Read Zotung Chin GENESIS 18 Bible Online

GENESIS 18 - Zotung Chin bible

GENESIS 18

¹BAWIPAW tuh Abraham kya Mamre kya-e phaesi ku hae pe khe a langkuh, ninthu khuaninso lyakhe Abraham tuh a bu thuakawzung kya a dahung.

²Abraham nynh dothung zah amaw pe a thadynpaw pise hae lu thum kha a muih hae. Aning nynh minmin kha he a muih hae tuh tungku khylan a bu thuakawzung kyate ccue zah laephi kya a bakhung.

³Abraham nynh, “Ka bawipaw, na malang maehoynaw ka mue zetuh na seepaw kae hynh kawtawte yn cciataw nan.

⁴Tui beihtaraw kae lah hin sah, te nae ccu kha singkuh oh lah thingku kaw haeung oh.

⁵Na seepaw kamaw kalan nae thua keiccu vae oh ze, na ae lan oh paw sanlou beihtaraw kae lah hin sah, nae thawbangpaw hoy hin sah, tukoute na cceih cih oh,” a cipya hae. Tukeiccuze minmin nynh, “Na ho vae hawte cyih,” a cipya hae.

⁶Abraham tuh bu lungkhu umpaw Sarah kalan arangte tee zah Sarah kyakhe, “Ahoypaw vaekhui pung sung thum kha non lah sanlou lang arangte raetua,” a cipya.

⁷Abraham nynh vaetua phu kalan ccue zah ahoypaw te athopaw vaetuataw sa kheit kha lah zah a seepaw kalan pya zah arangte ang a hynsah.

⁸Oute samateitui ahaawpaw, samateitui te a paccyn vae paw vaetuataw a saw kha yn ccyng zah mih malang a nyapya hae; minmin nynh thingku kaw a ae lya hae khe mih pe khe a thadyn.

⁹Minmin nynh Abraham kha, “Na zu Sarah teimou um?” a ci hae. Te aning nynh, “Bu lungkhu nynh um,” a cipya hae.

¹⁰Oute minmin kya-e lu kheit nynh, “Khuavae atu ccyh kya na kalan solei kae thua ung cih, te na zu Sarah nynh ccapaw lu kheit a saah cih,” a cipya. Sarah nynh tuh-e paw a nulang thuakawzung kyate bya kha a ngae.

¹¹Abraham te Sarah tuh mih kum tang vae zah a taw vae hae; Sarah tuh nopiny mah nyh vae khyh.

¹²Tukeiccuze Sarah nynh nuin zah, “Kae mah ka taw vae zah ka vawpaw mah a taw vae, hoysahnaw tuh ka hoi ung vema?” cite amaw te amaw kha a ciku.

¹³BAWIPAW nynh Abraham kha, “Pawcce Sarah nynh nuin zah, ‘Phe ka taw vae zah imua tuh ka saah ccaccing ung vema?’ a ci.

¹⁴BAWIPAW hanlan pawpaw uccaw mah eih ru cipaw a um tou? Accyh yn zaw te khuavae atu ccyh kya na kalan bua kae thua cih zah Sarah nynh ccapaw lu kheit a saah cih,” a cipya.

¹⁵Thuasalama Sarah nynh a ri keiccuze, “Ka nuin khyh,” cite a pheiku. Aning nynh, “Mang na nuin,” a ci.

¹⁶Oute tuh-e ccungccaw hae nynh tuin kyate pou hae zah Sodom khua langkhe dote a cceih hae; te Abraham tuh minmin kha dohaw khylan mih kya a cceihbua.

¹⁷BAWIPAW nynh, “Ka rae lanpaw hynh Abraham kya ka phei cih tou?

¹⁸Abraham tuh myarya lepaw te athawsaepaw minphuin athua cih zah, laephi vawlan minphuin balyn tuh amaw liate hythuapya athua cih hae.

¹⁹Adingpaw te ahmepaw raenaw liate BAWIPAW laanpi kha zui khylan Abraham nynh a ccaaw hae te amaw koute a innbyn hae kha a ccangpya ccaw hae cite amaw kha ka po vae, tuhcite BAWIPAW nynh Abraham kya bya a kinpyaku thyhte a rae cih,” a ci.

²⁰Oute BAWIPAW nynh, “Sodom te Gomorrah khua e thethyanaw tuh myarya le zah mih seinaw mah myarya alung.

²¹Ka cceih cih zah kamaw kalan yn thuapaw mih thethyanaw thyhte minmin nynh a cyih hae tou, cyih khyh hae tou cipaw ka do cih; a cyi khyh hae ze a cyi khyhnaw hae kong kha ka nyh cih,” a ci.

²²Tukeiccuze tuh-e ccungccaw hae tuh tuin kyate pou hae zah Sodom khua langkhe a cceih hae, tuh ccyh lya Abraham tuh BAWIPAW malang phang a thadyn.

²³Tukoute Abraham nynh BAWIPAW kalan naekuh zah, “Ading hae paw kha ccungccaw hoylei hae ryte na rohkheih ccaccing cih hae tou?

²⁴Khuapi lungkhu miding sung pangaw a um lanze na roh cih tou? Tuh-e khua lungkhu um hae paw miding sung pangaw liate tuh-e khua kha ngaethya leite na roh cih tou?

²⁵Miding hae kha ccungccaw hoylei hae hawte athua khyh nawlan hae, miding hae kha tuh-e hae ryte chiakheih lanpaw tuh namaw kyate sawkuh sah. Laephi pynpi Byapiatu nynh ahmete byapia lan khyh tou?” a ci.

²⁶Te BAWIPAW nynh, “Sodom khua khe miding sung pangaw ka muih lanze tuh-e miding hae liate tuh-e hmin balyn tuh ka ngaethya cih,” a ci.

²⁷Abraham nynh, “Kae tuh laenoi te buhhaw ka thua zemah Bawipaw kalan rawhoyte kae ho sah.

²⁸Miding sung pangaw thua leite sung pali lu pangaw a um lanze pawte athua cih? Lu pangaw azyahua keiccuze khuapi balyn kha na roh cih tou?” a ci. Te Bawipaw nynh, “Tuin kya sung pali lu pangaw ka muih zetuh ka roh lan khyh,” a ci.

²⁹Abraham nynh, “Tuin kya sung pali na muih lan zeso?” cite bua a ho. Bawipaw nynh, “Sung pali hae liate khua kha ka roh lan khyh,” a ci.

³⁰Te Abraham nynh, “Bawipaw, na thinria nan sah, ka ho ung cih. Tuh-e khua kya sung thum a um lan zeso?” cite a ci. Bawipaw nynh, “Tuin kya sung thum ka muih zemah ka roh lan khyh,” a ci.

³¹Abraham nynh, “Bawipaw kalan rawhoyte kae ho sah, tuh-e khua kya lu kuin na muih lan zeso?” a ci. Bawipaw nynh, “Lu kuin hae liate khua kha ka roh lan khyh,” a ci.

³²Te Abraham nynh, “Bawipaw, vaekheit ka ho ung cih, na thinria nan sah. Tuh-e khua kya lu haw na muih lan zeso?” a ci. Bawipaw nynh, “Lu haw hae liate khua kha ka roh lan khyh,” a ci.

³³Te BAWIPAW tuh Abraham te bya a hokuh kou hae te a cceih vae; Abraham mah a umnaw lang a ki vae.