Read Zotung Chin GENESIS 19 Bible Online

GENESIS 19 - Zotung Chin bible

GENESIS 19

¹Vaawpaw lu ning tuh zetesang khe Sodom khua a thua hae, Lot tuh Sodom khua koikua kya a la haung. Lot nynh minmin kha he a muih hae tuh cciadue khylan thokuh zah laephi kya a bakhung.

²Lot nynh, “Ka bawipaw oh, nae seepaw inn lang tee oh lah, khuazi rya oh, nae ccu kha singkuh oh; te awkhua takaw te na tho cih oh zah na cceih cih oh,” a cipya hae. Minmin nynh, “Kae tee lan khyh, khuazi khualae lungkhu kya nynh kae rya cih,” a ci hae.

³Thuasalama Lot nynh thawte a soihbia hae keiccuze Lot inn lang cceih hae zah a tee hae; te Lot nynh minmin hanlan ransi phing leipaw sanlou kha thoupah hae zah minmin nynh a ae hae.

⁴Thuasalama minmin a i maw hae khe Sodom khua e pise hae, pise adih ale balyn nynh inn kha a koihlu hae;

⁵Lot kha ko hae zah, “Atu khuazi na kalan oun thua hae paw pise hae kha teimou um hae? Minmin te kae ikheih ccaw, kae kalan yn poukhae hae,” a ci hae.

⁶Lot nynh thuakaw kyate tuh-e pise hae kalan atolang pou zah thuakaw kha a khaw,

⁷te Lot nynh, “Uteno hae, hoyleinaw hynh beih rae nan oh cite kae ngia oh.

⁸Pise te a ikheih loh lei hae paw ccanung lu ning ka hoi, minmin kha nanning kalan kae cciakhae hae sah lah, minmin kyakhe nae rythyte rae oh; hynh-e pise hae kya pawpaw mah cyih nan oh, pawccecize minmin tuh ka mikhia hae thua hae zah ka thungkhaw lan hae paw nynh thua,” a ci.

⁹Thuasalama minmin nynh, “Cceih, khawkuh nan!” a ci hae. Tukoute minmin nynh, “Ramccang ccungccaw hawte nae thuapaw nang nynh byapiatu lang nae tansaku. Atu minmin tungvaw laeze namaw tungvaw accihhua lante kae cyih vae cih,” a ci hae. Te minmin nynh Lot kha ccaring eih hae zah thuakaw kha ro khylan thuakaw pe lang oun naekuh vae hae.

¹⁰Thuasalama alungkhu e vaawccungccaw hae nynh mih kuih kha dyng hae zah Lot kha inn lungkhu lang sue hae zah thuakaw kha a khaw hae.

¹¹Te thuakaw pe um hae paw pise adih ale hae kha mih mit a mohsah hae, tukeiccuze minmin nynh thuakaw kha muih kho vae khyh hae.

¹²Vaawccungccaw hae nynh Lot kha, “Hynh-e kya ccangpaw na ccungccaw lukhakheit a um ung tou? Na ccapaw hae, na ccanung hae, na ccanung hae mih vawpaw hae, te khua kya-e na ccungccaw athuapaw miakaw kha hynh-e kyate poukhae hae.

¹³Pawccecize hynh-e hmin hynh kae roh cih. E ccungccaw hae nynh BAWIPAW rawsete a siaruanaw hae tuh BAWIPAW malang myarya ale vae, tukeiccuze BAWIPAW nynh Sodom khua ro khylan kaening hynh oun saw vae,” a ci hae.

¹⁴Tukeiccuze Lot nynh atolang pou zah a ccanung hae kha zu lang a dy hae paw a paepaw hae kha, “Thokuh oh, hynh-e hmin kyate pou oh; pawccecize BAWIPAW nynh khuapi hynh a roh vae cih,” a cipya hae. Thuasalama minmin nynh a ccyasahpaw cite a tua hae.

¹⁵Awkhua takaw he yn thua tuh vaawccungccaw hae nynh Lot kha hopah hae zah, “Thokuh, hein kya umpaw na zu te na ccanung lu ning kha ko hae lah pou oh, tuhkhyhze tuh khuapi detahnaw kya maemih na thua vae cih oh,” a ci hae.

¹⁶Thuasalama Lot tuh rarymamaw a um, te BAWIPAW nynh Lot kha ngaethyaumsah keiccuze vaawccungccaw hae nynh amaw, a zu, te a ccanung lu ning kha mih kuih te sue hae zah khuapi atolang a poukhae kou hae te tuin kya a cciataw hae.

