Read Zotung Chin GENESIS 11 Bible Online

GENESIS 11 - Zotung Chin bible

GENESIS 11

¹Laephi vawlan ccungccaw balyn tuh bya phuin kheit kyalya la hoi hae zah alokuhpaw bya kha la ho hae.

²Nithua lang te la nuekuh hae zah Shinar ram abialaenaw san kheit kya la thua hae zah tuin kya khua la sah hae.

³Minmin nynh lu kheit te lu kheit hokuh hae zah, “Rang oh, anglae rae oh sih lah maee te hoyte rua oh sih,” a ciku hae. Te lung ccelang anglae kha mang hae zah bede nawlan bitumen kha a mang hae.

⁴Tukoute minmin nynh, “Rang oh, khuapi khua kheit rae oh sih, te adungpaccy te vaawlui phe phahpaw innhangpaw ccangkheit sak oh sih lah ahmaw hanlan minthaannaw rae oh sih; tuhkhyhze tuh laephi pynpi kya pong ah phiakusei cih oh,” a ciku hae.

⁵Te tuh-e ccungccaw hae nynh a rae hae paw khuapi te innhangpaw kha do khylan BAWIPAW tuh yn rungbung.

⁶BAWIPAW nynh, “Minmin tuh minphuin phuin kheit thua hae zah mih balyn te bya phuin kheit nynh a ho hae; te hynh-e hynh a cyi lan hae paw kyaze masaty nynh athua ung; cyi lan cite a tuaku hae paw kha minmin hanlan athua kho leipaw um vae lan khyh.

⁷Rang oh, rungbung oh sih lah, lu kheit te lu kheit bya a thaekuh khyh ccaw hae, mih bya kha laesah oh sih,” a ci.

⁸Tukeiccuze BAWIPAW nynh minmin kha tuin kyate laephi vawlan balyn phiasakuh hae zah khuapi kha rae leite a um vae hae.

⁹Tukeiccuze tuh-e khua min tuh Babel a ci hae, pawccecize tuin kyakhe BAWIPAW nynh laephi ccungccaw balyn kya-e bya kha laesah zah tuin kyate BAWIPAW nynh laephi vawlan balyn a phiasakuh hae.

¹⁰Hynh-e hae hynh Shem ciihan nynh thua hae. Tuipayn koute kum ning aro te Shem tuh kum za kheit cih zah ccapaw Arpachshad kha a saah;

¹¹Arpachshad a pui koute Shem tuh kum za pangaw hiin zah ccangpaw ccapaw hae te ccanung hae mah a saah.

¹²Arpachshad nynh sung thum kum pangaw acih te Shelah kha a saah;

¹³Shelah a pui koute Arpachshad tuh za pali kum thum hiin zah ccangpaw ccapaw hae te ccanung hae mah a saah.

¹⁴Shelah nynh kum sung thum acih te Eber kha a saah;

¹⁵Eber a pui koute Shelah tuh za pali kum thum hiin zah ccangpaw ccapaw hae te ccanung hae mah a saah.

¹⁶Eber nynh sung thum kum pali acih te Peleg kha a saah;

¹⁷Peleg a pui koute Eber tuh kum za pali sung thum hiin zah ccangpaw ccapaw hae te ccanung hae mah a saah.

¹⁸Peleg nynh kum sung thum acih te Reu kha a saah;

¹⁹Reu a pui koute Peleg tuh za ning kum takua hiin zah ccangpaw ccapaw hae te ccanung hae mah a saah.

²⁰Reu nynh sung thum kum ning acih te Serug kha a saah;

²¹Serug a pui koute Reu tuh za ning kum sari hiin zah ccangpaw ccapaw hae te ccanung hae mah a saah.

²²Serug nynh kum sung thum acih te Nahor kha a saah;

²³Nahor a pui koute Serug tuh kum za ning hiin zah ccangpaw ccapaw hae te ccanung hae mah a saah.

²⁴Nahor nynh kum kuin lae takua acih te Terah kha a saah;

²⁵Terah a pui koute Nahor tuh za kheit kum haw lae takua hiin zah ccangpaw ccapaw hae te ccanung hae mah a saah.

²⁶Terah nynh kum sung sari acih te Abram, Nahor, te Haran kha a saah hae.

²⁷Hynh-e hae tuh Terah ccaaw hae nynh thua hae. Terah nynh Abram, Nahor, te Haran kha a saah hae; te Haran tuh Lot a paaw nynh thua.

²⁸Haran tuh a puinaw Khaldi ccungccaw hae umnaw Ur khua kyakhe a paaw Terah a chi mawkhe a chih.

²⁹Abram te Nahor tuh zu a hoi hae; Abram zu min tuh Sarai thua zah Nahor zu tuh Haran ccanung Milkah nynh thua. Haran tuh Milkah te Isakah mih paaw nynh thua.

³⁰Sarai tuh tiin zah ccaawsaah khyh.

³¹Terah tuh a ccapaw Abram, te Haran ccapaw athuapaw a mintawpaw Lot, te a ccapaw Abram zu athuapaw a monung Sarai ryte Khaldi ram Ur khua kyate thokuh hae zah Kanaan ram lang pynkheihlan a cceih hae; thuasalama Haran khua a thua hae te tuin kya khua a sah hae.

³²Terah tuh za ning kum pangaw hiin zah Haran khua khe a chih.