Read Zotung Chin GENESIS 25 Bible Online

GENESIS 25 - Zotung Chin bible

GENESIS 25

¹Abraham nynh ccangpaw zu a min Keturah cikuhpaw kha dy zah,

²Keturah nynh Zimran, Jokshan, Medan, Midian, Ishbak te Shuah kha a saahpya.

³Jokshan tuh Sheba te Dedan mih paaw nynh thua. Dedan ccapaw hae tuh Asshurim, Letushim, te Leummim nynh thua hae.

⁴Midian ccapaw hae tuh Efah, Efer, Hanok, Abida te Eldaah nynh thua hae. Tuh-e hae balyn tuh Keturah ccaawno hae nynh thua hae.

⁵Abraham nynh a hoipaw balyn kha Isak a pya.

⁶Thuasalama Abraham nynh amaw a hiin lyakhe a lovaenung te a saah hae paw ccapaw hae kha lasung pya hae zah a ccapaw Isak kyate asawnaw nithua lang umpaw ram kalan a cciasah hae.

⁷Abraham tuh za kheit sung sari kum pangaw cia a she sae.

⁸Abraham tuh a hiinkhua sae zah kou a tawthya, te accyh zaw tuh a chih. Amaw kha a ccungccaw hae kalan khe a sueluabua hae.

⁹A ccaaw hae Isak te Ishmael nynh Makpelah lungkaryn kyakhe a uu hae, tuh-e lungkaryn tuh Mamre nithua lang umpaw Hit ccungccapaw Zohar ccapaw Efron loo kya nynh a um,

¹⁰tuh-e loo tuh Abraham nynh Hit ccungccaw hae kyate a la repaw nynh thua. Tuin kyakhe Abraham tuh a zu Sarah te a uukheih hae.

¹¹Abraham a chih koute Pachia nynh a ccapaw Isak kha hythua a pya. Te Isak nynh Beer-lahai-roi khe khua a sah.

¹²E hae tuh Abraham ccapaw Ishmael ciihan nynh thua hae, Ishmael tuh Sarah seenung a thuapaw Izip ccungccanung Hagar nynh Abraham a saahpyapaw nynh thua.

¹³E hae tuh Ishmael ccapaw hae mih min thua zah mih puinaw azuiku thyhte nynh thua: Ishmael a ccatawccaw tuh Nebaioth nynh thua; te Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Nafish, te Kedemah nynh thua hae.

¹⁶E hae tuh Ishmael ccapaw hae mih min, mih khua te mih umnaw hmin thyhte thua zah, mih phin thyhte bawi lu haw lae ning nynh thua hae.

¹⁷(Ishmael tuh za kheit sung thum kum sari cia a she sae; aning tuh a hy thang zah a chih, te a ccungccaw hae kalan khe a sueluabua hae.)

¹⁸Ishmael ciihan hae tuh Havilah kyate Shur kyacia a um hae. Tuh-e ram tuh Izip ram nithua lang, Assiria lang ccianaw laanpi kya nynh a um; aning tuh a ccungccaw hae balyn pepan khe nynh a um.

¹⁹Abraham ccapaw Isak a ciihan hae tuh hynh-e hae nynh athua hae: Abraham tuh Isak a paaw nynh thua,

²⁰Isak nynh kum sung pali he acih te Rebekah kha a dy, Rebekah tuh Mesopotamia ram umpaw Aramean minphuin Bethuel ccanung thua zah Aram minphuin Laban ccianung nynh thua.

²¹Isak a zu tuh a tiin keiccuze Isak nynh BAWIPAW kalan saw a sang; BAWIPAW nynh a sawsangnaw kha thaepah zah a zu Rebekah tuh ccaaw a poi.

²²A lungkhu e imua hae tuh lu kheit te lu kheit a dyykuh hae; te a nung nynh, “Hynhcite a cyiku lanze pawcce ryakhae ka la hiin?” a ci. Tukeiccuze BAWIPAW kha khia khylan a cceih.

²³Te BAWIPAW nynh, “Na vue kya minphuin phuin ning a um, na saahpaw minphuin phuin ning hae tuh phia athua cih hae; lu kheit tuh ccangpaw lu kheit laeze a thawsaehua cih, atawccapaw nynh asoipaw kha rya a lawpah cih,” a ci.

²⁴Ccaaw pui ccyh yn zaw tuh a vue kya ccaawphei hae paw a la um hae.

²⁵Masaty a puipaw tuh se zah a pyn balyn tuh aming saepaw boeining nynh alo; tukeiccuze Esau cite min a phu hae.

²⁶Tukoute a neitaw he yn pui tuh a upaw Esau ccukhung kha phang a kyng; tukeiccuze Jakob cite min a phu hae. Minmin a pui lya hae tuh Isak tuh kum sung taruh acih vae.

²⁷Imua hae tuh he oun lethung hae zah Esau tuh sawkawthyapaw lang yn tang, rampou a huapaw lang yn tang. Jakob tuh daebabipaw thua zah bu kya a um thyapaw nynh thua.

²⁸Isak nynh Esau a kawpaw saw kha palei a ae keiccuze Esau kha a sungsah; thuasalama Rebekah nynh Jakob kha a sungsah.

²⁹Vaekheit tuh Jakob nynh bia ehang la sah lyakhe Esau tuh rampounaw kyate yn thua zah myarya a vuelaw.

³⁰Tukeiccuze Esau nynh Jakob kha, “Myarya ka vuelaw, asepaw aepaw abang kha beih yn dang,” a cipya. (Tukeiccuze Esau kha Edom[23] cite a ko hae.)

³¹Jakob nynh, “Ccatawccaw na thuanaw kha masaty yn zuapah,” a ci.

³²Esau nynh, “Ka chih vae cih; ccatawccaw thuanaw nynh kamaw hanlan ccungkianaw pawmou a um cih?” a ci.

³³Jakob nynh, “Masaty bya yn kinpakuh,” a ci. Tukeiccuze Esau nynh byakinpakuh zah ccatawccaw a thuanaw kha Jakob kalan phe a zua.

³⁴Oute Jakob nynh a pyapaw sanlou te bia ehang kha Esau nynh ae zah a nia, te thokuh zah a cceih vae. Tuhcite Esau nynh ccatawccaw a thuanaw kha pawlangria khyh.