Read Zotung Chin GENESIS 29 Bible Online

GENESIS 29 - Zotung Chin bible

GENESIS 29

¹Jakob nynh po cceih zah nithua lang umpaw ccungccaw hae ram kya a thua.

²Jakob nynh dothung zah loo kya tuisung ccangkheit te tuh-e pe a rya hae paw tuu sa thum kha a muih; pawccecize tuuphu kha tuh-e tuisung kya tui leih a niasah hae. Tuisung ahukuhpaw lung tuh myarya ale.

³Tuu hae balyn nynh tuin kya a tungkuh vae hae ze, tuurin hae nynh tuisung ahukuhpaw lung kha nue hae zah tuu hae kha tui a niasah hae, te lung kha a umnaw kya bua leih a nung hae.

⁴Jakob nynh minmin kha, “Ka u te ka neitaw hae, tei te mou nae thua oh?” cite khia hae zah, minmin nynh, “Haran khua te nynh kae thua,” a ci hae.

⁵Jakob nynh minmin kha, “Nahor ccapaw Laban kha na nyh oh tou?” cite khia hae zah, minmin nynh, “Kae nyh,” a ci hae.

⁶Te aning nynh, “Ngedante a um tou?” cite khia hae zah, minmin nynh, “A dan, a ccanung Rachel mah tuu hae ryte yn thua cih,” a cipya hae.

⁷Te Jakob nynh, “Khuanin myarya asae ung; sahiin hae kha pynkheihlan suelua ccyh thua loh khyh. Tuu hae hynh tui niasah oh, cceih oh lah, paeesakuh hin oh,” a cipya hae.

⁸Thuasalama minmin nynh, “Tuu hae balyn kha pynkheihlan kae suelua zah tuisung ahukuhpaw lung kha kae nue makhia tuh tui kae niasah kho khyh hae; lung kae nue koute nynh tuu hae kha tui kae niasah hae,” a ci hae.

⁹Tuhte aning nynh minmin ryte bya a hokuh cciamang lya hae khe Rachel tuh a paaw tuu hae ryte yn thua vae; pawccecize Rachel tuh a paaw tuu a rintu nynh thua.

¹⁰Jakob nynh a nung raeepaw Laban ccanung Rachel te a nung raeepaw Laban a tuu hae kha a muih tuh, cceihthung zah tuisung ahukuhpaw lung kha a nue, te a nung raeepaw Laban tuu hae kha tui a niasah hae.

¹¹Oute Jakob nynh Rachel kha myng zah thawte a rah.

¹²Te Jakob nynh Rachel kha, “Kae tuh na paaw ccianung Rebekah ccapaw nynh ka thua,” cite a hopya; Rachel nynh ccue zah, a paaw kha a hopya.

¹³Laban nynh a ccianung ccapaw kong kha a thae tuh, tungku khylan a ccuenua; Laban nynh aning kha pom zah a myng, te a inn lang a cciakhae. Jakob nynh Laban kha a konglang pong a hopya.

¹⁴Laban nynh Jakob kha, “Nang tuh ka ru te ka saw ccaccing nynh na thua,” a cipya. Te Jakob tuh Laban kya sawpaw sah kheit a umbua.

¹⁵Oute Laban nynh Jakob kha, “Nang tuh ka uno na thua keiccuze alakawte rya nae lawpya lan accan zawtou? Na ryalaw mee hohzeihmou?” a cipya.

¹⁶Laban tuh ccanung lu ning a hoi; atawccanung min tuh Leah cikuh zah asoinung min tuh Rachel acikuh.

¹⁷Leah mitdae tuh sungsah lan a um, thuasalama Rachel tuh a pynrua hoy zah a puithya.

¹⁸Jakob nynh Rachel kha a sungsah; tukeiccuze Jakob nynh, “Na ccasoinung Rachel hanlan kum sari rya kae lawpah cih,” a ci.

¹⁹Laban nynh, “Rachel hynh ccangpaw pise lukhakheit kha pya laeze nang kae pyapaw tuh ahoyhua; kamaw kya umbua,” a cipya.

²⁰Tukeiccuze Jakob nynh Rachel mue khylan kum sari rya a lawpya, Rachel tungvaw a hoipaw sungsahnaw keiccuze tuh-e kum sari tuh nin beihtaraw lan nynh a ria.

²¹Oute Jakob nynh Laban kha, “Kamaw te ikheih khylan ka zu kha yn pya ccavae, pawccecize accyh phe ccing vae,” a cipya.

²²Tukeiccuze Laban nynh a umnaw e ccungccaw hae kha pynkheihlan suelua hae zah poi a tua.

²³Thuasalama zete riryngmoh khe Laban nynh a ccanung Leah kha Jakob kalan a thuakhae; te Jakob nynh a ikhae.

²⁴(Laban nynh a seenung Zilpah kha a ccanung Leah hanlan a thosakhaeku).

²⁵Awkhua he thua tuh, Leah nynh athua cipaw Jakob nynh he nyh te, Laban kyakhe, “Pawcce ka tungvaw hynhte na cyi? Rya kae lawpyapaw kha Rachel mue khylan thua khyh tou? Pawcce nae ling?” a cipya.

²⁶Laban nynh khung zah, “Kaening ram kya tuh asoinung nynh atawccanung laeze tungtuh ty phung thua khyh.

²⁷Zuvaw lang na tangnaw oh hynh naw kheit ccing hin sah, te kum sari cia rya bua nae lawpya ung zetuh Rachel kha kae pya cih,” a cipya.

²⁸Jakob nynh a nawccah zah zuvaw lang a tangnaw hae kha naw kheit a ccingsah; tukoute Laban nynh a ccanung Rachel kha Jakob zu lang a pya.

²⁹(Laban nynh a seenung Bilhah kha a ccanung Rachel hanlan a thosakhaeku).

³⁰Tukeiccuze Jakob nynh Rachel kha mah a ikhae vae, te aning nynh Rachel kha Leah laeze a sungsahua. Jakob nynh Laban kha kum sari cia rya bua a lawpya.

³¹Jakob nynh Leah a sungsah khyhpaw kha BAWIPAW nynh he a nyh tuh, Leah kha ccaawsaah khonaw a pya; thuasalama Rachel tuh a tiin.

³²Leah nynh ccaawpoi zah ccapaw lu kheit a saah, a min tuh Reuben[24] cite a phu; pawccecize Leah nynh, “Ka vawsawnaw kha BAWIPAW nynh yn muihpya vae; tukeiccuze ka vawpaw nynh yn sungsah ccaccing vae cih,” a ci.

³³Leah nynh ccaaw bua poi zah ccapaw lu kheit saah zah, “Huanaw ka teingpaw kha BAWIPAW nynh thae zah, e ccapaw hynh mah yn pya,” cih zah Semeon[25] cite min a phu.

³⁴Aning nynh ccaaw bua poi zah ccapaw lu kheit saah zah, “Ccapaw lu thum ka saahpya keiccuze atu tuh ka vawpaw nynh kamaw kya ccavyng a mungkuh vae cih,” a ci; tukeiccuze Levi[26] cite min a phu.

³⁵Leah nynh ccaaw bua poi zah ccapaw lu kheit saah zah, “Atu tuh BAWIPAW kha the ka hoysah vae cih,” a ci; tukeiccuze Judah[27] cite min a phu; oute aning tuh a ccasaah ady vae.