Read Zotung Chin GENESIS 15 Bible Online

GENESIS 15 - Zotung Chin bible

GENESIS 15

¹Tukoute BAWIPAW bya tuh Abram kalan vizin lante yn thua zah, “Abram, na thinphang nan sah, kae tuh nang ae thungkhawpaw nynh ka thua; na lasung tuh myaryamaw ale cih,” a cipya.

²Thuasalama Abram nynh, “Pou Bawipaw PACHIA, kae tuh ccaawsaah leipaw ka thua keiccuze pawmou nae pya cih? Ka rhoccoutu tuh Damaskas khuapaw Eliezer nynh thua,” a cipya.

³Te Abram nynh, “Ciihan nae pya khyh, tukeiccuze ka inn kya a puipaw see lu kheit tuh ka rhoccoutu athua cih,” a ci.

⁴Thuasalama BAWIPAW bya tuh amaw kalan yn thua zah, “E paw tuh na rhoccoutu thua lan khyh, thuasalama na ccapaw ccaccei nynh na rhoccoutu athua cih,” a ci.

⁵Te Abram kha atolang poukhae zah, “Vaawlui khuh dotua lah awsi hae khuh na ria kho ze riatua. Na ciihan hae tuh khuh-e awsi zeih acih cih hae,” a cipya.

⁶Abram nynh BAWIPAW kha zyn zah tuh-e a zynnaw tuh BAWIPAW nynh dingnaw lang a riapya.

⁷Te BAWIPAW nynh Abram kha, “E ram hynh rho lang na ccou ccaw cite nang kha pya khylan Khaldi ccungccaw hae umnaw Ur khua kyate ae pousahpaw BAWIPAW nynh ka thua,” a ci.

⁸Abram nynh, “Bawipaw PACHIA, tuh-e ram tuh ka ccou cih cipaw pawtemou ka nyh cih?” a ci.

⁹BAWIPAW nynh Abram kha, “Kum thum cih paw vaetua tohlaw sa kheit, kum thum cih paw miaa nopi sa kheit, kum thum cih paw tuu pise sa kheit, vahu sa kheit te anopaw valaele sa kheit kha kamaw kalan yn thuakhae,” a cipya.

¹⁰Aning nynh tuh-e balyn tuh Pachia kalan thuakhae zah a theih koute ccangning cci lang ccarou a bua hae, tuh-e a bua hae paw tuh a hawiliakuh lante a nung hae, thuasalama pavaw hae kha tuh ccangning lang bua khyh hae.

¹¹A nungpaw saw hae kha sawhe aepaw pavaw hae nynh he a zounua hae tuh Abram nynh a dee hae.

¹²Khuanin he ccah zah Abram tuh marya a ihtheih, te ri lan um zah marae mohpaw mohnaw tuh Abram kya a ccah.

¹³Te BAWIPAW nynh Abram kha, “Na ciihan hae tuh milae ram kya ramccang ccungccaw lang a tang cih hae, tuin kya see lang a tang cih hae zah kum za pali lungkhu vawsaw pyanaw a ing cih hae cipaw ccaerarih lan nytua.

¹⁴Thuasalama minmin rya a lawsahtu hae paw minphuin kha de ka tah cih hae, tuh-e koute minmin nynh hoirumnaw patae te a pou cih hae.

¹⁵Nang tuh na minpaaw hae kalan daenaw te na cceih cih, te phe na taw te uu na thua cih.

¹⁶She palinaw kya na ciihan hae tuh hynh-e ram kalan a ki cih hae, pawccecize Amor ccungccaw hae cyiseimenaw tuh phe ccing loh khyh,” a cipya.

¹⁷Te khuanin ccah zah he yn moh tuh maeekhuh poupaw maee-ang ccangkheit te aruapaw maee tung ccangkheit oun langkuh hae zah abuakuhpaw saw hae laku khe a cceih hae.

¹⁸Tuh-e nin khe BAWIPAW nynh Abram kya byakinnaw rae zah, “E ram hynh na ciihan hae ka pya hae, Izip vaw kyate vawpi athuapaw Zufrates kyacia,

¹⁹Ken hae ram, Keniz hae ram, Kadmon hae ram,

²⁰Hit hae ram, Periz hae ram, Refaim hae ram,

²¹Amor hae ram, Kanaan hae ram, Girgash hae ram te Jebus hae ram kha ka pya hae,” a ci.