Read Zotung Chin GENESIS 28 Bible Online

GENESIS 28 - Zotung Chin bible

GENESIS 28

¹Oute Isak nynh Jakob kha ko zah hythua a pya koute byatawsya zah, “Kanaan minphuin nopi kha zu lang na dy lan khyh.

²Mesopotamia ram umpaw na nung a paaw Bethuel inn lang la cceih lah, na nung a raeepaw Laban ccanung hae lu kheit kha zu lang na dy cih.

³Ccungccaw patae paaw na thua nawlan Athunghuapaw Pachia nynh hythua ae pyasah lah a pungzaepaw te myarya alungpaw lan ae rae vae sah.

⁴Pachia nynh Abraham a pyapaw ram, atu ramccang ccungccaw hawte na umnaw ram hynh na ram lang a tang nawlan, Abraham kya-e hythuanaw kha nang ae pya vae sah,” a ci.

⁵Tuhcite Isak nynh Jakob kha a cciasah; te Jakob nynh Mesopotamia ram umpaw Aramean minphuin Bethuel ccapaw Laban kalan a cceih. Laban tuh Esau te Jakob mih nung Rebekah a raeepaw nynh thua.

⁶Isak nynh Jakob kha hythuapya zah zudy lan Mesopotamia ram lang a cciasah cipaw kha Esau nynh a ny, te Isak nynh Jakob kha hythuapya zah, “Kanaan minphuin nopi kha zu lang na dy lan khyh,” cite bya a tawsyapaw te

⁷Jakob nynh a nung te a paaw bya kha ngae zah Mesopotamia ram lang a cceih cipaw kha Esau nynh a ny.

⁸Te a paaw Isak nynh Kanaan nopi hae kha ry khyh hae cipaw Esau nynh he a nyh tuh,

⁹Abraham ccapaw Ishmael a ccanung Mahalath cikuhpaw Nebaioth ccianung kha zu lang dy khylan Ishmael kalan a cceih, tuh-e nopinung tuh ccangpaw zu hae a hoi koute a dy chihpaw nynh thua.

¹⁰Jakob nynh Beersheba kha cciataw zah Haran khua lang a cceih.

¹¹Aning nynh hmin san kheit kya thua zah khuanin a ccaw vae keiccuze tuin kya a rya. Tuin kya umpaw lung ccangkheit kha lungngya lang ngya zah a ih.

¹²Te Jakob nynh maansah zah a maan kyakhe, nawkui ccangkheit tuh laephi vawlan duakuh zah adung tuh vaawlang phe a phah; Pachia kya-e vaawccungccaw hae nynh nawkui kya a kae, a rung bungthung hae.

¹³Te BAWIPAW nynh Jakob pe thadyn zah, “Kae tuh na paaw Abraham Pachia, Isak Pachia, BAWIPAW nynh ka thua; na inaw ram hynh namaw te na ciihan kalan kae pya cih oh;

¹⁴na ciihan tuh laephi vawlan laenoi hawte alung cih zah, nang tuh nithua lang, niccaw lang, alia lang, palung lang na pazaekuh cih; namaw te na ciihan liate laephi vawlan minphuin balyn tuh hythuapya athua cih hae.

¹⁵Nang kha kae umkhae zah na ccianaw takyh kya kae rin cih, te e ram lang bua kae kikhae cih; pawccecize bya kae kinpyakupaw kha ka cyi kou makhia nang kha kae cciataw lan khyh,” a cipya.

¹⁶Oute Jakob nynh a inaw kyate thaekuh zah, “E hmin kya BAWIPAW a um ccaccing, tuh-e tuh ka la nyh khyh,” a ci.

¹⁷Aning nynh rih zah, “E hmin hynh pawcih baban ri lan um! E hmin tuh ccangpaw thua khyh, Pachia inn te vaawram thuakaw nynh thua,” a ci.

¹⁸Tukeiccuze Jakob nynh awkhua takaw te tho zah lungngya lang a ngyapaw lung kha lah zah lungbing lang a bing koute adungparyh khe chitui a bu.

¹⁹Aning nynh tuh-e hmin kha Bethel cite min a phu; masaty lyaze tuh-e khua min tuh Luz a la cikuh.

²⁰Oute Jakob nynh byakinkuh zah, “Pachia nynh kae kha yn umkhae zah, ka ccianaw hynh-e laanpi kya yn do-oih zah, ae lanpaw sanlou te lawku lanpaw uccaw kha yn pya zah,

²¹ka paaw inn lang daebabi lan bua ka thua zetuh, BAWIPAW tuh ka Pachia athua cih zah,

²²lungbing lang ka bingpaw e lung hynh Pachia inn lang a tang cih; te nae pyapaw balyn kya-e pumhaw pumkheit kha kae pya ccaccing cih,” a ci.