Read Zotung Chin GENESIS 13 Bible Online

GENESIS 13 - Zotung Chin bible

GENESIS 13

¹Abram tuh a zu, a hoipaw balyn, te Lot ryte Izip ram kyate Negeb lang a cceihthung.

²Abram tuh sahiin, phua te sui khate myarya a hoirum.

³Abram tuh Negeb kyate san kheit koute san kheit cceih zah Bethel pee, Bethel khua te Ai khua laku masaty bu la sakkuh zah,

⁴masaty silawhang a la raenaw hmin kya bua a thua; te tuin kyakhe Abram nynh BAWIPAW min kha a ko.

⁵Abram te a cceihkheih hae paw Lot nynh mah tuu, miaa, vaetua, te amaw kya umpaw ccungccaw hae kha a hoi,

⁶tukeiccuze minmin parouhte umkheih nawlan loram nynh zaw vae khyh, pawccecize mih hoirumnaw tuh eih lung zah pynkheihlan um kho vae khyh hae,

⁷te Abram sahiin a rintu hae te Lot sahiin a rintu hae laku pekunaw a um. Tuh ccyh lya tuh Kanaan ccungccaw hae te Periz ccungccaw hae nynh tuh-e ram kya a um hae.

⁸Te Abram nynh Lot kha, “Nang te kae laku thuasah, na sahiin rintu hae te ka sahiin rintu hae laku thuasah, pekunaw um nan sah; pawccecize aening tuh uno nynh ah thua.

⁹Ram balyn tuh na malang a um khaw? Nang tuh kamaw kyate phiakuh, nang nynh voilang na ccia ze kae tuh ranglang ka cceih cih; nang nynh ranglang na ccia ze kae tuh voilang ka cceih cih,” a cipya.

¹⁰Lot nynh do zah Jordan vahue Zoar khua lang ccianaw laanpi tuh BAWIPAW khokhu hawkhate thuasah, Izip ram hawkhate thuasah, pawpaw kya balyn tui hoyte a umpaw kha a muih. E hynh BAWIPAW nynh Sodom te Gomorrah khua hae a ro maw nynh thua.

¹¹Tukeiccuze Lot nynh Jordan vahue balyn kha pokuh zah nithua langkhe a cceih vae; tukeiccuze minmin tuh lu kheit te lu kheit a phiakuh vae hae.

¹²Abram tuh Kanaan ram khe khua a sah, Lot tuh Vahue kya umpaw khuapi hae kyakhe khuasah zah Sodom khua pe khe bu a sakku.

¹³Sodom khua e ccungccaw hae tuh ahoy lei hae paw te seinaw patae raete BAWIPAW a rawse hae paw nynh thua hae.

¹⁴Abram kyate Lot a phiakuh koute BAWIPAW nynh Abram kha, “Na umnaw hmin kyate nithua, niccaw, palung lang te alia langkhe dotua;

¹⁵na muihpaw ram balyn kha namaw te na ciihan hae hanlan zungzae kae pya cih.

¹⁶Na ciihan hae tuh laephi kya-e laenoi hawte ka lungsah cih hae; lukhakheit nynh laephi kya-e laenoi kha a ria kho zetuh na ciihan hae kha a ria kho cih.

¹⁷Thokuh lah laephi asae lante thuasah, ako lante thuasah po cciatua, pawccecize tuh-e tuh nang kae pya cih,” a cipya.

¹⁸Tukeiccuze Abram nynh a bu kha nue zah Hebron khua e Mamre kya-e phaesi ku hae pe khe khua a sah. Aning nynh BAWIPAW hanlan silawhang ccangkheit kha a rae.