Read Zotung Chin GENESIS 31 Bible Online

GENESIS 31 - Zotung Chin bible

GENESIS 31

¹Laban ccapaw hae nynh, “Ah paaw uccaw balyn kha Jakob nynh pong a lawku vae; ah paaw uccaw te nynh e hoirumnaw balyn hynh a mue,” cite a ho hae paw kha Jakob nynh a thae.

²Te Laban mah langmaw hawte a mitmae hoy vae khyh cipaw kha Jakob nynh a muih.

³Oute BAWIPAW nynh Jakob kha, “Na minpaaw hae ram lang te na uno hae kalan ki ccavae, nang kha kae umkhae cih,” a ci.

⁴Tukeiccuze Jakob nynh ccungccaw saw zah a sahiin phu a paeenaw hmin kalan Rachel te Leah kha kosah hae zah,

⁵“Nae paaw tuh langmaw hawte ka tungvaw a mitmae hoy vae khyh cipaw ka muih. Thuasalama ka paaw a Pachia nynh kamaw kha yn umkhae.

⁶Ka thawzung balyn te nae paaw kha rya ka lawpya vae cipaw phe na ny oh;

⁷tuhzemah nae paaw nynh yn ling zah ka ryalaw mee kha vae haw yn hynpya, thuasalama ka tungvaw hoyleinaw rae lan Pachia nynh ua khyh.

⁸‘Ccapoh-ccapoh apyaa hae paw tuh na ryalaw mee athua cih,’ cih zah, sahiin phu balyn nynh ccapoh-ccapoh pyaapaw lang a than hae; te ‘Apyaa hae paw tuh na ryalaw mee athua cih,’ cih zah sahiin phu balyn tuh apyaapaw lang a than hae.

⁹Tuhcite Pachia nynh nae paaw kya-e sahiin-awvaw balyn kha lah zah kamaw kha yn pya.

¹⁰“Sahiin hae sahpaw a dekuh hae ccyh lyaze maan ka sah, ka maan kyaze, ngaw ka la do zah sahpawdepaw miaatepaw hae tuh apyaapaw, ccapoh-ccapoh pyaapaw te pyaari-pyaaraepaw athua hae paw kha ka la muih.

¹¹Oute ka maan kyakhe Pachia vaawpaw nynh, ‘Jakob,’ cite yn ko zah, ‘Hein kya mang ka um!’ ka cipya.

¹²Te aning nynh, ‘Dotua, sahpawdepaw miaatepaw balyn tuh apyaapaw, ccapoh-ccapoh pyaapaw te pyaari-pyaaraepaw cci nynh athua hae; pawccecize Laban nynh na tungvaw a cyisahnaw balyn kha ka muih vae.

¹³Kae tuh lungbing kha chitui na thuh zah kamaw kya bya na kinkunaw Bethel khua kyaze namaw kya a langkuhpaw Pachia nynh ka thua. Atu e ram hynh poutaw lah na puinaw ram lang ki ccavae,’ yn cipya,” cite a hopya hae.

¹⁴Oute Rachel te Leah nynh, “Kae paaw inn kya-e kae ccou lanpaw rho te neeku bua lanpaw paw sanmah a um zawtou?

¹⁵Kaening hynh ramccang ccungccaw hae lang oun riapaw kae thua khyh tou? Pawccecize kaening kha oun zua zah, oun zuanaw mee phua kha phe a mang vae.

¹⁶Pachia nynh kae paaw kyate a lawpaw sisua balyn tuh kaening te kae ccaaw hae kya-e nynh thua; tukeiccuze Pachia nynh ae hopyapaw miakaw kha cyih ccaleih,” a cipya hae.

¹⁷Tukeiccuze Jakob nynh thokuh zah a ccaaw hae te a zu hae kha kalauh hae tungvaw a ccisaku hae;

¹⁸te a sahiin hae balyn, a muepaw sisua balyn, Mesopotamia ram kya a muepaw sahiin hae kha Kanaan ram umpaw a paaw Isak kalan a cciakhae vae.

