Read Zotung Chin GENESIS 14 Bible Online

GENESIS 14 - Zotung Chin bible

GENESIS 14

¹Shinar siapharan Amrafel, Ellasar siapharan Ariok, Elam siapharan Khedorlaomer te Goiim siapharan Tidal tuh

²Sodom siapharan Bera, Gomorrah siapharan Birsha, Admah siapharan Shinab, Zeboiim siapharan Shemeber te Bela siapharan ryte rhaw a tukkuh hae (Bela tuh Zoar nynh thua).

³E siapharan lu pangaw nynh mih rhawkaw hae kha Siddim Vahue kya a suelua hae (Siddim Vahue tuh Rili Chihpaw nynh thua).[9]

⁴Minmin nynh Khedorlaomer kuihkaw kum haw lae ning a um hae, thuasalama kum haw lae thumnaw kya minmin nynh amaw kha a dou hae.

⁵Kum haw lae palinaw kyakhe Khedorlaomer tuh amaw te a pankheih hae paw siapharan hae ryte oun thua hae zah Ashteroth-karnaim khua kya Refaim hae kha thuasah, Ham khua kya Zuzim hae kha thuasah, Kiriathaim vahue kya Emim hae kha thuasah,

⁶Mua alungnaw Seir ram kya-e Hor hae kha thuasah tae hae zah laesia ram pe a umpaw Elparan khua cia a deehui hae;

⁷te minmin tuh ki hae zah Kadesh ram umpaw En-mishpat kya a thua hae, te Amalek hae ram balyn te Hazazontamar kya umpaw Amor hae kha mah a tae hae.

⁸Oute Sodom siapharan, Gomorrah siapharan, Admah siapharan, Zeboiim siapharan te Bela siapharan (Bela tuh Zoar nynh thua) nynh cceih hae zah Siddim Vahue khe

⁹Elam siapharan Khedorlaomer, Goiim siapharan Tidal, Shinar siapharan Amrafel te Ellasar siapharan Ariok kha a dou hae, siapharan lu pangaw te siapharan lu pali tuh a doukuh hae.

¹⁰Siddim Accya tuh bitumen hunghua te phe abeih; tukeiccuze Sodom te Gomorrah siapharan hae nynh a ccue lya hae khe abang tuh tuh-e hunghua lungkhu lang a ccah hae, tuhlaepaw hae tuh mua lang a ccue hae.

¹¹Tukeiccuze rhaw hae nynh Sodom te Gomorrah kya umpaw uccaw te looh balyn kha lah hae zah a cceih hae;

¹²rhaw hae nynh Sodom khua kya umpaw Abram a neitaw ccapaw Lot te a uccaw hae kha mah lah hae zah a cciakhae hae.

¹³Oute tuh-e rhaw kyate a luepaw lu kheit tuh yn thua zah Hebru paw Abram kyakhe tuh-e kong kha a hopya, Abram tuh Amor paw Mamre kya-e phaesi ku hae pe khuasahpaw nynh thua, Mamre tuh Eshkol te Aner mih upaw thua zah, tuh-e hae tuh Abram te a hobung hae paw nynh thua hae.

¹⁴Abram nynh a neitaw ccapaw phe kyng hae cipaw he a thae tuh a inn kya pui hae zah a ccangpya hae paw ccungccaw za thum lu haw lae tarya kha cciakhae hae zah Dan khua cia a deehui hae.

¹⁵Abram nynh khuazi khe a ccungccaw hae kha phia hae zah rhaw hae kha a tuk hae, amaw te a ryalahtu hae nynh rhaw hae kha tuk hae zah Damaskas khua palung lang umpaw Hobah cia a deehui hae.

¹⁶Oute aning nynh rhaw hae nynh a lua hae paw uccaw balyn kha thuasah, a neitaw ccapaw Lot te a uccaw hae kha thuasah, nopi hae te ccungccaw hae kha thuasah bua a kikhae hae.

¹⁷Abram nynh Khedorlaomer te Khedorlaomer ryte a pankheih hae paw siapharan hae kha tae hae zah he yn ki tuh, Sodom siapharan nynh Shaveh Vahue kya Abram te tungku khylan a cceih (Shaveh Vahue tuh Siapharan Vahue nynh thua).

¹⁸Te Ahang Huaccepaw Pachia kya-e ranpibawi a thuapaw Salem Siapharan Melkhizedek nynh sanlou te misutui kha yn ccyng zah,

¹⁹“Vaaw te lae raetu Ahang Huaccepaw Pachia nynh Abram kha hythuapya sah;

²⁰te na rhaw hae kha na kuih kalan ae pyatu Ahang Huaccepaw Pachia tuh thehoyte um sah!” cite hythua a pya. Te Abram nynh atyn-are kya-e pumhaw pumkheit kha amaw kalan a pya.

²¹Oute Sodom siapharan nynh Abram kha, “Ccungccaw hae kha kamaw kalan bua yn pya, thuasalama uccaw hae kha tuh lawkuh,” a cipya.

²²Te Abram nynh Sodom siapharan kha, “Vaaw te lae raetu Ahang Huaccepaw BAWIPAW Pachia malang thyalawkute bya ka kinkuh zah,

²³‘Abram tuh ka hoirumsahpaw nynh thua,’ cite na ho khyh nawlan law syngtarawpaw thuasah, phanah rui ruikheit thuasah, na kya-e pawpaw sanmah ka lawkuh lan khyh, cite a hopya.

²⁴Pawpaw mah ka lawkuh lan khyh, thuasalama ka ccungccaw hae nynh a ae vae hae paw te kae cceihkheihpaw Aner, Eshkol, te Mamre nynh mue lan accan hae paw uccaw hae kha thang nynh ka lawkuh cih. Minmin nynh mue lan accan hae paw kha lawkuh hae sah,” a ci.