsak pan ding hi.

²⁰A beisa nithum lai-a mang na laate uh lunghimawh kei un; kimu khin ta hi. Tuateh Israel khempeuh deih nang le na pa innkuan tung lo kua tung tu ahi hiam?" ci-in a dawng kik hi.

²¹Saul in, "Ahi hangin kei, Israel beh lakah a tawmpen Benjamin beh panin ko bawng’ a gina lo pen hi lo ka hi uh hiam? Bang hangin kei tungah tua bang hong ci na hi hiam?" ci-in a dawng hi.

²²Tua ciangin Samuel in Saul le a nasempa innpi sungah lutpih-a, sawmthum bang a pha - a kisamte tutna khungnungpen ah a tusak hi.

²³Samuel in anhuanpa kiangah, "Na tuam koih in, ci-a kong sa piak hong thuk dih in," a ci hi.

²⁴Tua ciangin anhuanpa in sakhe le tua tunga om sa khempeuh thukin Saul mai-ah a lui hi. Samuel in, "Hihte nang adingin a kikoihtuam ahi hi. ‘Lenglate kisam khin hi,’ a cih huna kipan hih an nek huna nang nek dingin a kituam koih ahi manin ne in," a ci hi. Tua ni-in Saul in Samuel tawh an a nekhawm hi.

²⁵Amaute munsang pan khuapi ah a paisuk khit uh ciangin Samuel in a innkhum tungah Saul a hopih hi.

²⁶Khuavak kuanin amaute tho uh a, Samuel in innkhum tungah Saul samin, "Kithawi un, kong ciahsak ta ding hi," a ci hi. Saul a kithawi khit ciangin amah le Samuel a pusuak khawm uh hi.

²⁷Amaute khuanawl a tunsuk laitakun Samuel in Saul kiangah, "Na nasempa i mai-ah madawksak in," ci a - nasempa zong na madawkin - "Pasian tung pana thu kong gen theih nadingin tawmvei sung na khawlpak dih in," a ci hi.