Read Zotung Chin GENESIS 30 Bible Online

GENESIS 30 - Zotung Chin bible

GENESIS 30

¹Rachel nynh Jakob hanlan ccaaw a saahpya khyhpaw kha he nyhkuh tuh, a unung tungvaw a eiung zah Jakob kha, “Ccaaw yn pya, tuhkhyhze ka chih vae cih,” a cipya.

²Jakob nynh Rachel tungvaw myarya a thinria zah, “Kae tuh ccaawsaahnaw kaw ae pya leipaw Pachia lang tou nae ria?” a cipya.

³Oute Rachel nynh, “Ka seenung Bilhah hein kya mang um; cceih lah ikhae tua, aning tuh ccaaw a saah kho, aning liate kae zemah ccaaw ka hoi kho,” a ci.

⁴Tukeiccuze aning nynh a seenung Bilhah kha Jakob zu lang a pya; te Jakob nynh seenung kha a ikhae.

⁵Bilhah nynh ccaawpoi zah Jakob kha ccapaw lu kheit a saahpya.

⁶Oute Rachel nynh, “Pachia nynh kamaw hanlan bya yn piapya vae, ka roi kha mah Pachia nynh yn thaepah zah ccapaw lu kheit yn pya vae,” a ci; tukeiccuze Dan[28] cite min a phu.

⁷Rachel seenung Bilhah nynh ccaaw bua poi zah Jakob kha lu ningnaw ccapaw a saahpya.

⁸Oute Rachel nynh, “Ka unung tae khylan ka zuakuh zah phe ka tae vae,” a ci; tukeiccuze Naftali[29] cite min a phu.

⁹Leah nynh a ccasaah ady vae paw kha he a nyhkuh tuh, a seenung Zilpah kha ko zah Jakob zu lang a pya.

¹⁰Tukoute Leah seenung Zilpah nynh Jakob kha ccapaw lu kheit a saahpya.

¹¹Te Leah nynh, “Ka vehoy,” a ci. Tukeiccuze Gad[30] cite min a phu.

¹²Leah seenung nynh Jakob kha lu ningnaw ccapaw a saahpya.

¹³Te Leah nynh, “Lungtuanung nynh ka thua! Pawccecize nopi hae nynh a lungtuanung cite yn ko cih hae,” a ci; tukeiccuze Asher[31] cite min a phu.

¹⁴Ccathae rue ccyh he thua tuh, Reuben nynh cceih zah loo kya mandarek kha muih zah a nung Leah kalan a thuakhae. Rachel nynh Leah kha, “Thawccinawte na ccapaw kya-e mandarek abang kha yn pyabua,” a cipya.

¹⁵Thuasalama Leah nynh, “Ka vawpaw na ccuekhaepaw hynh adihpaw uccaw thua zawtou? Ka ccapaw kya-e mandarek hynh mah ccuekhae na ry ung tou?” a ci. Rachel nynh, “Na ccapaw kya-e mandarek nae pya zetuh atu khuazi Jakob te na ihkheih cih oh,” a cipya.

¹⁶Zete ccyh kya Jakob nynh loo kyate he yn thua tuh, Leah nynh cciadue zah, “Kamaw kalan na ryabua cih; pawccecize nang kha ka ccapaw kya-e mandarek te phe kae hoh vae,” a cipya. Tukeiccuze tuh-e khuazi kya Jakob tuh Leah te a ihkheih hae.

¹⁷Pachia nynh Leah kha thaepah zah ccaaw a poi, te Jakob hanlan lu pangawnaw ccapaw a saahpya.

¹⁸Leah nynh, “Ka seenung kha ka vawpaw kalan ka pya keiccuze Pachia nynh amee yn pya,” a ci; tukeiccuze Issakhar[32] cite min a phu.

¹⁹Te Leah nynh ccaawpoi zah Jakob hanlan lu taruhnaw ccapaw lu kheit a saahpya.

²⁰Oute Leah nynh, “Ahoypaw lasung ccangkheit kha Pachia nynh yn pya; ccapaw lu taruh ka saahpya vae keiccuze ka vawpaw nynh kae kha yn thehoysah cih,” a ci; tukeiccuze Zebulun[33] cite min a phu.

²¹Tukoute Leah nynh ccanung lu kheit saah zah Dinah cite min a phu.

²²Oute Pachia nynh Rachel kha liathuite a bya ngaepah zah ccaawsaah khonaw a pya.

²³Aning nynh ccaawpoi zah ccapaw lu kheit saah zah, “Saryanaw ka teingpaw kha Pachia nynh yn lawpya vae,” a ci;

²⁴te Rachel nynh Josef[34] cite minphu zah, “BAWIPAW nynh ccangpaw ccapaw kha yn pya hin vae sah,” a ci.

