Read Zotung Chin GENESIS 32 Bible Online

GENESIS 32 - Zotung Chin bible

GENESIS 32

¹Jakob tuh cceih zah Pachia vaawccungccaw hae nynh amaw kha oun tungku hae;

²Jakob nynh minmin kha he muih hae tuh, “E hynh Pachia rhawkaw phu nynh thua,” a ci. Tukeiccuze tuh-e hmin kha Mahanaim cite min a phu.

³Jakob nynh locceihtu hae kha amaw malang khe Edom ram, Seir pee umpaw a upaw Esau kalan saw hae zah,

⁴“Ka bawipaw Esau kha hynhte la hopah oh: Na seepaw Jakob nynh, ‘Laban kya ramccang ccungccaw hawte atu cia ka umbua vae;

⁵vaetua hae, lann hae, tuu hae, miaa hae, seenung hae te seepaw hae kha ka hoi; te ka bawipaw, na malang maehoynaw ka mue nawlan hopya khylan ccungccaw kae saw,’ a ci cite ka bawipaw Esau kha la hopah oh,” a cipya hae.

⁶Locceihtu hae nynh Jakob kalan oun ki hae zah, “Na upaw Esau kya kae thua, namaw kha tungku khylan pise za pali ryte oun cceih hae,” a cipya hae.

⁷Oute Jakob tuh myarya rih zah a lungvawsaw vae; amaw te umkheih hae paw ccungccaw hae, tuu hae, miaa hae, vaetua hae te kalauh hae kha phu ning lang a phia hae.

⁸Pawccecize, “Esau nynh phu kheit kha thuanua zah a ro zemah phu kheit tuh a lue cih,” cite a tua.

⁹Te Jakob nynh, “Pou ka paaw Abraham te ka paaw Isak Pachia, ‘Na ram te na uno hae kalan ki lah na tungvaw hoynaw ka rae cih,’ cite yn hopahpaw pou BAWIPAW ,

¹⁰Na seepaw nae muihsahpaw apaleihkuh leipaw lungzinaw balyn te atynpaw sungsahnaw balyn kya-e adih huapaw te sanmah ka ngaekuh khyh, pawccecize ka hoitang kyalya te nynh e Jordan vaw hynh ka zua; atu tuh phu ning lang ka tang vae.

¹¹Ka upaw Esau kuih kyate beih yn luesah, pawccecize amaw kha ka rih; aning nynh yn cceih cih zah kaening balyn, nung hae ccaaw hae ryte pong oun theih vae cih.

¹²Tuhzemah nang nynh, ‘Na tungvaw hoynaw ka rae ccaccing cih zah na ciihan kha riatae um leipaw rili laesia zeih lang ka rae cih,’ nae cipya,” a ci.

¹³Khuazi tuh tuin kya a rya, te a hoipaw uccaw kya-e kha a upaw Esau hanlan lasung lang pya lan cite

¹⁴miaapinung za ning te miaatepaw sah kuin, tuu nopi za ning te tuutepaw sah kuin,

¹⁵kalauh mateisu sung thum te mih taw hae, vaetua pinung sung pali te tangnuapaw sa haw, lann pinung sa kuin te lanntepaw sa haw kha a po hae.

¹⁶Khah-e hae kha aphuphute phia hae zah phu kheit ze seepaw lu kheit cci kalan ap hae zah, “Ka malang la cceih ty oh lah phu kheit te phu kheit kha sawsakuh oh,” a cipya hae.

¹⁷Masaty a cceihpaw kha byataw zah, “Ka upaw Esau te he na tungkuh oh zah, ‘Nang hynh hum ccungccaw mou na thua? Teilangmou nae ccia? Na malang umpaw sahiin hae hynh hum kya-e mou athua hae?’ cite ae khia ze,

¹⁸‘Na seepaw Jakob kya-e nynh thua hae; ka bawipaw Esau namaw hanlan lasung lang ae pyapaw nynh thua hae; Jakob amaw mah kae nulang nynh a um,’ cite na hopah cih oh,” a cipya.

¹⁹Tuhawte lu ningnaw, lu thumnaw te sahiin phu a zui hae paw balyn kha, “Esau te na tungkuh oh ze hynhte na hopah cih oh:

²⁰‘Na seepaw Jakob mah kae nulang nynh a um,’ cite na hopah cih oh,” cite a taw hae. Pawccecize Jakob nynh, “Ka malang a cceih typaw lasung khate Esau kha a lung ka hoysah cih zah nyalangte he kae tungkuh te kamaw kha naw yn ccaw ze yn ccaw kho,” cite a tuaku.

²¹Tukeiccuze lasung kha amaw malang cciasah ty zah amaw tuh tuin a ryanaw hae kyakhe tuh-e khuazi tuh a rya.

²²Tuh-e khuazi khe Jakob tuh thokuh zah a zu hae lu ning, a seenung hae lu ning, a ccaaw hae lu haw lae kheit kha cciakhae hae zah Jabbok vawkhu kha adeinaw kyate a zua.

²³Aning nynh minmin kha cciakhae hae zah vaw khuraw lang a zuasah hae, tuhawte a hoipaw atyn-are kha khuraw lang a zuasah hae.

²⁴Jakob tuh a makhaete a umhy; te ccungccapaw te khuadae cia a theikuh hae.

²⁵Ccungccapaw nynh Jakob kha ka tae vae khyh cipaw he nyh tuh, Jakob a kung kha phah a thong, te tuh-e paw te a theikuh lya hae khe Jakob a kungru tuh poh suhliakuh.

²⁶Oute ccungccapaw nynh, “Oun cciasah ccavae, pawccecize khua vyavya dae vae,” a cipya. Thuasalama Jakob nynh, “Hythua nae pya khyh zetuh kae cciasah lan khyh,” a ci.

²⁷Tukeiccuze ccungccapaw nynh, “Na min hummou?” cite khia zah “Jakob” cite a khung.

²⁸Oute ccungccapaw nynh, “Na min tuh Jakob cikuh vae lan khyh, Israel[38] cikuh vae cih, pawccecize nang tuh Pachia te mah na taekuh oh, ccungccaw te mah na taekuh oh zah phe na tae hae,” a ci.

²⁹Oute Jakob nynh, “Na min beih yn hopah,” a ci. Thuasalama aning nynh, “Pawcce ka min tuh nae khia?” a ci. Te tuin kyakhe Jakob kha hythua a pya.

³⁰Jakob nynh, “Pachia kha hawiliakute ka muih salamah ka hiin ung,” ci zah tuh-e hmin kha Peniel[39] cite min a phu.

³¹Jakob nynh Peniel kyate a pou lyakhe khuanin mah he a thua, a kungru keiccuze Jakob tuh a bae.

³²Tukeiccuze atunin cia Israel ciihan hae nynh kung kya umpaw tharuipi kha ae khyh hae, pawccecize Jakob a kung kya-e tharuipi tuh aning nynh a thongnaw nynh thua.