Read Zotung Chin GENESIS 1 Bible Online

GENESIS 1 - Zotung Chin bible

GENESIS 1

¹Athotakaw kya Pachia nynh vaaw te lae kha a rae,

²laephi tuh muinsan a hoi leipaw accakaepaw nynh thua, akhupaw rilipi kha mohnaw nynh phang a bong, te Pachia muisaw[1] tuh tui luki khe a pae.

³Oute Pachia nynh, “Awnaw um sah,” ci zah awnaw tuh a um.

⁴Pachia nynh awnaw tuh ahoy cite a muih; te awnaw kha mohnaw kyate a phia.

⁵Pachia nynh awnaw kha Khuadae, mohnaw kha Khuazi cite min a phu. Zete thang zah awkhua yn thua—tuh-e tuh nin kheitnaw nin nynh thua.

⁶Te Pachia nynh, “Tui angaelung khe myarya kopaw adawkuhpaw ccangkheit um sah, tuh-e nynh tui te tui kha phia hae sah,” a ci.

⁷Te Pachia nynh myarya kopaw adawkuhpaw kha rae zah, tuh-e luki umpaw tui te tuh-e kaw lang umpaw tui kha a phia hae thyhte a um vae.

⁸Te Pachia nynh myarya kopaw adawkuhpaw tuh Vaawlui cite min a phu. Zete thang zah awkhua yn thua—tuh-e tuh nin ningnaw nin nynh thua.

⁹Pachia nynh, “Vaawlui zakaw umpaw tui hynh san kheit kya pynkheihlan sueluakuh sah, aroupaw laelung kha langkuh sah,” cite kaw a pya thyhte acyihkuh vae.

¹⁰Pachia nynh aroupaw laelung kha Laephi cite minphu zah, pynkheihlan sueluakuhpaw tui kha Rili cite min a phu. Te Pachia nynh tuh-e tuh ahoy cite a muih.

¹¹Oute Pachia nynh, “Laephi vawlan hin thingku-ruaku aphuinphuin po sah: acii-amung umpaw aku hae, te laephi vawlan athae lungkhu amung umpaw thingku aphuinphuin po sah,” cite kaw a pya thyhte a cyihkuh vae.

¹²Tetuh laephi nynh thingku-ruaku aphuinphuin kha a posah vae: acii-amung umpaw aku phuin miakaw, te athae lungkhu amung umpaw thingku phuin miakaw kya-e thingku hae tuh a po vae hae. Pachia nynh tuh-e tuh ahoy cite a muih.

¹³Zete thang zah awkhua yn thua—tuh-e tuh nin thumnaw nin nynh thua.

¹⁴Te Pachia nynh, “Khuazi te khuadae kha phia khylan adawkuhpaw vaawlui kya awnaw um sah; tuh-e awnaw tuh muihsahnaw hae, nin hae, kum hae te kumvaelori kha khya khylan thua sah.

¹⁵Laephi vawlan awnaw pya khylan adawkuhpaw vaawlui kya awnaw um sah,” cite kaw a pya thyhte a cyihkuh vae.

¹⁶Te Pachia nynh myarya lepaw awnaw ccangning kha a rae, khuadae uktu lang khuanin kha rae zah, khuazi uktu lang sawpaw kha a rae, te awsi hae kha mah a rae.

¹⁷Pachia nynh laephi vawlan awnaw pya khylan,

¹⁸khuadae te khuazi kha uk khylan, te awnaw te mohnaw kha phia khylan tuh-e a aw hae paw kha adawkuhpaw vaawlui kyakhe a nung. Te Pachia nynh tuh-e tuh ahoy cite a muih.

¹⁹Zete thang zah awkhua yn thua—tuh-e tuh nin palinaw nin nynh thua.

²⁰Te Pachia nynh, “Tui kya ahiinpaw ahysuepaw aphuinphuin kha tui nynh pousah sah, te pavaw hae nynh laephi luki adawkuhpaw vaawlui khe zou bungthung hae sah,” a ci.

²¹Tuhcite rili lungkhu umpaw myarya lepaw ngasawpi hae te tui kya piathya zah ahiinpaw ahysuepaw aphuinphuin, te azouthyapaw pavaw aphuinphuin kha Pachia nynh a rae. Te Pachia nynh tuh-e tuh ahoy cite a muih.

²²Pachia nynh minmin kha, “Pungzae oh, lungthung oh lah rili tui kya phe beih oh, pavaw hae nynh laephi vawlan lungthung hae sah,” cite hythua a pya hae.

²³Zete thang zah awkhua yn thua—tuh-e tuh nin pangawnaw nin nynh thua.

²⁴Te Pachia nynh, “Laephi nynh ahiinpaw ahysuepaw aphuinphuin: sahiin aphuinphuin te loramsaw aphuinphuin te avawpaw aphuinphuin kha pousah sah,” cite kaw a pya thyhte a cyihkuh vae.

²⁵Pachia nynh laephi vawlan umpaw loramsaw aphuinphuin, te sahiin aphuinphuin, te laephi vawlan avawpaw atyn-are kha a rae. Te Pachia nynh tuh-e tuh ahoy cite a muih.

²⁶Oute Pachia nynh, “Ahmaw muinsan hawte, ahmaw oun lo lante ccungccaw kha rae oh sih; minmin nynh tui kya-e ngasaw hae thuasah, vaawlang e pavaw hae thuasah, sahiin hae thuasah, laephi kya-e loramsaw balyn thuasah, te laephi vawlan avawpaw miakaw thuasah uk hae sah,” cite kaw a pya.

²⁷Tuhcite Pachia nynh, ccungccaw[2] kha amaw muinsan alo lante a rae, minmin kha Pachia muinsan alo lante a rae hae; aning nynh pise te nopi kha a rae hae.

²⁸Pachia nynh minmin kha, “Pungzae oh lah lungthung oh, laephi kha phe beih oh lah laephi kha uk oh; te tui kya-e ngasaw hae, vaawlang e pavaw hae te laephi vawlan hiin zah apiathyapaw miakaw kha uk oh,” cite hythua a pya hae.

²⁹Pachia nynh, “Laephi vawlan balyn umpaw acii-amung hoipaw aku miakaw te athae lungkhu amung umpaw thingku miakaw kha kae pya vae oh; nanning nynh tuh-e hae tuh na ae cih oh.

³⁰Te laephi kya-e ramsaw miakaw, vaawlang e pavaw miakaw, laephi vawlan avawpaw atyn-are, hiinnaw hy a hoipaw atyn-are hanlan hinlalyhpaw aku miakaw kha ae lan ka pya vae hae,” cite kaw a pya thyhte acyihkuh vae.

³¹Pachia nynh a raepaw atyn-are kha myarya ahoy ccaccing cite a muih. Te zete thang zah awkhua yn thua—tuh-e tuh nin taruhnaw nin nynh thua.