Read Zotung Chin GENESIS 17 Bible Online

GENESIS 17 - Zotung Chin bible

GENESIS 17

¹Abram sung takua kum takua he cih tuh BAWIPAW nynh amaw kya langkuh zah, “Kae tuh Athunghuapaw Pachia nynh ka thua; ka malang khe cceih lah ccaenaw um lei lante um.

²Nang te kae laku ka byakinnaw kha ka rae cih zah nang kha kae pungthungsah cih,” a cipya.

³Te Abram nynh ccukharutungte a bakhung;

⁴Pachia nynh, “Hynh-e hynh na hanlan ka byakinnaw nynh thua: Nang tuh minphuin patae hae thokeinaw paaw na thua cih.

⁵Na min tuh Abram[12] thua vae leite Abraham[13] na cikuh vae cih; pawccecize nang kha minphuin patae hae thokeinaw paaw lang kae rae vae.

⁶Nang kha myaryamaw a pungzaepaw lang kae rae cih; na kyate minphuin hae ka rae cih zah siapharan hae kha na kyate oun langkuh cih hae.

⁷Ka byakinnaw tuh kae te nang laku, namaw koute na ciihan hae mih she takyh kya ka tynsah cih, pawccecize namaw te na ciihan hae Pachia ka thua cih, tuh-e tuh zungzae tynpaw byakinnaw nynh thua.

⁸Atu ramccang ccungccaw lang na tangnaw oh Kanaan ram balyn hynh nang te namaw koute na ciihan hae kalan zungzae hanlan kae pya cih oh; te kae tuh mih Pachia ka thua cih,” a ci.

⁹Pachia nynh Abraham kha, “Nang te she takyh e na ciihan hae nynh ka byakinnaw hynh na zui cih oh.

¹⁰Hynh-e tuh kae, nang te namaw koute na ciihan hae laku umpaw na zui lan oh paw ka byakinnaw nynh thua: Nanning laku e pise miakaw tuh vingdung na awkuh cih oh.

¹¹Nae vingdung e ngesaw kha na awkuh cih oh, tuh-e tuh kae te nang laku byakinnaw muihsahnaw athua cih.

¹²Nae she takyh kya-e ccapise miakaw, nae inn e see kyate a puipaw thuasah, nae ciihan athua leipaw ramccang ccungccaw kya-e phua te na re oh paw lukhakheit thuasah, nin tarya he acih te vingdungaw athua cih.

¹³Nae inn e see kyate a puipaw te nae phua te na re oh paw kha vingdungaw athua cih hae. Tukeiccuze nae ngesaw kya ka byakinnaw tuh zungzae tynpaw byakinnaw athua cih.

¹⁴Vingdungawkuh leipaw ccapise humhung zemah a minphuin kyate vua athua cih; pawccecize aning nynh ka byakinnaw kha phe a ro vae,” a cipya.

¹⁵Pachia nynh Abraham kha, “Na zu Sarai kha Sarai cite na ko vae lan khyh, a min tuh Sarah[14] a cikuh vae cih.

¹⁶Sarah kha hythua ka pya cih zah amaw kyate ccapaw lu kheit kae pya cih. Aning kha hythua ka pya cih zah aning tuh minphuin hae nung athua cih; ccungccaw a uktu siapharan hae kha amaw kyate oun langkuh cih hae,” a cipya.

¹⁷Te Abraham tuh baling zah a nuin, te Abraham nynh, “Kum za kheit acih vae paw pise nynh ccaawsaah kho ung vema? Kum sung takua acih vae paw Sarah nynh ccaawsaah kho ung vema?” cite amaw te amaw kha a ciku.

¹⁸Te Abraham nynh Pachia kha, “Ishmael tuh namaw mitmuihnaw kya hiin vae sah,” a ci.

¹⁹Pachia nynh, “Tuhte thua khyh, na zu Sarah nynh ccapaw lu kheit ae saahpah cih zah Isak[15] cite min na phu cih. Amaw te amaw koute a ciihan hae hanlan zungzae tynpaw byakinnaw lang ka byakinnaw kha ka tynsah cih.

²⁰Ishmael konglang te na bya kha kae thaepya vae; amaw kha hythua ka pya cih, ka pungthungsah cih zah myarya ka lungthungsah cih; aning tuh bawi lu haw lae ning hae paaw athua cih zah minphuin lepaw lang ka rae cih.

²¹Thuasalama khuavae atu ccyh kya Sarah nynh ae saahpah cih paw Isak kyakhe ka byakinnaw kha ka tynsah cih,” a cipya.

²²Pachia te Abraham byahokuh kou hae te, Pachia nynh Abraham kha a cciataw vae.

²³Oute a ccapaw Ishmael, a inn e see hae kyate a pui hae paw balyn, a phua te a re hae paw balyn, te a inn kya umpaw pise hae laku e ccapise miakaw kha Pachia nynh a hopya thyhte Abraham nynh mih vingdung kha tuh-e nin ccaccei khe a aw hae.

²⁴Abraham a vingdungaw athua lya tuh sung takua kum takua acih vae.

²⁵A ccapaw Ishmael a vingdungaw athua lya tuh kum haw lae thum acih vae.

²⁶Tuh-e nin ccaccei khe Abraham te a ccapaw Ishmael tuh vingdungaw athua hae;

²⁷a inn kya puipaw see pise hae te ramccang ccungccaw kya-e phua te re hae paw pise hae, a inn e pise hae balyn tuh amaw ryte vingdungaw athua hae.