Read Zotung Chin GENESIS 26 Bible Online

GENESIS 26 - Zotung Chin bible

GENESIS 26

¹Abraham she lya-e langmaw ccakannaw a pui apiaze tuh-e ram kya ccangpaw ccakannaw a pui. Tukeiccuze Isak tuh Filistin hae mih Siapharan Abimelek umnaw Gerar khua lang a cceih.

²BAWIPAW nynh Isak kya langkuh zah, “Izip ram lang cceihbung nan; kae muihsah cih paw ram kya khuasah tua.

³E ram kya ramccang ccungccaw hawte umtua, nang kha kae umkhae cih zah hythua kae pya cih; pawccecize e ram balyn hynh namaw te na ciihan hae kae pya cih oh zah na paaw Abraham kya ka kinkupaw byakinnaw kha ka ccingsah cih.

⁴Na ciihan tuh vaawlui e riatae lei awsi zeih kae pungzaesah cih zah, e ram balyn hynh ka pya cih hae; te laephi vaw e minphuin balyn tuh na ciihan liate hythuanaw a ccou cih hae,

⁵pawccecize Abraham nynh ka bya kha ngae zah ka kawbya hae balyn kha a zui,” a ci.

⁶Tukeiccuze Isak nynh Gerar kyakhe khua a sah.

⁷Tuh-e ram kya umpaw ccungccaw hae nynh a zu kong kha he khia hae ze, Isak nynh, “Aning tuh ka ccianung nynh thua,” a ci; pawccecize “Ka zu,” cite ho lan a rih, “Rebekah tuh a puithyapaw thua zah tuin ram e ccungccaw hae nynh Rebekah keiccuze kamaw kha yn theihsei cih hae,” cite a tuaku.

⁸Isak nynh tuin kya khaw a um tuh, a zu Rebekah te a balokuh hae paw kha Filistin hae Siapharan Abimelek nynh thanlan-aw kyate do zah a muih.

⁹Tukeiccuze Abimelek nynh Isak kha ko zah, “Rebekah tuh na zu khaw athua! Pawcce, ‘Aning tuh ka ccianung nynh thua,’ na ci?” cite a khia. Isak nynh, “Aning keiccuze ka chihsei cih cite ka tua keiccu nynh thua,” a cipya.

¹⁰Abimelek nynh, “Pawcce kae tungvaw hynhte na cyi? Lukhakheit nynh na zu kha zoikadeih lan a ikhaesei ze kae tungvaw hoyleinaw kha na thuakhae cih,” a ci.

¹¹Tukeiccuze Abimelek nynh ccungccaw balyn kha raeringnaw pya hae zah, “Humhung zemah e ccungccapaw hynh thuasah, a zu hynh thuasah a typaw tuh chia athua cih,” a ci.

¹²Isak nynh tuh-e ram kya ccacii ccou zah tuh-e kum kya aleit za kheit a rue. BAWIPAW nynh amaw kha hythuapya zah,

¹³Isak tuh a hoirum; aning nynh houhouh hoirum zah myarya a hoirumpaw lang a tang.

¹⁴Aning nynh tuuphu hae, vaetua phu hae te see patae a hoi keiccuze Filistin hae nynh a tungvaw eiungnaw a hoi hae.

¹⁵(A paaw Abraham she lyaze a paaw see hae nynh a la thae hae paw tuisung balyn kha Filistin hae nynh laephi phe beih lan a thei hae.)

¹⁶Te Abimelek nynh Isak kha, “Kaemaw kyate cceih ccavae; nang tuh kaening laeze eih na lesaehua vae,” a cipya.

¹⁷Tukeiccuze Isak nynh tuin kyate pou zah Gerar vahue kyakhe khua a sah.

¹⁸A paaw Abraham she lyaze la thae hae zah, Abraham he a chih te Filistin hae nynh laephi a la thei hae paw tuisung hae kha Isak nynh bua a thae; tuh-e tuisung hae kha a paaw nynh min a la phu hawte Isak nynh min a phu hae.

¹⁹Isak see hae nynh vahue kya he a thae hae tuh tuidy ccangkheit a muih hae,

²⁰Gerar khua e sahiin rintu hae nynh Isak sahiin rintu hae te pekuh hae zah, “Tui hynh kae tui nynh thua,” a ci hae. Tuhte minmin nynh amaw te a luakuh hae keiccuze Isak nynh tuh-e tuisung tuh Esek cite min a phu.

²¹Oute Isak see hae nynh ccangpaw tuisung bua thae hae zah, tuh-e tuisung mah bua a luakuh hae keiccuze Isak nynh Sitnah cite min a phu.

²²Aning nynh tuin kyate nuekuh zah ccangpaw tuisung kha a thae, tuh-e tuisung tuh luakuh vae khyh hae, tukeiccuze tuh-e tuisung tuh Rehoboth cite min a phu, te aning nynh, “BAWIPAW nynh aening hanlan umnaw hmin kha atu yn pya vae zah, e ram kya ah pungthung vae cih oh,” a ci.

²³Isak tuh tuin kyate Beersheba lang a cceihthung.

²⁴Te tuh-e khuazi ccaccei khe BAWIPAW nynh Isak kya langkuh zah, “Kae tuh na paaw Abraham Pachia nynh ka thua; rih nan, pawccecize nang kha kae umkhae zah, ka seepaw Abraham liate hythua kae pya cih zah na ciihan kha patae kae pungzaesah cih,” a cipya.

²⁵Tukeiccuze Isak nynh tuin kya silawhang ccangkheit rae zah BAWIPAW min kha a ko, te a bu kha tuin kya sak zah a see hae nynh tuisung ccangkheit a thae hae.

²⁶Oute Abimelek tuh tuanaw pyatu Ahuzzath, a rhawbawipaw Fikol ryte Gerar khua kyate Isak kalan a cceih hae.

²⁷Isak nynh minmin kha, “Nanning tuh kamaw kha nae hua oh zah nae kyate nae dee oh paw khaw na thua oh, pawccemou ka kalan nae ccia oh?” a ci hae.

²⁸Minmin nynh, “BAWIPAW nynh nang kha ae umkhae cipaw ccaerarih lan kae muih vae; tukeiccuze nang te kaening laku thyalawkute byakinnaw rae oh sih,

²⁹tuhteze nynh na tungvaw ahoy leipaw rae leite hoyte daenaw te kae cciasah hawte kaening tungvaw kya ahoy leipaw na rae lan khyh. Nang tuh BAWIPAW nynh hythua a pyapaw nynh na thua,” a cipya hae.

³⁰Tukeiccuze Isak nynh poi tuapah hae zah ae hae zah a neih hae.

³¹Minmin nynh awkhua takaw te tho hae zah lu kheit te lu kheit thyalawkute byakinnaw kha a rae hae; te Isak nynh minmin kha dohaw hae zah daenaw te a cceih vae hae.

³²Tuh-e nin khe Isak see hae nynh oun thua hae zah tuisung a thae hae paw kong kha Isak kyakhe, “Kaening nynh tui kae muih vae,” cite a hopya hae.

³³Aning nynh tuh-e tuisung kha Shibah cite min a phu; tukeiccuze tuh-e khua min tuh atunin cia Beersheba cite a ko hae.

³⁴Esau nynh kum sung pali he acih tuh Hit ccungccaw Beeri ccanung Judith te Hit ccungccapaw Elon ccanung Basemath kha zu lang a dy hae;

³⁵tuh-e nopi hae nynh Isak te Rebekah kha mih lungvawsaw sah hae.