Read Zotung Chin GENESIS 20 Bible Online

GENESIS 20 - Zotung Chin bible

GENESIS 20

¹Abraham tuh Mamre kyate Negeb ram lang cceih zah Kadesh te Shur laku khe a um. Gerar khua kya ramccang ccungccaw hawte a um lyakhe,

²Abraham nynh a zu Sarah kong kha, “Aning tuh ka ccianung nynh thua,” cite a ho. Te Gerar siapharan Abimelek nynh Sarah kha a kosah hae.

³Thuasalama khuazi Abimelek a maan kyakhe Pachia nynh langkuh zah, “Nang tuh na umkhaepaw nopi keiccuze na chih cih; pawccecize aning tuh vawpaw hoi vae paw nynh thua,” cite Abimelek kha a cipya.

⁴Abimelek nynh Sarah kha ikhae loh khyh; tukeiccuze aning nynh, “Bawipaw, seinaw hoi leipaw ccungccaw hae kha na roh cih tou?

⁵Abraham nynh, ‘Aning tuh ka ccianung nynh thua,’ a ci khaw? Te nopinung ccaccei nynh, ‘Aning tuh ka raepaw nynh thua,’ a ci. Hynh-e hynh adingpaw ka thinlung te athyaapaw ka kuih te nynh ka cyi,” a cipya.

⁶Te Pachia nynh Abimelek a maan kyakhe, “Athua, adingpaw na thinlung te nynh hynh-e hynh na cyi cipaw ka ny; tuh apiaze kamaw kha rawsete na sei khyh nawlan kae tuh ae thungkhawpaw nynh ka thua. Tukeiccuze aning kha kae ty sah khyh.

⁷Atu Abraham zu kha amaw kalan bua pya ccavae; pawccecize aning tuh profeh nynh thua, aning nynh namaw hanlan saw ae sangpah cih zah na hiin cih. Thuasalama nang nynh amaw kha bua na pya khyh zetuh nang te na umkheih oh paw balyn na chih ccaccing cih oh cipaw kha nytua,” a cipya.

⁸Tukeiccuze Abimelek nynh awkhua takaw te tho zah a see hae balyn kha ko hae zah hynh-e acyihkuhpaw balyn kha a hopya hae; te minmin tuh myarya a rih hae.

⁹Te Abimelek nynh Abraham kha ko zah, “Kae tungvaw na raepaw hynh pawmou athua? Na tungvaw paw ka sei keiccu mou hynhcih alepaw hoyleinaw hynh ka tungvaw te ka peenaw kya nae thuakhaepya? Nang nynh cyi lan accan leipaw uccaw hae kha ka tungvaw phe na cyi vae,” a cipya.

¹⁰Te Abimelek nynh, “Paw na tua keiccu mou e uccaw hynh na cyi?” cite Abraham kha a cipya.

¹¹Abraham nynh, “E kya umpaw balyn tuh Pachia rih khyh hae zah ka zu keiccuze kamaw kha yn theih cih hae cite ka tua pawte nynh e hynh ka cyi.

¹²Te Sarah tuh ka ccianung ccaccing nynh thua, ka paaw ccanung nynh thua, thuasalama ka nung ccanung thua khyh; te aning tuh ka zu lang yn tang.

¹³Te Pachia nynh ka paaw inn kyate he yn khiasakuh te, Sarah kha, ‘E hynh ka tungvaw na cyi lanpaw thawccinaw nynh thua: ah ccianaw hmin takyh kya, Aning tuh ka raepaw nynh thua cite na ho cih,’ ” ka cipya.

¹⁴Oute Abimelek nynh tuu hae, vaetua hae, seenung hae te seepaw hae kha cciakhae zah Abraham kha a pya, te a zu Sarah kha mah bua a pya.

¹⁵Abimelek nynh, “Na muihpaw loram hynh ka ram nynh thua; na lungrynaw kya khuasah,” a cipya.

¹⁶Aning nynh Sarah kha, “Dotua, na raeepaw kha ngunphua thong kheit ka pya vae; tuh-e tuh nang te na umkheih oh paw ccungccaw balyn malang na thyaa cite langsakunawpaw nynh thua; nang tuh phe na thyaa ccaccing,” a cipya.

¹⁷Te Abraham nynh Pachia kalan sawsang zah Pachia nynh Abimelek, a zu te a seenung hae kha dansah hae zah ccaaw a saah hae.

¹⁸Pawccecize Abraham zu Sarah keiccuze Abimelek inn kya umpaw nopi balyn kha BAWIPAW nynh pong a tingsah hae.