Read Zotung Chin GENESIS 3 Bible Online

GENESIS 3 - Zotung Chin bible

GENESIS 3

¹BAWIPAW Pachia nynh a raepaw ccangpaw sarangpaw hae laeze hupaw tuh a thyaruh huapaw nynh thua. Hupaw nynh nopinung kha, “Pachia nynh, ‘Khokhu kya umpaw pawpaw thingthae mah na ae lan khyh oh,’ a ci ccaccing tou?” cite a ci.

²Te nopinung nynh hupaw kha, “Khokhu kya umpaw thingthae hae kha kae ae kho;

³thuasalama Pachia nynh, ‘Khokhu angaelung umpaw thingku kya-e thingthae tuh na ae lan khyh oh, tuhpiaze na ty lan khyh oh, tuhkhyhze tuh na chih cih oh,’ a ci,” cite a cipya.

⁴Thuasalama hupaw nynh nopinung kha, “Na chih lan khyh oh;

⁵pawccecize tuh-e thingthae kha na ae oh zetuh nae mit a aw cih, athya ahoy kha na nyh cih oh zah Amaw na lo lan oh paw kha Pachia nynh a ny,” a cipya.

⁶Tukeiccuze tuh-e thingku a thae tuh ae lan ahoy, duaa lan a um, te hawnaw mue nawlan ry lan umpaw thingku athuapaw kha nopinung nynh he a muih tuh, athae kha lokuh zah a ae, thingthae abang kha a vawpaw kalan pyabua zah a vawpaw nynh mah a ae.

⁷Oute parouhte mih mit tuh phae aw zah mih ccakaete a um hae paw kha a nyku hae; te minmin nynh eboh anaw hae kha biakuh hae zah cce kya khawkupaw uccaw lang a raeku hae.

⁸Zetesang khe minmin nynh khokhu kya BAWIPAW Pachia a cciapaw roi kha a thae hae, te pisepaw te a zu tuh BAWIPAW Pachia muihnaw kyate khokhu kya-e thingku hae laku khe a rekuh hae.

⁹Thuasalama BAWIPAW Pachia nynh pisepaw kha ko zah, “Teimou na um?” a ci.

¹⁰Pisepaw nynh, “Khokhu kya na roi kha ka thae, te ka ccakaete ka um keiccuze ka rih zah ka rekuh,” a cipya.

¹¹Pachia nynh, “Na ccakaete na um cipaw hummou ae hopah? Na ae lan khyh cite kaw kae pyapaw thingthae kha phe na ae vae tou?” cite a khia.

¹²Pisepaw nynh, “Kae te umkheih lan nae pyapaw nopinung nynh thingthae kha yn pya zah ka ae,” a cipya.

¹³Oute BAWIPAW Pachia nynh nopinung kha, “Pawcce hynhte na la cyi?” a ci. Te nopinung nynh, “Hupaw nynh yn ling zah ka ae,” a cipya.

¹⁴BAWIPAW Pachia nynh hupaw kha, “Nang nynh hynh-e hynh na cyi keiccuze sarangpaw hae balyn te ramkaw e ahysuepaw balyn laku thyalaw na thua; na vue te na vaw cih zah na hiin lungkhu balyn laenoi kha na ae cih.

¹⁵Nang te nopinung laku thuasah, na ciihan te a ciihan laku thuasah rawsekunaw ka nung cih; aning nynh na lu kha ae tude cih zah nang nynh a ccukhung kha na tuh cih,” a ci.

¹⁶Nopinung kha, “Na teing lanpaw ccaawpoinaw kya-e teingnaw kha myarya ka lesah cih; ccinaw teingte ccaaw na saah cih, thuasalama na vawpaw kha na ry ngaethae cih zah aning nynh nang kha ae uk cih,” a cipya.

¹⁷Te pisepaw kha, “Na zu bya kha na ngae zah ‘Khah-e thingthae kha na ae lan khyh,’ cite kaw kae pyapaw kha na ae keiccuze laephi hynh nang keiccuze thyalaw athua; na hiin lungkhu balyn laephi kya-e kha thawbangte ryalawkute na ae cih;

¹⁸laephi nynh na hanlan hinpaw ku aphuinphuin kha a posah cih; te loo kya-e athae te anaw kha na ae cih.

¹⁹Laephi kalan na kithui makhia na mae kyate na vaesaw a pou lante looh kha na ae cih, pawccecize laephi kyate rae na thua; nang tuh laenoi na thua zah laenoi kalan na kithui cih,” a ci.

²⁰Pisepaw nynh a zu kha Evi cite min a phu, pawccecize aning tuh ccungccaw balyn hae nung nynh thua.

²¹Te BAWIPAW Pachia nynh pisepaw te a zu hanlan saphua uccaw kha raepah hae zah a lawsaku hae.

²²Oute BAWIPAW Pachia nynh, “Pisepaw tuh aening kya-e lukhakheit hawte thua vae zah athya ahoy kha a ny vae; te aning nynh zungzae hiinnaw mue khylan a kuih kha a dyng cih zah hiinnaw thingku kya-e athae kha mah lokute a aesei cih,” a ci.

²³Tukeiccuze pisepaw tuh amaw yn thuanaw laephi kya ryalaw khylan BAWIPAW Pachia nynh Eden khokhu kyate a pousah.

²⁴Pachia nynh pisepaw kha dee zah hiinnaw thingku kalan cceihpaw laanpi kha khynsah khylan Eden khokhu nithua langkhe teitei lang balyn amiakuh khopaw maee thaloi te cherubim[3] hae kha a nung hae.