¹⁹Laban tuh a tuuming ngo lan a ccia loukaw khe Rachel nynh a paaw innbyn kya-e pachia hae kha a rupya.

²⁰Jakob nynh Aram ccungccapaw Laban kha ling zah ccue lan a paccynkupaw kha hopah khyh.

²¹Tuhcite Zufrates vaw kha zua zah Gilead mua langkhe a hoipaw balyn ryte a ccue.

²²Nin thumnaw nin khe Jakob phe ccue vae cipaw Laban kha a hopya hae.

²³Tukeiccuze a uno hae ryte nin sari deehui hae zah Gilead mua kyakhe Jakob kha a phya hae.

²⁴Thuasalama Pachia nynh Aram ccungccapaw Laban kalan khuazi a maan kyakhe yn langkuh zah, “Jakob kya athya ahoy bya kaw kheit sang na ho khyh nawlan raeringkuh,” a cipya.

²⁵Laban nynh Jakob kha he a phah tuh, Jakob tuh mua kya bu phe la sakkuh ty vae, te Laban nynh a uno hae ryte Gilead mua kya bu a sakku bua hae.

²⁶Laban nynh Jakob kha, “Pawcce hynhte na cyi? Nae ling zah ka ccanung hae tuh rhaw kya-e kyng hae paw hawte na cciakhae hae.

²⁷Kae kha nae ling zah hopya leite pawcce aruh lante na ccue? Nae hopya zetuh lungtuanaw te, hlaw te, tintang te tyng te kae cciasah cih paw.

²⁸Ka ccanung hae te ka mintaw hae kha pawcce beihsyate nae myngsah sya khyh hae? Na cyisahnaw hynh ngaeepaw nynh thua.

²⁹Na tungvaw vawsawnaw kae pya kho; thuasalama na paaw a Pachia nynh atazi khe, ‘Jakob kya athya ahoy na ho khyh nawlan raeringkuh,’ yn cipya.

³⁰Na paaw inn kha eih na ngae keiccuze na la cciapaw athua zeso pawcce ka pachia hae kha na ru?” a ci.

³¹Jakob nynh Laban kha, “Ka ri keiccu nynh thua, pawccecize na ccanung hae kha kamaw kyate nae luadesei cih cipaw ka tua.

³²Na pachia hae kha a tungvaw na muih biapaw humhung zemah chia thuasah. Kae uno hae mitmuihnaw kya na uccaw tuh ccungkuh lah lawkuh,” a cipya. Rachel nynh pachia hae a la rupaw kha Jakob nynh nyh khyh.

³³Tukeiccuze Laban nynh Jakob bu, Leah bu, seenung lu ning bu lungkhu lang tee zah a ccung, thuasalama a pachia hae kha muih khyh. Te aning nynh Leah bu kyate pou zah Rachel bu lungkhu lang a tee.

³⁴Rachel nynh innbyn pachia hae kha lah zah kalauh khungnin kya nung zah phang a dahungthin. Laban nynh bu kya pong a ccung, thuasalama muih khyh.

³⁵Rachel nynh a paaw kha, “Bawipaw, na malang ka thadyn kho khyhpaw na thinria nan sah, pawccecize nopiny ka ny ccyh nynh thua,” a cipya. Tukeiccuze Laban nynh ccung salamah innbyn pachia hae kha muih khyh.

³⁶Oute Jakob nynh thinriate bo zah Laban kha, “Paw seinaw mou ka rae? Paw ka cyihsei zahte mou thawte nae deehui?

³⁷Ka uccaw hae balyn kya pong na ccung zah na innbyn kya-e uccaw hae pawmou na muih? Aening lu ning laku na uno hae te ka uno hae nynh byapae khylan tuh-e uccaw tuh minmin malang nungtua.

³⁸Namaw kya kum kuin ka um vae; na tuupinung hae te na miaapinung hae tuh mih taw thansei boi khyh hae. Na tuuphu kya-e tuutepaw hae mah ka ae boi khyh.