¹⁷Vaawccungccaw hae nynh minmin kha khuapi atolang he thuakhae hae te, vaawpaw nynh, “Nae hiinnaw hanlan ccue oh; nulang do nan oh, pawpaw Vahue kya sanmah thadyn nan oh; mua lang ccue oh, tuhkhyhze tuh na maemih cih oh,” a cipya hae.

¹⁸Te Lot nynh minmin kha, “Ka bawipaw hae, tuhte thua khyh;

¹⁹nae seepaw kae tuh nae malang maehoynaw ka mue, te myarya ngaethya nae um sah oh zah, ka hiinnaw kha nae khum vae oh; thuasalama mua lang tuh ka ccue kho lan khyh, pawccecize ronaw nynh yn thuanua cih zah ka chihsei cih cipaw kha ka rih.

²⁰Dotua, khuh-e khua tuh nae zah ccue kho a ung cih, adihpaw khua mah athua. Khuh-e khua lang beih kae ccuesah lah khuh-e khua tuh adihpaw khaw athua? Khuh-e khua taraw kalan ka ccue zetuh ka hiinnaw kha khum athua cih,” a ci.

²¹Aning nynh Lot kha, “Myarya hoy, nae ngiapaw kha kae ua cih zah na hopaw khua kha ka roh lan khyh.

²²Rangsakuh, na lue ccaw, tuh-e khua kalan ccue, pawccecize tuin kya na thua makhia pawpaw mah ka cyih kho khyh,” a ci. Tukeiccuze tuh-e khua tuh Zoar[16] a ci hae.

²³Lot nynh Zoar khua he athua tuh laephi vawlan khuanin phe thuabia vae.

²⁴BAWIPAW nynh vaawlui luki Amaw kyate kemaee kha Sodom te Gomorrah kya khuaa lang a rawsah;

²⁵BAWIPAW nynh tuh-e khuapi hae thuasah, Vahue balyn kha thuasah, khua hae kya umpaw ccungccaw balyn kha thuasah, laephi kya a popaw miakaw kha thuasah pong a ro.

²⁶Lot zu tuh nulang do zah loi tung lang phe tang.

²⁷Awkhua takaw khe Abraham tuh BAWIPAW malang a la thadynnaw hmin kalan a cceih.

²⁸Oute aning nynh Sodom te Gomorrah te Vahue balyn kha do zah maeephupi kya-e maeekhuh hawte a pouthungpaw laephi kya-e maeekhuh kha a muih.

²⁹Tuhte Pachia nynh Vahue e khua hae kha he a roh tuh Abraham kha a liathui, tukeiccuze Lot nynh khua a la sahnaw khua hae kha Pachia nynh he a roh tuh ronaw lungkhu kyate Lot kha a pousah.

³⁰Te Lot nynh Zoar khua kyate cceihthung zah mua kyakhe a ccanung lu ning ryte a um hae, pawccecize aning nynh Zoar khua kya um lan a rih; tukeiccuze a ccanung lu ning ryte lungkarung kya a um hae.

³¹Te atawccanung nynh asoinung kha, “Ah paaw tuh a taw vae, te laephi phung thyhte aening kha zu lang oun dy lanpaw pise laephi vawlan um vae khyh.

³²Yn cceih, ah paaw hynh misutui niasah sih, ah paaw ciihan kha tynsah khylan amaw kha ikhae sih,” a ci.

³³Tukeiccuze tuh-e khuazi khe minmin nynh mih paaw kha misutui a niasah hae; te atawccanung tuh a paaw te a ihkheih hae; atawccanung nynh a ihbuapaw te a thopaw kha a paaw nynh nyh khyh.

³⁴Awkhualan khe atawccanung nynh asoinung kha, “Atazi khe kae tuh ka paaw te kae ihkheih vae; atu khuazi mah misutui niasah sih, te ah paaw ciihan kha tynsah khylan amaw te ihkheih oh,” a cipya.

³⁵Tukeiccuze minmin nynh tuh-e khuazi khe mah mih paaw kha misutui a niasah hae; te asoinung nynh thokuh zah a paaw te a ihkheih hae; asoinung nynh a ibuapaw te a thopaw kha a paaw nynh nyh khyh.

³⁶Tukeiccuze Lot ccanung hae tuh parouh mawte mih paaw liate ccaaw a poi vae hae.

³⁷Atawccanung nynh ccapise saah zah Moab[17] cite min a phu; aning tuh atu Moab minphuin hae mih thokeinaw paaw nynh thua.

³⁸Asoinung nynh mah ccapise saah zah Ben-ammi[18] cite min a phu; aning tuh Ammon minphuin hae mih thokeinaw paaw nynh thua.