Read Zotung Chin GENESIS 21 Bible Online

GENESIS 21 - Zotung Chin bible

GENESIS 21

¹BAWIPAW tuh a la ho vae hawte Sarah kya a thua, te BAWIPAW nynh byakinpyaku thyhte Sarah hanlan a cyipya.

²Abraham phe a taw vae khe Sarah nynh ccaawpoi zah Pachia nynh a la hopaw ccyh kyakhe ccapaw lu kheit a saahpya.

³Sarah nynh a saahpyapaw a ccapaw kha Abraham nynh Isak cite min a phu.

⁴Te Abraham nynh a ccapaw Isak tuh nin tarya he acih te, Pachia nynh kaw a la pya thyhte a vingdung kha a aw.

⁵A ccapaw Isak a pui lya Abraham tuh kum za kheit acih vae.

⁶Sarah nynh, “Pachia nynh nuinnaw yn pya vae; tuh-e kong a thaepaw miakaw nynh kamaw ryte a nuin cih hae,” a ci.

⁷Tukoute “Sarah nynh ccaaw kha matei a zusah cih cite hum nynh mou Abraham kalan a hopah boi? Thuasalama phe a taw vae khe, amaw hanlan ccapaw lu kheit ka saahpya vae,” cite Sarah nynh a ci.

⁸Imua tuh yn le zah matei phia athua; te Abraham nynh Isak kha matei phia athua nin khe poi pi kha a tua.

⁹Thuasalama Izip ccungccaw Hagar nynh Abraham hanlan a saahpyapaw ccapaw te Sarah a ccapaw Isak nynh a zue hae paw kha Sarah nynh a muih.

¹⁰Tukeiccuze Sarah nynh Abraham kha, “E seenung te a ccapaw hynh po dee hae; pawccecize e seenung a ccapaw hynh ka ccapaw Isak te rhoccoukheih lan khyh hae,” a ci.

¹¹A ccapaw konglang athua keiccuze tuh-e bya nynh Abraham kha myarya a lungvawsaw sah.

¹²Thuasalama Pachia nynh Abraham kha, “Imuapaw te na seenung keiccuze na lungvawsaw nan sah; Sarah nynh ae hopya thyhte cyitua, pawccecize Isak kya nynh na ciihan atyn cih.

¹³Seenung ccapaw mah minphuin ccangkheit lang ka rae cih, pawccecize aning tuh na ciihan nynh athuabua,” a ci.

¹⁴Tukeiccuze Abraham nynh awkhua takaw khe tho zah sanlou te saphua tui-ung te tui kaw kheit kha lah zah Hagar kha a pya. Te aning nynh tuh-e tuh Hagar a raw vawlan khangpah zah imua ryte a cciasah vae. Hagar nynh cceih zah Beersheba ramkaw khe a khiavuikuh.

¹⁵Saphua kya-e tui he athang tuh Hagar nynh imuapaw kha thabu kaw khe a nung.

¹⁶Oute Hagar nynh, “Imua a chipaw kha ka muih ry khyh,” cih zah kaih za kheit loukaw a sawnaw lang cceih zah imua te arawsekuh lante a dahung; aning nynh a dahung lyakhe thawmawte a rah.

¹⁷Te Pachia nynh imuapaw roi kha a thae; te vaawlang te Pachia vaawpaw nynh Hagar kha ko zah, “Hagar, pawcce na lungriathae? Rih nan; pawccecize Pachia nynh imuapaw a umnaw kya-e a rawpaw roi kha a thae vae.

¹⁸Thokuh, imuapaw kha hang lah na kuih te pom, pawccecize aning kha minphuin lepaw lang ka rae cih,” a ci.

¹⁹Oute Pachia nynh Hagar mit kha awsah zah aning nynh tuisung ccangkheit kha a muih. Hagar nynh cceih zah saphua tui-ung kyakhe tui phe beih lan the zah imuapaw kha a niasah.

²⁰Pachia nynh imuapaw kha umkhae zah aning tuh a lethung; imuapaw tuh ramkaw khe khuasah zah li myarya kawthyapaw lang yn tang.

²¹Aning tuh Paran ramkaw khe khua a sah; te a nung nynh Izip ram e zu kha a dypya.

²²Abimelek ccyh lya, Abimelek te a rhawbawipaw Fikol nynh Abraham kha, “Na cyipaw balyn kya Pachia nynh ae umkhae;

²³tukeiccuze kamaw thuasah, ka ccaaw hae thuasah, ka ciihan hae thuasah, nae ling khyh nawlan, nang kha lungzite kae ccuepe hawte nang nynh kamaw kya thuasah, ramccang ccungccaw hawte na umnaw ram kya thuasah nae ccuepenaw lan atu Pachia malang byakinkuh,” a ci.

²⁴Te Abraham nynh, “Bya ka kinku,” a ci.

²⁵Abimelek see hae nynh a la luade hae paw tuisung ccangkheit kong a lung-ungnaw kha Abraham nynh Abimelek kha a hopya,

²⁶Abimelek nynh, “Tuh-e tuh hum nynh a cyih cipaw ka nyh khyh; nae hopah khyh zah atunin cia tuh-e tuh ka thae khyh,” a ci.

²⁷Te Abraham nynh tuu hae te vaetua hae kha Abimelek a pya, te mih lu ning te byakinnaw a rae hae.

²⁸Abraham nynh tuutaw sa sari kha tuuphu kyate ccanglang a phia hae.

²⁹Te Abimelek nynh Abraham kha, “Na phiapaw hynh-e tuutaw hae sa sari asuilan hynh pawmou athua?” cite a khia.

³⁰Abraham nynh, “E tuisung hynh kae nynh ka thaepaw cite ccaekia lang yn tangpya nawlan, e tuutaw sa sari hynh ka kuih kyate nae lawpakuh cih,” a cipya.

³¹Tuh-e hmin tuh Beersheba[19] cite a ko hae, pawccecize mih lu ning te tuin kya byakinnaw kha a rae hae.

³²Minmin nynh Beersheba kya byakinnaw a rae kou hae te, Abimelek te rhawbawipaw Fikol tuh cceih hae zah Filistin hae ram lang a ki vae hae.

³³Abraham nynh Beersheba kyakhe mangking ku kukheit ling zah, zungzae tynpaw Pachia, BAWIPAW min kha a ko.

³⁴Te Abraham tuh Filistin hae ram kya ramccang ccungccaw hawte khaw cia a um.