³⁹Sarepaw hae nynh a tei hae paw mah namaw kalan kae cciakhae boi khyh; kamaw nynh hung ka rung; khuadae kya thuasah, khuazi kya thuasah a ru hae zemah kamaw kha nae ngiaru.

⁴⁰Khuadae ccyh kya asopaw nynh yn u zah khuazi ccyh kya akyaapaw kha ka teing, i kho leite mah ka um.

⁴¹Tuhcite na inn kya kum kuin ka um vae; na ccanung lu ning hanlan kum haw lae pali, na sahiin phu hanlan kum taruh rya kae lawpya, ka ryalaw mee kha vae haw nae ling.

⁴²Ka paaw a Pachia, Abraham Pachia, Isak nynh a ripaw Pachia nynh yn la pankhae khyh zetuh ka kuih ccakaete solei nae cciasah cih. Pachia nynh ka vawsawnaw, ka ryalawnaw kha muih zah atazi khe nang kha phe ae pe vae,” a cipya.

⁴³Oute Laban nynh Jakob kha, “E ccanung hae hynh ka ccanung hae nynh thua hae, e ccaaw hae hynh ka ccaaw hae nynh thua hae, e sahiin-awvaw hae hynh mah ka sahiin-awvaw hae nynh thua hae, na muihpaw balyn hynh ka kya-e nynh thua. Thuasalama e ka ccanung hae tungvaw thuasah, minmin nynh a saah hae paw mih ccaaw hae tungvaw thuasah, atunin pawmou ka cyih kho ung cih?

⁴⁴Atu yn cceih lah nang te kae byakinkunaw rae sih; tuh-e tuh nang te kae laku ccaekia lang tang sah,” a ci.

⁴⁵Tukeiccuze Jakob nynh lung ccangkheit lah zah lungbing lang a bing.

⁴⁶Te Jakob nynh a uno hae kha, “Lung hae kha pum oh,” cipah hae zah minmin nynh lung hae kha lah hae zah lungpum lang a pum hae; te minmin nynh lungpum pe khe a ae hae.

⁴⁷Laban nynh tuh-e lungpum tuh Jegar-sahadutha[35] cite minphu zah Jakob nynh Galeed[36] cite min a phu.

⁴⁸Laban nynh, “Atunin hynh-e lungpum hynh nang te kae laku ccaekia ccangkheit nynh thua,” a cipya. Tukeiccuze Galeed cite min a phu,

⁴⁹Mizpah[37] lungbing cite mah a ko hae, pawccecize Laban nynh, “Aening lu kheit te lu kheit he ah sawkuh te BAWIPAW nynh nang te kae laku oun do-oih kalang sah.

⁵⁰Ka ccanung hae kha hoyte na ccuepe khyh hae ze thuasah, ka ccanung hae laelan zu na dychih ze thuasah, aening laku ccungccaw um khyh, nang te kae laku Pachia tuh ccaekia nynh thua cipaw kha nytua,” a cipya.

⁵¹Oute Laban nynh Jakob kha, “Nang te kae laku ka nungpaw e lungpum te lungbing hynh dotua.

⁵²Kae nynh nang kha vawsaw pya khylan e lungpum hynh ka lue lan khyh, te nang nynh kae kha dou khylan e lungpum te lungbing hynh na lue lan khyh. E lungbing te lungpum tuh nang te kae hanlan ccaekia nynh thua.

⁵³Abraham Pachia, Nahor Pachia te mih paaw Pachia nynh nang te kae laku bya oun pia sah,” a cipya. Te Jakob a paaw Isak nynh a ripaw Pachia min te Jakob nynh thya a lawku.

⁵⁴Oute Jakob nynh mua vawlan silawnaw rae zah a uno hae kha sanlou ae lan a ko hae. Te minmin nynh sanlou kha ae hae zah tuh-e khuazi tuh mua vawlan a um hae.

⁵⁵Laban nynh awkhua takaw te tho zah a mintaw hae te a ccanung hae kha myng hae zah hythua a pya hae. Te Laban nynh cceih zah a umnaw lang a ki vae.