²⁵Rachel nynh Josef he a saah tuh, Jakob nynh Laban kha, “Ka inn te ka ram lang yn cciasah ccavae.

²⁶Ka ryalaw mee ka zu hae te ka ccaaw hae kha yn pya hae lah, ka la cceih ccavae; pawccecize myarya hoy lan rya kae lawpyapaw kha phe na ny,” a ci.

²⁷Laban nynh Jakob kha, “Byahonaw kaw yn pyatua, BAWIPAW nynh namaw liate hythua yn pya cipaw ka ny;

²⁸na ryalaw mee hokuh lah kae pya cih,” a cipya.

²⁹Jakob nynh, “Pawcihtemou rya kae lawpya cipaw te pawcihtemou na sahiin hae hynh kamaw kya a um hae cipaw phe na ny.

³⁰Pawccecize ka thua maw tuh beihtaraw nynh na hoi, atu tuh myarya alungthung vae; te pawpaw kya ka ccia zemah BAWIPAW nynh nang kha hythua ae pya. Ka innbyn hae so hohtuhmou ka do-oih cih hae?” a cipya.

³¹Tukeiccuze Laban nynh, “Pawmou kae pya cih?” cite khia zah Jakob nynh, “Pawpaw mah nae pya lan khyh. E uccaw hynh nae cyipya zetuh na sahiin hae kha bua ka dang cih hae zah ka rin ung cih hae:

³²atunin na sahiin hae balyn laku ka la khiakuh cih zah apyaapaw te ccapoh-ccapoh apyaapaw tuu hae te man phaphuhpaw tuu taraw miakaw, te miaa hae lakuze apyaapaw te ccapoh-ccapoh apyaapaw miakaw kha ka phia cih hae zah tuh-e hae tuh ka ryalaw mee athua cih hae.

³³Te ka ryalaw mee kha do khylan nyalang he nae thua te, ka dingnaw nynh kamaw kha yn thungkhaw cih. Miaa hae lakuze apyaa leipaw te ccapoh-ccapoh apyaa leipaw miakaw, te tuu taraw hae lakuze man phaphuh leipaw miakaw kha he na muih zetuh ka rupaw athua cih,” a ci.

³⁴Laban nynh, “Ahoy! Na ho hawte thua vae sah,” a ci.

³⁵Thuasalama tuh-e nin khe Laban nynh ccapoh-ccapoh apyaapaw te apyaapaw miaatepaw hae te miaapinung hae, mih pyn kya apyaapaw miakaw te man phaphuhpaw tuu taraw miakaw kha a ccapaw hae a rinsah hae;

³⁶te Jakob umnaw te amaw umnaw kha nin thum laanccia a sawsakuh hae, te Laban kya-e alaepaw tuu hae te miaa hae kha Jakob nynh a rinbia hae.

³⁷Oute Jakob nynh poplar thing, almond thing te plane thing ahinpaw akaran hae kha lah hae zah akaloh he kia hae tuh araw lante apyaa vae hae.

³⁸Te tuu hae, miaa hae nynh tui nia lan oun ccia vae hae ze, sahpaw a dekuh ccaw hae cite tuh-e thingpyng hae kha sahiin tui nianawpaw kua malang khe a bing.

³⁹Tukeiccuze tuu hae, miaa hae nynh tuh-e akaran hae malang khe sahpaw dekuh hae zah apyaapaw, ccapoh-ccapoh pyaapaw, aphae lante pyaapaw lang a than vae hae.

⁴⁰Jakob nynh tuutaw hae kha phia hae zah Laban sahiin hae kya-e pong aman hae paw te apyaa hae paw kalan khe mih mae hawi sah hae; te a sahiin phu hae kha phia hae zah Laban sahiin hae te nungkheih khyh hae.

⁴¹Athawsaepaw sahiin hae nynh sahpaw he a ry vae hae ze, thingpyng hae laku khe sahpaw dekuh hae sah cite Jakob nynh thingpyng hae kha sahiin hae malang kua kyakhe a bingpya hae,

⁴²thuasalama anyaa hae paw nynh sahpaw a ry hae zetuh mih malang thingpyng kha nungpah khyh hae; tukeiccuze anyaa hae paw tuh Laban kya-e thua hae zah athawsae hae paw tuh Jakob kya-e nynh thua hae.

⁴³Tukeiccuze Jakob a hoirumnaw tuh lungthung zah sahiin phu patae, seepaw hae te seenung hae, kalauh hae te lann hae kha a hoi.