Read Zotung Chin GENESIS 12 Bible Online

GENESIS 12 - Zotung Chin bible

GENESIS 12

¹BAWIPAW nynh Abram kha, “Na ram, na puizia hae te na paaw inn kyate pou lah, kae muihsah cih paw ram langkhe cciatua.

²Nang kha myarya lepaw minphuin lang kae rae cih, nang tuh hythua ccoupaw na thua nawlan na min kha kae thaansah cih zah hythua kae pya cih.

³Nang hythua ae pyapaw kha hythua ka pya cih zah nang thya ae lawpaw kha thya ka law cih; te laephi vawlan minphuin balyn tuh namaw liate hythuapya athua cih hae,” a cipya.

⁴Tukeiccuze BAWIPAW nynh a hopya hawte Abram nynh cceih zah Lot mah amaw kya a cceihbua. Haran kyate Abram a pou lya tuh sung sari kum pangaw acih vae.

⁵Abram nynh a zu Sarai, a neitaw ccapaw Lot, a hoi hae paw uccaw balyn, te minmin nynh Haran khua kya a mue hae paw mih see hae ryte Kanaan ram lang cceih hae zah tuh-e ram kya a thua hae.

⁶Abram tuh tuh-e ram kya po cceih zah Shekhem khua kya umpaw Moreh kya-e phaesi ku kya a thua. Tuh ccyh lya tuh tuh-e ram kya Kanaan ccungccaw hae a um hae.

⁷Te BAWIPAW nynh Abram kya yn langkuh zah, “E ram hynh na ciihan hae kalan ka pya cih hae,” a ci. Tukeiccuze Abram nynh amaw kya yn langkuhpaw BAWIPAW hanlan tuh-e hmin kya silawhang ccangkheit kha a rae.

⁸Tuin kyate Bethel khua nithua lang umpaw mua alungnaw ram lang nuekuh zah, niccaw lang umpaw Bethel khua te nithua lang umpaw Ai khua laku khe bu kha a sak; te tuin kyakhe BAWIPAW hanlan silawhang ccangkheit rae zah BAWIPAW min kha a ko.

⁹Te Abram tuh san kheit koute san kheit cceih zah Negeb pee kya a thua.

¹⁰Tuh-e ram kya ccakan yn ccih. Tukeiccuze Abram tuh ramccang ccungccaw lu kheit hawte sohsoh um khylan Izip ram lang a cceihbung, pawccecize tuh-e ram kya ccakan myarya a ccih.

¹¹Izip ram a teedyn hae khe Abram nynh a zu Sarai kha, “Nang tuh a puithyapaw nopi nynh na thua cipaw phe ka ny;

¹²Izip hae nynh nang kha he ae muih hae tuh, ‘E hynh a zu nynh thua,’ ae ci cih hae zah kae kha yn theih cih hae, thuasalama nang kha ae hiin cih hae.

¹³Tukeiccuze ‘A ccianung nynh ka thua’ na cipah cih hae zah namaw liate kae kha hoyte yn do-oih cih hae, te namaw liate ka hiinnaw kha yn haang cih hae,” a cipya.

¹⁴Abram nynh Izip ram he a tee tuh myarya puithyapaw a zu kha Izip hae nynh a muih hae.

¹⁵Faro siapharan kya ryalahtu bawi hae nynh a muih hae tuh a puithyanaw kong kha Faro kya a hopya hae. Te nopinung kha Faro inn lang a cciakhae hae.

¹⁶Sarai liate Faro nynh Abram kha hoyte a do-oih; te Abram tuh tuu hae, tangnuapaw hae, lanntepaw hae, seenung hae te seepaw hae, lann pinung hae te kalauh hae kha a hoi.

¹⁷Thuasalama Abram zu Sarai keiccuze BAWIPAW nynh Faro te a inn um hae paw kya shethya kha a sawnua hae.

¹⁸Tukeiccuze Faro nynh Abram kha ko zah, “Pawcce ka tungvaw hynh-e hynh na rae? ‘Aning tuh ka zu nynh thua,’ cite pawcce nae hopya khyh?

¹⁹Kae nynh aning kha zu lang ka umkhae ccaw cite pawcce ‘Aning tuh ka ccianung nynh thua,’ cite na ho? Na zu kha atu ko lah cceih oh,” a cipya.

²⁰Te Faro nynh Abram konglangte a ccungccaw hae kha kaw a pya hae; te minmin nynh Abram kha a zu te a hoipaw balyn ryte a deebia hae.